ଭୁବନେଶ୍ବର: କେନ୍ଦ୍ରାପଡା ଜିଲ୍ଲାରେ ପୁଣି ଏକ ଲଜ୍ଜାଜନକ ଘଟଣା । ନାବାଳିକା ଦୁଷ୍କର୍ମ ଅଭିଯୋଗରେ ଜଣେ ନାବାଳକଙ୍କୁ ଅଟକ ରଖିଛି ପାଟକୁରା ପୋଲିସ । କିଛିଦିନ ତଳେ ଏକ ଘରୋଇ ବିଦ୍ୟାଳୟରେ ଶିକ୍ଷକମାନଙ୍କ ଦ୍ୱାରା ଜଣେ ନାବାଳିକା ଛାତ୍ରୀ ପାଶବିକ ଅତ୍ୟାଚାରର ଶିକାର ହେବା ଘଟଣା କେନ୍ଦ୍ରାପଡାକୁ ନିନ୍ଦିତ କରିଥିଲା । ଏବେ ପୁଣି ନାବାଳିକା ଦୁଷ୍କର୍ମ ଅଭିଯୋଗ ଆଉଥରେ ଜିଲ୍ଲାକୁ ଲଜ୍ଜିତ କରାଇଛି। ଦୋଳ ମେଳଣ ଅବସରରେ ଅପେରା ପରିବେଷଣ ଚାଲିଥିବାବେଳେ ଜଣେ ୯ ବର୍ଷର ନାବାଳିକାକୁ ଅପେରା ପାଖରୁ ଡାକି ନେଇ ଜଣେ ୧୬ ବର୍ଷର ନାବାଳକ ଦୁଷ୍କର୍ମ କରିବା ଘଟଣା ସମଗ୍ର କେନ୍ଦ୍ରାପଡା ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ଏହି ଅପରାଧିକ ଘଟଣାଟି ମାର୍ଚ୍ଚ ୩ ତାରିଖରେ ଘଟିଥିବାବେଳେ ନାବାଳିକାଙ୍କ ପରିବାର ପକ୍ଷରୁ ଗତକାଲି ଅର୍ଥାତ ସୋମବାର ପାଟକୁରା ଥାନାରେ ଅଭିଯୋଗ କରାଯାଇଥିଲା। ତତ୍କାଳ ପଦକ୍ଷେପ ସ୍ୱରୂପ ପାଟକୁରା ପୋଲିସ ଅଭିଯୁକ୍ତ ନାବାଳକକୁ ଥାନାକୁ ଆଣି ପଚରାଉଚୁରା ଜାରି ରଖିଛି।
