ଭୁବନେଶ୍ୱର ୨୮/ଜୁଲାଇ : ଗଞ୍ଜାମ ଜିଲ୍ଲାର ଚର୍ଚ୍ଚିତ ପୂର୍ବତନ ସରପଞ୍ଚ ଆରତୀ ଦେବୀ ନିଜ ଅଞ୍ଚଳ ଢୁଙ୍କାପଡାର ପ୍ରାକୃତିକ ସମ୍ପଦ, ବିରଳ ଜୀବଜନ୍ତୁ ଓ ପ୍ରାଚୀନ ଧାର୍ମିକ ଐତିହ୍ୟକୁ ରକ୍ଷା କରିବା ପାଇଁ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଆହ୍ୱାନ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ଏହି ଅଞ୍ଚଳରେ ବେଆଇନ ଖଣି ଚାଲିଛି ଓ ଏହାକୁ ସରକାରୀ ଅଧିକାରୀଙ୍କ ଅନୈତିକ ସହଯୋଗ ମିଳୁଛି। ଖଣି ମାଫିଆମାନେ ବ୍ଲାଷ୍ଟିଂ ଓ ଜିଲୋଟିନ୍ ଦ୍ୱାରା ପଥର ଉତ୍ତୋଳନ କରି ଏକ ଭୟଙ୍କର ପରିସ୍ଥିତି ସୃଷ୍ଟି କରିଦେଇଛନ୍ତି, ଯାହା ଫଳରେ କୃଷ୍ଣସାର ମୃଗ, ମୟୂର ପରି ବିରଳ ପ୍ରଜାତି ନଷ୍ଟ ହେଉଛନ୍ତି ଓ ଜଳାଶୟ ଓ ପାହାଡ଼ ଧ୍ୱଂସ ହେଉଛି। ଆରତୀ ଦେବୀ ଅଭିଯୋଗ କରିଛନ୍ତି ଯେ, ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା ପ୍ରକୃତ ତଦନ୍ତ କରିବା ପୂର୍ବରୁ ମିଛ ରିପୋର୍ଟ ଦେଇ ବେଆଇନ କାର୍ଯ୍ୟକୁ ଢାକିବାକୁ ଚେଷ୍ଟା କରୁଛନ୍ତି। ମାଫିଆମାନଙ୍କୁ ପ୍ରଶାସନ ପ୍ରତ୍ୟକ୍ଷ ଭାବେ ପ୍ରୋତ୍ସାହନ ଦେଉଛି ବୋଲି ଆରୋପ ଲାଗିଛି। ଏହି ଅବସ୍ଥାରେ ଲୋକଙ୍କ ଅଧିକାର ଓ ପରିବେଶ ସୁରକ୍ଷିତ କରିବାକୁ ସରକାର ନ ଶୁଣିଲେ, ଆଗାମୀ ୭ ଦିନରେ ରାଜଭବନ ସାମ୍ନାରେ ଆମରଣ ଅନଶନ କରିବେ ବୋଲି ଆରତୀ ଦେବୀ ଚେତାବନୀ ଦେଇଛନ୍ତି।
