ନିତି ଆୟୋଗ ବୈଠକ: ’ବିକଶିତ ଭାରତ’ ପ୍ରସଙ୍ଗରୁ ଦୂରେଇଲେ ୧୧ ମୁଖ୍ୟମନ୍ତ୍ରୀ
ମୋବାଇଲ୍ ନ୍ୟୁଜ୍ ବ୍ୟୁରୋ: ନୂଆଦିଲ୍ଲୀରେ ଶନିବାର ଅନୁଷ୍ଠିତ ହୋଇଯାଇଛି ନିତି ଆୟୋଗର ଗୁରୁତ୍ୱପୂର୍ଣ୍ଣ ବୈଠକ। ତେବେ ଏଥିରେ ୧୧ ରାଜ୍ୟର ମୁଖ୍ୟମନ୍ତ୍ରୀ ଉପସ୍ଥିତ ନଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅଷ୍ଟମ ସାଧାରଣ ପରିଷଦ ବୈଠକ ହୋଇଥିଲା। ଏହା ମୋଦି ସରକାରଙ୍କ ଦ୍ୱିତୀୟ ପାଳିର ଶେଷ ନିତି ଆୟୋଗ ବୈଠକ ହୋଇଥିବାରୁ ବେଶ ଗୁରୁତ୍ୱ ଥିଲା। ୨୦୪୭ ସୁଦ୍ଧା ଭାରତକୁ ଏକ ସମୃଦ୍ଧ ତଥା ବିକଶିତ ରାଷ୍ଟ୍ରରେ ପରିଣତ କରିବା ଏହି ବୈଠକ ମୂଳ ଉଦ୍ଦେଶ୍ୟ ଥିବାବେଳେ ୧୧ ରାଜ୍ୟର ମୁଖ୍ୟମନ୍ତ୍ରୀ ଏହି ସୁଯୋଗକୁ ହାତଛଡ଼ା କରିଥିବା କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଛି।
ମହିଳା ଶସକ୍ତିକରଣ, ଏମଏସଏମଇକୁ ଗୁରୁତ୍ୱ , ସାମାଜିକ ଭିତ୍ତିଭୂମି ବିକାଶ, ସ୍ୱାସ୍ଥ୍ୟ ଓ ପୋଷଣ, ଦକ୍ଷତା ବିକାଶ, ଆଞ୍ଚଳିକ ବିକାଶ ପାଇଁ ଗତିଶକ୍ତି ଯୋଜନା ଉପରେ ଗୁରୁତ୍ୱ ଦିଆଯାଇଛି ।
ବୈଠକରେ ପ୍ରାୟ ସମସ୍ତ ରାଜ୍ୟର ମୁଖ୍ୟମନ୍ତ୍ରୀ, କେନ୍ଦ୍ରଶାସିତ ଅଞ୍ଚଳର ଉପରାଜ୍ୟପାଳ, ବହୁ କେନ୍ଦ୍ରମନ୍ତ୍ରୀ ଏବଂ ନିତି ଆୟୋଗର ଉପାଧ୍ୟକ୍ଷଙ୍କ ସମେତ ଅନ୍ୟ ସଦସ୍ୟ ଯୋଗ ଦେଇଥିଲେ।
ତେବେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ, ବିହାର ମୁଖ୍ୟମନ୍ତ୍ରୀ ନୀତୀଶ କୁମାର, ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ, ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହେଲଟ, କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମୈୟା, ତାମିଲନାଡୁ ମୁଖ୍ୟମନ୍ତ୍ରୀ ଏମ କେ ଷ୍ଟାଲିନ, କେରଳା ମୁଖ୍ୟମନ୍ତ୍ରୀ ପିନରାୟୀ ବିଜୟନ୍, ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପ୍ରମୁଖ ବୈଠକରେ ଯୋଗ ଦେଇନଥିଲେ। ପୂର୍ବରୁ ୮ ଜଣ ବିଭିନ୍ନ କାରଣ ଦେଖାଇ ଅନୁପସ୍ଥିତ ରହିବା ସ୍ପଷ୍ଟ କରିଥିଲେ। ତେବେ ପରେ ଏହି ସଂଖ୍ୟା ୧୧କୁ ବଢ଼ି ଯାଇଥିଲା।
