ପାଟନା, ୦୭/୦୩/୨୦୨୬: ବିହାର ରାଜନୀତିରେ ଏବେ ହଟଚମଟ ସୃଷ୍ଟି ହୋଇଛି। ପାଟନାରେ ଅନୁଷ୍ଠିତ ଜେଡିୟୁ ବିଧାନମଣ୍ଡଳ ଦଳର ବୈଠକରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନିଷ୍ପତ୍ତିକୁ ନେଇ ବିଧାୟକମାନେ ଖୋଲାଖୋଲି ଭାବେ ଅସନ୍ତୋଷ ପ୍ରକାଶ କରିଛନ୍ତି। ବିଶେଷ କରି ନୀତୀଶ କୁମାର ରାଜ୍ୟସଭାକୁ ଯିବା ପାଇଁ ନେଇଥିବା ନିଷ୍ପତ୍ତିକୁ ଦଳର ବହୁ ସଂଖ୍ୟକ ବିଧାୟକ ବିରୋଧ କରିଥିବା ସୂଚନା ମିଳିଛି।
ଏହି ବୈଠକରେ ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ ହେଉଛି ନୀତୀଶ କୁମାରଙ୍କ ପୁଅ ନିଶାନ୍ତ କୁମାରଙ୍କୁ ନେଇ ଦଳର ଆଭିମୁଖ୍ୟ। ବିଧାୟକମାନେ ନିଶାନ୍ତ କୁମାରଙ୍କୁ ସମର୍ଥନ ଜଣାଇବା ସହ ସେ ରାଜନୀତିକୁ ଆସନ୍ତୁ ବୋଲି ଦାବି କରିଛନ୍ତି। ସୂଚନା ଅନୁଯାୟୀ, ଆସନ୍ତାକାଲି ନିଶାନ୍ତ କୁମାର ଆନୁଷ୍ଠାନିକ ଭାବେ ଜେଡିୟୁରେ ସାମିଲ ହେବାକୁ ଯାଉଛନ୍ତି। ଏହା ବିହାର ରାଜନୀତିରେ “ଉତ୍ତରାଧିକାରୀ” ଚୟନ ପ୍ରକ୍ରିୟା ଆରମ୍ଭ ହୋଇଥିବା ନେଇ ସଙ୍କେତ ଦେଉଛି।
ନୀତୀଶ କୁମାର ଦେଶର ରାଜନୀତିରେ ଏକ ବଡ଼ ଭୂମିକା ଗ୍ରହଣ କରିବା ପାଇଁ ରାଜ୍ୟସଭାକୁ ଯିବାକୁ ପ୍ରସ୍ତୁତ ହେଉଥିବା ବେଳେ, ନିଜ ଦଳର ବିଧାୟକମାନେ ତାଙ୍କୁ ବିହାର ଛାଡ଼ି ନଯିବାକୁ ଅନୁରୋଧ କରିଛନ୍ତି। ବିଧାୟକମାନଙ୍କ ଯୁକ୍ତି ହେଉଛି ଯେ ନୀତୀଶ କୁମାରଙ୍କ ଅନୁପସ୍ଥିତିରେ ରାଜ୍ୟରେ ଦଳର ସ୍ଥିତି ଦୁର୍ବଳ ହୋଇପାରେ। ଏହି ବିବାଦ ପରେ ଜେଡିୟୁ ମଧ୍ୟରେ ଦୁଇଟି ଗୋଷ୍ଠୀ ସୃଷ୍ଟି ହୋଇଥିବା ଚର୍ଚ୍ଚା ହେଉଛି।
ଆସନ୍ତାକାଲି ନିଶାନ୍ତ କୁମାରଙ୍କ ଜେଡିୟୁରେ ସାମିଲ ହେବା ପରେ ବିହାର ସରକାର ଏବଂ ଦଳର ସଂଗଠନରେ ବଡ଼ ଧରଣର ଅଦଳବଦଳ ହେବାର ସମ୍ଭାବନା ରହିଛି। ନୀତୀଶ କୁମାର ନିଜ ବିଧାୟକଙ୍କ କଥା ମାନି ରାଜ୍ୟରେ ରହିବେ ନା କେନ୍ଦ୍ର ରାଜନୀତି ଆଡ଼କୁ ମୁହାଁଇବେ, ତାହା ଉପରେ ଏବେ ସମସ୍ତଙ୍କ ନଜର।
