ହଜିଗଲା କି ସାଂସଦ ଅପରାଜିତାଙ୍କ ନିଦ? ପୂର୍ବରୁ କଡ଼ା ସମାଲୋଚନା କରିଆସୁଥିବା ଅପରାଜିତା କଣ ପାଇଁ ଚୁପ ହୋଇପଡ଼ିଲେ? ପାଣ୍ଡିଆନ ବିଜେଡିରେ ବିଧିବଦ୍ଧ ଭାବେ ଯୋଗ ଦେଲା ପରେ ଏବେ ଏମିତି କିଛି ଚର୍ଚ୍ଚା ଜୋର ଧରିଛି । ଆଉ ଚର୍ଚ୍ଚା ଏଥିପାଇଁ ହେଉଛି ଯେ ପାଣ୍ଡିଆନ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ, ୫ଟି ସଚିବ ରହିବା ପରେ ନବୀନ ଓଡ଼ିଶା ମୋ ଓଡ଼ିଶାର ଅଧ୍ୟକ୍ଷ ହୋଇଛନ୍ତି । ଆଉ ଏବେ ବିଜେଡିରେ ବିଧିବଦ୍ଧ ଭାବେ ମିଶିଛନ୍ତି ଭିକେ ପାଣ୍ଡିଆନ । ତେବେ ବିଜେଡିରେ ପାଣ୍ଡିଆନଙ୍କ ଯୋଗଦାନକୁ ନେଇ ଭିନ୍ନ ଭିନ୍ନ ମତ ଦେଉଛନ୍ତି ବିରୋଧୀ । ଚାଲିଛି ଅନେକ ଆଲୋଚନା ଏବଂ ପର୍ଯ୍ୟାଲୋଚନା । କିନ୍ତୁ ଏହାକୁ ନେଇ ମୁହଁ ଖୋଲି ନାହାନ୍ତି ସାଂସଦ ଅପରାଜିତା ଷଡ଼ଙ୍ଗୀ । ଯାହାକୁ ନେଇ ଚା’ ଖଟିରୁ ରାଜନୀତି ମହଲ ସବୁଠି ଚର୍ଚ୍ଚା ଚାଲିଛି ଯେ, କୁଆଡେ ବିଜେଡିରେ ପାଣ୍ଡିଆନଙ୍କ ଯୋଗଦାନ, ସାଂସଦ ଅପରାଜିତାଙ୍କ ପାଇଁ ଅଡୁଆ ସାବ୍ୟସ୍ତ ହେବ ।
କାରଣ ଯେତେବେଳେ ବି ସରକାରଙ୍କ କୌଣସି ଯୋଜନା ବା ଉନ୍ନୟନମୂଳକ ପଦକ୍ଷେପ ଆଦି କାର୍ଯ୍ୟକ୍ରମ ହୋଥାଏ, ସେତେବେଳେ ପାଣ୍ଡିଆନଙ୍କୁ ଟାର୍ଗେଟ କରିଥାନ୍ତି ସାଂସଦ ଅପରାଜିତା ଷଡ଼ଙ୍ଗୀ । ସେହିପରି ଚାକିରିରୁ ପାଣ୍ଡିଆନ ଭିଆରଏସ ନେବା ପରେ ଖୁବ୍ ସମାଲୋଚନା କରିଥିଲେ ସାଂସଦ ଅପରାଜିତା । ସିଧା ଟାର୍ଗେଟ କରି ସଫ୍ଟ ଲ୍ୟାଣ୍ଡିଂ ଇନ ପଲିଟିକ୍ସ କହିବାକୁ ପଛାଇନଥିଲେ । ଅଭିଯୋଗ କରିଥିଲେ ଯେ ଇଲେକ୍ସନ କମିଶନର ଅଫ ଇଣ୍ଡିଆର ଆକ୍ସନରୁ ବର୍ତିବା ପାଇଁ ପାଣ୍ଡିଆନ ନେଇଛନ୍ତି ଭିଆରଏସ । ଖାଲି ଏତିକି ନୁହେଁ ଜମି ଦୁର୍ନୀତି ମାମଲା ନେଇ ପରୋକ୍ଷରେ ପାଣ୍ଡିଆନଙ୍କ ହାତ ଥିବା ଅଭିଯୋଗ ଉଠାଇଥିଲେ ଅପରାଜିତା ।
କହିଥିଲେ ରାଜ୍ୟରେ ଯେଉଁ ସବୁ ଜମି ଦୁର୍ନୀତି ହେଉଛି, ଏହା ପଛରେ ବହୁ ପ୍ରଭାବଶାଳୀ ଲୋକମାନଙ୍କ ହାତ ରହୁଛି । ଆଉ ଏହାର ଲିଙ୍କ ତୃତୀୟ ମହଲାର ଜଣେ ସରକାରୀ ଅଫିସରଙ୍କ ସହ ରହିଥିବା କହି ଇଙ୍ଗିତ କରିଥିଲେ ଅପରାଜିତା । ସେହିପରି ଭୁବନେଶ୍ୱରରୁ ୧୫ କିଲୋମିଟର ଦୂରରେ ଜମି ହଡପ ପ୍ରକଳ୍ପ ଚାଲିଛି ବୋଲି ବର୍ଷିଥିଲେ ଏବଂ ବିଭିନ୍ନ ସମୟରେ ଓଡ଼ିଶାରେ ଅଣଓଡିଆ ଶାସନ ଚାଲିଥିବା କହି ପାଣ୍ଡିଆନଙ୍କୁ ଟାର୍ଗେଟ କରିଆସିଛନ୍ତି ଅପରାଜିତା ।
ଅନ୍ୟପଟେ ସବୁ କଥାକୁ ଚାଲେଞ୍ଜ ଆକାରରେ ଗ୍ରହଣ କରି ପାଣ୍ଡିଆନ ଏବେ ରାଜନୀତିରେ ପୂରା ଆକ୍ଟିଭ୍, ତେଣୁ ଅପରାଜିତାଙ୍କ ନିରବତା ହିଁ ତାଙ୍କ ନିଦ ଉଡ଼ାଇ ଦେଇଛି ବୋଲି ଏବେ ଚର୍ଚ୍ଚା ଜୋର୍ ଧରିଛି ।
