କୋରାପୁଟ() ବଡ଼ କମ୍ପାନୀରେ ଚାକିରି କରାଇଦେବାକୁ କହି ବଡ଼ ଧରଣର ଠକେଇ ଅଭିଯୋଗରେ ସେମିଳିଗୁଡ଼ାରୁ ୫ ଜଣଙ୍କୁ ଗିରଫ କରାଯାଇଛି । ଦାମନଯୋଡ଼ି ନାଲ୍କୋ ଓ ସୁନାବେଡ଼ାର ହାଲ୍ ଭଳି ବଡ଼ ବଡ଼ କମ୍ପାନୀରେ ଠିକା ନିଯୁକ୍ତି ଦେବା ନାଁରେ ଏକ ରାକେଟ୍ ଚାଲିଥିଲା। ୭୦ ଜଣ ପିଲାଙ୍କ ଠାରୁ ୪୦ ହଜାର ଟଙ୍କା ଲେଖାଏଁ ନେଇ ସେମାନଙ୍କୁ ନକଲି ନିଯୁକ୍ତିପତ୍ର ଓ ଗେଟ୍ ପାସ୍ ଦିଆଯାଇଥିଲା।
କିଛି ପିଲା ନାଲ୍କୋ କାରଖାନାକୁ କାମ କରିବାକୁ ଯିବାରୁ ସୁରକ୍ଷାକର୍ମୀ ସେମାନଙ୍କୁ ଅଟକାଇବା ସହ ସେମାନଙ୍କ ପାସ୍ ନକଲି ବୋଲି କହିଥିଲେ। ଠକେଇରେ ଶିକାର ହୋଇଥିବା ଆଶାୟୀମାନେ ଥାନାରେ ଅଭିଯୋଗ କରିବା ପରେ ଦାମନଯୋଡ଼ି ଓ ସୁନାବେଡ଼ା ସମେତ ୩ଟି ଥାନାର ଅଧିକାରୀଙ୍କୁ ନେଇ ଏକ ଟିମ୍ ଗଠନ ହୋଇଥିଲା। ତଦନ୍ତ ପରେ ଜାଲ୍ ସଂସ୍ଥା ଖୋଲିଥିବା ରାୟଗଡ଼ା ସହରର ୨ଜଣ ସୁଧିର ଚୌଧୁରୀ ଓ ତାଙ୍କ ପୁଅ ସନ୍ତୋଷ ଚୌଧୁରୀଙ୍କୁ ଗିରଫ କରାଯାଇଛି । ସେମିଳିଗୁଡ଼ାର ଏକ ସମ୍ଭ୍ରାନ୍ତ ହୋଟେଲରୁ ୩ ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ଭୁବନେଶ୍ୱରର ସନ୍ତୋଷ ବରାଡ଼ ଓ କମଳ ଲୋଚନ ମହାନ୍ତି ଏବଂ ଯାଜପୁର ଜିଲ୍ଲା ବରି ରାମଚନ୍ଦ୍ରପୁରର ଅଭିମନ୍ୟୁ ମିଶ୍ର। ଅଭିଯୁକ୍ତମାନଙ୍କ ଠାରୁ ବିଭିନ୍ନ କମ୍ପାନୀର ୧୭ଟି ନକଲି ଷ୍ଟାମ୍ପ, ୫୫ଟି ଗେଟ୍ ପାସ, କଲର୍ ପ୍ରିଣ୍ଟର, କମ୍ପ୍ୟୁଟର୍, ହାର୍ଡଡିସ୍କ, ୨୧ ହଜାର ନଗଦ ଟଙ୍କା ଏବଂ ଏକ କାର୍ ଜବତ ହୋଇଛି।
