ଭୁବନେଶ୍ୱର ,ପୋଲିସ ପକ୍ଷରୁ ସ୍ପେଶାଲ ଟିମ ଗଠନ କରାଯିବା ସହ ମାନବ ଚାଲାଣ ରୋକିବା ନେଇ ବ୍ଲୁ ପ୍ରିିଣ୍ଟ ପ୍ରସ୍ତୁତ। ଦାଦନ ଶ୍ରମିକ ଚାଲାଣ ରୋକିବା, ମହିଳାଙ୍କୁ ସେକ୍ସ ରାକେଟ ପାଇଁ ବାହାର ରାଜ୍ୟ ଓ ବିଦେଶକୁ ଚାଲାଣ ସହ ଶିଶୁ ଚୋରା ଚାଲାଣକୁ କିଭଳି ରୋକା ଯାଇପାରିବ ତାକୁ ନେଇ ରାଜ୍ୟ ପୋଲିସ ଭବନରେ ହୋଇଛି ମାନସମନ୍ଥନ।
କଟକ ଜିଲ୍ଲା ବୈଦେଶ୍ବର ଥାନା ପରିସରରେ,ନିଜ ଝିଅ ଫଟୋ ଧରି ଛିଡା ହୋଇଛନ୍ତି ମୋହନ ଚନ୍ଦ୍ର ସିଂହ । ବାଙ୍କୀ ବ୍ଲକ୍ ଜୟମଙ୍ଗଳ ଗାଁର ମୋହନଙ୍କ ୩୦ ବର୍ଷୀୟା ବିଧବା ଝିଅ ଗଲା ୫ ମାସ ହେବ ନିଖୋଜ ହୋଇଯାଇଛନ୍ତି । ଏ ନେଇ ସେ ଥାନାରେ ଅଭିଯୋଗ ବି କରିଛନ୍ତି । ଝିଅର ସନ୍ଧାନ ପାଇବା ପାଇଁ ସବୁଦିନ ଥାନାକୁ ଦୌଡୁଛନ୍ତି ।
ହେଲେ ଏ ପର୍ଯ୍ୟନ୍ତ କୌଣସି ଖବର ମିଳୁନାହିଁ । ଝିଅକୁ ଚାଲାଣ କରି ଦିଆଯାଇଥିବା ସେ ସନ୍ଦେହ କରୁଛନ୍ତି । ପୁରୀ ଜିଲା ଡେଲାଙ୍ଗ ଥାନାରେ ପିପିଲି ଏସଡିପିଓଙ୍କ S D P O ଙ୍କ ସହ ଚାଲିଛି କୁଞ୍ଜର ଗାଁ ଲୋକଙ୍କ ଯୁକ୍ତିତର୍କ । ଗାଁର ଦୁଇ ନାବାଳକ ଭାଇ ଗଲା ମାସ ୩୦ ତାରିଖରୁ ନିରୁଦ୍ଦିଷ୍ଟ ହୋଇଯାଇଥିଲେ ହେଁ ସେମାନଙ୍କ ଏ ପର୍ଯ୍ୟନ୍ତ ଖୋଜ୍ ଖବର ମିଳିପାରିନାହିଁ ।
ପୋଲିସ ତଦନ୍ତରେ ଶିଥିଳତା ଅଭିଯୋଗ କରି ଗ୍ରାମବାସୀ ଥାନାରେ ଧାରଣା ଦେଇଛନ୍ତି । ଖାଲି ଏତିକି ନୁହେଁ ନିକଟରେ ଜଣେ ଝାଡଖଣ୍ଡର ନାବାଳିକାଙ୍କୁ ରାଜଧାନୀ ଭୁବନେଶ୍ବରର ଆଣି ସେକ୍ସ ରାକେଟରେ ନିୟୋଜିତ କରାଯାଇଥିଲା । ଘଟଣା ସାମ୍ନାକୁ ଆସିବା ପରେ ଏବେ ଚାଲିଛି ତନାଘନା । ରାଜ୍ୟ ତଥା ରାଜ୍ୟ ବାହାରେ ଏଭଳି ମାନବ ଚାଳାଣକୁ ନେଇ, ଉଦବେଗ ପ୍ରକାଶ ପାଇଥିବା ବେଳେ ଏହାକୁ ରୋକିବା ଲାଗି ଏଣେ ଚାଲିଛି ମାନସ ମନ୍ଥନ । ଭୁବନେଶ୍ବର ପୋଲିସ ଭବନରେ, ଏ ନେଇ ରାଜ୍ୟସ୍ତରୀୟ ସମ୍ମିଳନୀ ଅନୁଷ୍ଠିତ ହୋଇଛି । ମାନବ ଚାଳାଣ ରୋକିବା ଲାଗି ରାଜ୍ୟଗୁଡିକ ସହ ସମନ୍ୱୟ ରକ୍ଷା, ପ୍ରଯୁକ୍ତି ବିଦ୍ୟାର ବ୍ୟବହାର, ଡିଜିଟାଲ ଟ୍ରାକିଂ, ଡାଟା ଅନାଲିସିସ ଉପରେ ଏଥିରେ ଗୁରୁତ୍ୱାରୋପ କରାଯାଇଛି । ମୁଖ୍ୟତଃ ଶ୍ରମିକ ଚାଲାଣକୁ ରୋକିବା ପାଇଁ ପୁନର୍ବାସ ଆଇନ ଯୋଗାଇଦେବାରେ ଏନଜିଓର ଭୂମିକା ସମ୍ପର୍କରେ ଆଲୋଚନା ହୋଇଛି ।
