ଯାଜପୁର୧୪/ଜୁନ୍: ଥମିବାରେ ନା ନେଉନି ଯାଜପୁର ଝାଡ଼ାବାନ୍ତି ସମସ୍ୟା । ଶୁକ୍ରବାର ଦିନ ଓଡ଼ିଶା ସରକାର ଯାଜପୁର ଜିଲ୍ଲାର ପ୍ରଭାବିତ ଅଞ୍ଚଳରୁ ସଂଗୃହୀତ ନମୁନାରେ ହଇଜା ସୃଷ୍ଟିକାରୀ ଜୀବାଣୁ ତଥା କଲେରା ଜୀବାଣୁ ଥିବା ନିଶ୍ଚିତ କରାଯାଇଛି। ବର୍ତ୍ତମାନ ଏହା ସରକାରଙ୍କ ମୁଣ୍ଡବିନ୍ଧାର କାରଣ ସାଜିଛି । ମୃତ୍ୟୁ ସଂଖ୍ୟା ୧୧ରେ ପହଞ୍ଚିଛି ।ଏବେ ଖବର ଆସୁଛି ଆଉ ଦୁଇ ଜିଲ୍ଲାରେ ଡାଇରିଆ ବ୍ୟାପୁଛି, ଭଦ୍ରକ ଓ କେନ୍ଦୁଝର । ରୋଗର ଆହୁରି ପ୍ରସାରକୁ ରୋକିବା ପାଇଁ ସ୍ୱାସ୍ଥ୍ୟ ଅଧିକାରୀମାନେ ପ୍ରଭାବିତ ଅଞ୍ଚଳ, ଧର୍ମଶାଳା, ଦାନଗଦୀ, କୋରେଇ, ରସୁଲପୁର ବ୍ଲକ ଏବଂ ବ୍ୟାସନଗର ପୌରପାଳିକାରେ ତଦାରଖ, ଜଳ ଗୁଣବତ୍ତା ତଦାରଖ ଏବଂ ସଚେତନତା ଅଭିଯାନ ତୀବ୍ର ହୋଇଛି। ଖାଲି ଏଥର ନୁହେଁ, ଗତ କିଛି ଦଶନ୍ଧି ଧରି ରାଜ୍ୟ ନିରନ୍ତର ଭାବରେ କଲେରା ମାମଲା ରିପୋର୍ଟ କରିଆସୁଛି, ବିଶେଷକରି ରାୟଗଡା, କୋରାପୁଟ, କଳାହାଣ୍ଡି, ନୂଆପଡା ଏବଂ ସୁନ୍ଦରଗଡ ଭଳି ଜିଲ୍ଲାର ନିମ୍ନ ସାମାଜିକ-ଅର୍ଥନୈତିକ ଗୋଷ୍ଠୀଗୁଡ଼ିକୁ ପ୍ରଭାବିତ କରୁଛି କଲେରା ଜୀବାଣୁ। ୨୦୨୩ ମସିହାରେ, ରାଉରକେଲାରେ ଅତି କମରେ ୧୩ ଜଣଙ୍କ ମୃତ୍ୟୁ ଘଟିଥିଲା ଏବଂ ୧୦୦୦ ରୁ ଅଧିକ ଲୋକ ଆକ୍ରାନ୍ତ ହୋଇଥିଲେ। ୨୦୨୨ ମସିହାରେ ରାୟଗଡ଼ା ଜିଲ୍ଲାରେ ୮ ଜଣଙ୍କ ମୃତ୍ୟୁ ଘଟିଥିଲା ଏବଂ ୧୦୪ ଜଣଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଏହି ମହାମାରୀ ଭୟଙ୍କର ହେବାର ପ୍ରମୁଖ କାରଣ ଭାବରେ ସ୍ୱଚ୍ଛ ପାନୀୟ ଜଳର ଅଭାବ, ପରିମଳ ବ୍ୟବସ୍ଥାର ଅଭାବ ଏବଂ ବିଳମ୍ବରେ ଚିକିତ୍ସା ସେବା ପ୍ରଦାନ କରାଯିବା ।