ଶୁକ୍ରବାର ଅରବିନ୍ଦ କେଜ୍ରିୱାଲ ପ୍ରଧାନମନ୍ତ୍ରୀଙ୍କୁ ଲେଖିଥିବା ଏକ ଚିଠିରେ କହିଛନ୍ତି ଯେ, ଅଗଣତାନ୍ତ୍ରିକ ତଥା ଅସାମ୍ବିଧାନିକ ମେ-୧୯ ନିୟମ ଯାହା ଜାତୀୟ ରାଜଧାନୀରେ ସେବା ଉପରେ ନିୟନ୍ତ୍ରଣକୁ ଏଲଜି ଅଧୀନରେ କେନ୍ଦ୍ରକୁ ପୁନଃସ୍ଥାପିତ କରି ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ପ୍ରଭାବଶାଳୀ ଭାବରେ ବାତିଲ କରିଦେଲା । ଯାହା ସେବା, ପୁଲିସ, ଜନ ଆଦେଶ ଏବଂ ଜମି ଉପରେ ପ୍ରତିବନ୍ଧକ ଲଗାଇ ନିର୍ବାଚିତ ସରକାରଙ୍କୁ ହସ୍ତାନ୍ତର କରିଥିଲା । ଆଠ ବର୍ଷର ସଂଘର୍ଷ ପରେ ଦିଲ୍ଲୀର ଲୋକମାନେ ସୁପ୍ରିମକୋର୍ଟରେ ଜିତିଥିଲେ । ହେଲେ ମାତ୍ର ଆଠ ଦିନ ମଧ୍ୟରେ ଆପଣ ଏକ ନିୟମ ପ୍ରଣୟନ କରି ସୁପ୍ରିମକୋର୍ଟ ଆଦେଶକୁ ଖାରଜ କରିଦେଇଥିଲେ । ତେଣୁ ଯଦି ଦିଲ୍ଲୀ ସରକାରଙ୍କ କୌଣସି ଅଧିକାରୀ କାମ କରିବାରେ ବିଫଳ ହୁଅନ୍ତି ତେବେ ଲୋକମାନଙ୍କ ଦ୍ୱାରା ମନୋନୀତ ନିର୍ବାଚିତ ସରକାର କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିିପାରିବେ ନାହିଁ । ତେବେ ସେଠାରେ ସରକାର କିପରି କାର୍ଯ୍ୟ କରିବେ ? ଏହାକୁ ସଂପୂର୍ଣ୍ଣ ଶକ୍ତିହୀନ କରାଯାଉଛି ବୋଲି କେଜ୍ରିୱାଲ ଚିଠିରେ କହିଛନ୍ତି । ସେ ଆହୁରି ମଧ୍ୟ ଲେଖିଛନ୍ତି ଏହି କାର୍ଯ୍ୟ ସମ୍ବିଧାନ ପାଇଁ ଏକ ଅବମାନନା ଏବଂ ସହଯୋଗୀ ସଂଘୀୟତାକୁ ପରିହାସ କରିଛି । ଲୋକମାନେ କହିଛନ୍ତି ନିତି ଆୟୋଗ ବୈଠକରେ ଯୋଗଦେବା ଉଚିତ ନୁହେଁ । ତେଣୁ ମୁଁ ଏହି ବୈଠକରେ ଯୋଗ ଦେଇ ପାରିବି ନାହିଁ । ସେହିପରି କୃଷକଙ୍କ ସମସ୍ୟାକୁ ନେଇ କେନ୍ଦ୍ର ସରକାରଙ୍କ ଅବମାନନା ଦର୍ଶାଇ ପଞ୍ଜାବ ମୁଖ୍ୟମନ୍ତ୍ରୀ ଭଗବତ ମାନ ନିତି ଆୟୋଗ ବୈଠକରୁ ନିବୃତ୍ତ ରହିବାକୁ ନିଷ୍ପତ୍ତି ନେଇଛନ୍ତି । ପଶ୍ଚିମବଙ୍ଗ ଟିଏମସି ନେତା ମମତା ବାନାର୍ଜୀ ମଧ୍ୟ ଏହି ବୈଠକରେ ଯୋଗ ଦେବେ ନାହିଁ । ମମତାଙ୍କ ବଦଳରେ ଅର୍ଥମନ୍ତ୍ରୀ ଚନ୍ଦ୍ରମା ଭଟ୍ଟାଚାର୍ଯ୍ୟ ଏବଂ ମୁଖ୍ୟ ସଚିବ ଏଚ୍ କେ ଦ୍ୱିବେଦୀଙ୍କୁ ପ୍ରତିନିଧିତ୍ୱ କରିବାକୁ ପ୍ରସ୍ତାବ ଦିଆଯାଇଥିଲା । ହେଲେ ଏହି ବୈଠକରେ କେବଳ ମୁଖ୍ୟମନ୍ତ୍ରୀ ଉପସ୍ଥିତ ରହିପାରିବେ ବୋଲି କେନ୍ଦ୍ର ପକ୍ଷରୁ କୁହାଯାଇଛି ।
