ନୂଆଦିଲ୍ଲୀ ୧୬/ଜୁନ୍ : ଅହମ୍ମଦାବାଦରେ ଏୟାର ଇଣ୍ଡିଆ ବିମାନ ଦୁର୍ଘଟଣାରୁ ବଞ୍ଚି ଯାଇଥିବା ଏକମାତ୍ର ଯାତ୍ରୀ ଥିଲେ ବିଶ୍ୱାସ କୁମାର ରମେଶ। ବିମାନରେ ଥିବା ବାକି ୨୪୧ ଜଣଙ୍କ ମୃତ୍ୟୁ ଘଟିଥିଲା। ବିଶ୍ୱାସ କୁମାରଙ୍କ ଏକ ନୂତନ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଏଥିରେ ସେ ଦୁର୍ଘଟଣାସ୍ଥଳରୁ ବାହାରକୁ ଆସୁଥିବାର ଦେଖାଯାଉଛି। ଦୁର୍ଘଟଣାର ଭୟାବହତା ଏବଂ ସେଠାରେ ଉପସ୍ଥିତ ଲୋକଙ୍କ ଚିତ୍କାର ଭିଡିଓରେ ଶୁଣିବାକୁ ମିଳୁଛି। ବିଶ୍ୱାସ କୁମାର ରମେଶ ନିଆଁ ଏବଂ ଧୂଆଁରୁ ବାହାରକୁ ଆସୁଛନ୍ତି। ସେଠାରେ ଉପସ୍ଥିତ ଲୋକମାନେ ତାଙ୍କୁ ଉଠାଇ ନେଇ ଯାଉଛନ୍ତି। ଜଣେ ସୋସିଆଲ ମିଡ଼ିଆ ବ୍ୟବହାର କାରି ଏହି ଭିଡିଓକୁ ଇନଷ୍ଟାଗ୍ରାମରେ ସେୟାର କରିଛନ୍ତି। ଜୁନ୍ ୧୨ ତାରିଖରେ ଏୟାର ଇଣ୍ଡିଆର ବୋଇଂ ୭୮୭ ଡ୍ରିମଲାଇନର ୧୭୧ ଅହମ୍ମଦାବାଦର ବିଜେ ମେଡିକାଲ କଲେଜର ହଷ୍ଟେଲ କୋଠା ସହିତ ଧକ୍କା ହୋଇଥିଲା। ଏହି ଘଟଣା ସମଗ୍ର ଦେଶକୁ ଥରାଇ ଦେଇଥିଲା। ସେହି ଦୁର୍ଘଟଣାରେ ବିଶ୍ୱାସ କୁମାରଙ୍କ ବଞ୍ଚି ରହିବାକୁ ଏକ ‘ଚମତ୍କାର’ ବୋଲି ବର୍ଣ୍ଣନା କରାଯାଉଛି। ଏହି ଏୟାର ଇଣ୍ଡିଆ ବିମାନ ଅହମ୍ମଦାବାଦର ସର୍ଦ୍ଦାର ବଲ୍ଲଭ ଭାଇ ବିମାନବନ୍ଦରରୁ ଲଣ୍ଡନର ଗାଟୱିକ୍ ଅଭିମୁଖେ ଉଡ଼ାଣ ଭରୁଥିଲା। ବିଶ୍ୱାସ କୁମାର ରମେଶ ୧୧ଏ ସିଟ୍ ନମ୍ବରରେ ବସିଥିଲେ। ବିମାନଟି ଉଡ଼ାଣ ଭରିବାର କିଛି ସେକେଣ୍ଡ ପରେ, ଏହା ବିଜେ ମେଡିକାଲ କଲେଜର ହଷ୍ଟେଲରେ ଧକ୍କା ହୋଇଥିଲା। ୧୧ଏ ସିଟ୍ ନମ୍ବର ଜରୁରୀକାଳୀନ ପ୍ରସ୍ଥାନ ପାଖରେ ଥିଲା। ବିଶ୍ୱାସ କୁମାର ନିଜେ କହିଥିଲେ ଯେ ସେ ବଞ୍ଚିବେ ବୋଲି ଆଶା କରିନଥିଲେ। ସେ କିପରି ବଞ୍ଚିଗଲେ ତାହା ସେ ନିଜେ ବିଶ୍ୱାସ କରିପାରିଲେ ନାହିଁ। ରମେଶ କହିଥିଲେ ଯେ ସେ ମଧ୍ୟ ଭାବିଥିଲେ ଯେ ସେ ମରିଯିବେ। ଯେତେବେଳେ ମୁଁ ଆଖି ଖୋଲିଲି, ମୁଁ ଜାଣିଲି ଯେ ମୁଁ ବଞ୍ଚିଯାଇଛି।
