କଲମ୍ବୋ() ଗମ୍ଭୀର ଆର୍ଥିକ ସଙ୍କଟ ଦେଇ ଗତି କରୁଥିବା ଶ୍ରୀଲଙ୍କା ଏବେ ବିଦେଶୀ ଋଣ ଶୁଝିବାକୁ ଅକ୍ଷମତା ପ୍ରକାଶ କରିଛି । ଶ୍ରୀଲଙ୍କା ୫୧ ବିଲିୟନ ଡଲାରର ବିଦେଶୀ ଋଣ ପରିଶୋଧ କରିବାରେ ବିଫଳ ହେବ ବୋଲି ଘୋଷଣା କରିଛି। ଶ୍ରୀଲଙ୍କା ଆନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍) ରୁ ଏକ ବେଲ୍ ଆଉଟ୍ ପ୍ୟାକେଜ୍ ପାଇବାକୁ ଆଶା କରୁଛି, କିନ୍ତୁ ଏପର୍ଯ୍ୟନ୍ତ ଆଇଏମ୍ଏଫ୍ ଏ ସମ୍ବନ୍ଧରେ କିଛି ସକାରାତ୍ମକ ସଙ୍କେତ ଦେଇନାହିଁ। ଶ୍ରୀଲଙ୍କାର ଅର୍ଥ ମନ୍ତ୍ରଣାଳୟ କହିଛି ଯେ ମଙ୍ଗଳବାର ଅପରାହ୍ନରୁ ଋଣଦାତାମାନେ ଯେକୌଣସି ସୁଧ ଦେୟ ଏନକ୍ୟାସ କରିପାରିବେ କିମ୍ବା ଶ୍ରୀଲଙ୍କା ଟଙ୍କାରେ ପେମେଣ୍ଟ ଚୟନ କରିପାରିବେ।
ଶ୍ରୀଲଙ୍କାର ଋଣଦାତାମାନଙ୍କ ମଧ୍ୟରେ ଅନେକ ବିଦେଶୀ ସରକାର ଅଛନ୍ତି | ୨.୨ କୋଟି ଜନସଂଖ୍ୟା ବିଶିଷ୍ଟ ଶ୍ରୀଲଙ୍କାରେ ଦୀର୍ଘ ସମୟ ଧରି ବିଦ୍ୟୁତ୍ କାଟ୍ ସାଙ୍ଗକୁ ଔଷଧ, ଇନ୍ଧନ ଇତ୍ୟାଦିର ଘୋର ଅଭାବ ଦେଖାଦେଇଛି | ଏଭଳି ପରିସ୍ଥିତିରେ ଶ୍ରୀଲଙ୍କାର ରାଷ୍ଟ୍ରପତି ଗୋତଟାବାୟା ରାଜପକ୍ଷେଙ୍କ ଉପରେ ଜନଅସନ୍ତୋଷ ବଢ଼ିବାରେ ଲାଗିଛି। ଇସ୍ତଫା ଦେବାକୁ ତାଙ୍କ ଉପରେ ଚାପ ମଧ୍ୟ ବଢ଼ିଛି ।
ଏହାପୂର୍ବରୁ ମଙ୍ଗଳବାର ଶ୍ରୀଲଙ୍କାର ସେଣ୍ଟ୍ରାଲ ବ୍ୟାଙ୍କ ଗଭର୍ଣ୍ଣର ପି.ନନ୍ଦଲାଲ ବୀରାସିଙ୍ଘେ କହିଛନ୍ତି ଯେ ଋଣଦାତାଙ୍କ ସହ ଏକ ଚୁକ୍ତିନାମା ନହେବା ପର୍ଯ୍ୟନ୍ତ ଏବଂ ଆଇଏମ୍ଏଫ୍ ସହିତ ସହାୟତା କାର୍ଯ୍ୟକ୍ରମ ଚୂଡ଼ାନ୍ତ ନହେବା ପର୍ଯ୍ୟନ୍ତ ଆମଦାନୀ ଏବଂ ବିଦେଶୀ ୠଣ ପରିଶୋଧ କରିବା ଉପରେ ଫୋକସ କରିବାର କୌଣସି ଆବଶ୍ୟକତା ନାହିଁ ବୋଲି କହିଛନ୍ତି ।
