ଭୁବନେଶ୍ୱର: ଆରପାରିରେ ଅଭିନେତା ବିକ୍ରମ ଗୋଖଲେ । ମୃତ୍ୟୁ ବେଳକୁ ତାଙ୍କୁ ୭୭ ବର୍ଷ ବୟସ ହୋଇଥିଲା । ଗଣମାଧ୍ୟମ ରିପୋର୍ଟ ଅନୁଯାୟୀ, ବିକ୍ରମ ଗୋଖଲେ ପୁଣେର ଦେନାଥ ମଙ୍ଗେଶକର ଡାକ୍ତରଖାନାରେ ଚିକିତ୍ସିତ ହେଉଥିଲେ। ଅଭିନେତାଙ୍କ ଅବସ୍ଥା ଅତ୍ୟନ୍ତ ଜଟିଳ ଥିଲା।
ପୁଣେର ଏକ ଡାକ୍ତରଖାନାରେ ବିକ୍ରମ ଗୋଖଲେ ଶେଷ ନିଶ୍ୱାସ ତ୍ୟାଗ କରିଛନ୍ତି। କୁହାଯାଉଛି ଯେ ଦୀର୍ଘ ଦିନ ଧରି ଅଭିନେତାଙ୍କ ସ୍ୱାସ୍ଥ୍ୟ ଖରାପ ଥିଲା। ଡାକ୍ତରଖାନାରେ ୧୫ ଦିନରୁ ଅଧିକ ସମୟ ବିତାଇବା ପରେ ଅଭିନେତା ଶେଷ ନିଶ୍ୱାସ ତ୍ୟାଗ କରି ଏହି ଦୁନିଆକୁ ବିଦାୟ ନେଇଛନ୍ତି। ବିକ୍ରମ ଗୋଖଲେଙ୍କ ମୃତ୍ୟୁ ସହିତ ତାଙ୍କ ପରିବାର ସଦସ୍ୟଙ୍କ ସହ ବଲିଉଡ ଇଣ୍ଡଷ୍ଟ୍ରିରେ ମଧ୍ୟ ଏକ ବଡ଼ ଝଟକା ଲାଗିଛି।
ଅନେକ ବଡ ବଲିଉଡ ଚଳଚ୍ଚିତ୍ରରେ ବିକ୍ରମ ଗୋଖଲେ ଗୁରୁତ୍ୱପୂର୍ଣ୍ଣ ତଥା ସ୍ମରଣୀୟ ଭୂମିକାରେ ଅଭିନୟ କରିଛନ୍ତି। ହମ୍ ଦିଲ୍ ଦେ ଚୁକେ ସନମ୍, ଭୁଲ୍ ଭୁଲାଇୟା ଠାରୁ ଦେ ଦନାଦନ ପର୍ଯ୍ୟନ୍ତ ବିକ୍ରମ ଗୋଖଲେ ତାଙ୍କ ଅଭିନୟ ଦ୍ୱାରା ଅନେକଙ୍କ ହୃଦୟ ଜିତିଛନ୍ତି । ତେବେ ବିକ୍ରମ ଗୋଖଲେ କେବଳ ହିନ୍ଦୀ ସିନେମାରେ ନୁହେଁ ମରାଠୀ ସିନେମାରେ ଅଭିନୟ କରି ମଧ୍ୟ ଲୋକଙ୍କ ହୃଦୟରେ ଏକ ଗଭୀର ଭାବନା ଛାଡିଛନ୍ତି।
