ଭୁବନେଶ୍ଵର: ରାଜଧାନୀର ଏୟାରପୋର୍ଟରେ ବିମାନ ବାତିଲ ପରେ ତାତିଲେ ଯାତ୍ରୀ । ଏହା ପ୍ରତିବାଦରେ ଗୁରୁବାର ୬୦ରୁ ଅଧିକ ଯାତ୍ରୀ ବିମାନବନ୍ଦର ପରିସରରେ ଧାରଣା ଦେଇଛନ୍ତି। ବିମାନ କମ୍ପାନୀର ମନମୁଖୀ କାର୍ଯ୍ୟକୁ ଯାତ୍ରୀମାନେ ତୀବ୍ର ବିରୋଧ କରିଛନ୍ତି । ସୂଚନାନୁଯାୟୀ, ଗତ ବୁଧବାର ସକାଳ ୯ଟା ୪୫ ମିନିଟରେ ଭୁବନେଶ୍ଵରରୁ ହାଇଦ୍ରାବାଦ ଯିବାକୁ ଥିବା IX 2932 ବିମାନ ଉଡ଼ାଣ ଭରିବାର ଥିଲା ।
କିନ୍ତୁ କୌଣସି କାରଣରୁ ତାହାକୁ ବାତିଲ କରିଦିଆଯାଇଥିଲା । ଗୁରୁବାର ସକାଳ ୮ଟା ୪୫ରେ ହାଇଦ୍ରାବାଦ ଉଡ଼ାଣ ପାଇଁ ପୁନର୍ବାର ସମୟ ଧାର୍ଯ୍ୟ ହୋଇଥିଲା । ସେଥିଲାଗି ଟିକଟ କାଟିଥିବା ଯାତ୍ରୀମାନେ ବିମାନବନ୍ଦରରେ ଆସି ପହଞ୍ଚିଥିଲେ । କିନ୍ତୁ ପୁନର୍ବାର ବିମାନକୁ ବାତିଲ କରିଦିଆଯାଇଥିଲା । ଏଥିରେ ୬୦ରୁ ଉର୍ଦ୍ଧ୍ଵ ଯାତ୍ରୀ ଅସନ୍ତୋଷ ପ୍ରକାଶ କରି ଧାରଣା ଦେଇଛନ୍ତି । ଭୁବନେଶ୍ୱର ବିମାନବନ୍ଦର ଭିତରେ ଉତ୍ତେଜନାମୂଳକ ପରିସ୍ଥିତି ଦେଖା ଦେଇଛି । ଏ ସମ୍ପର୍କରେ ବିମାନ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରି ନାହିଁ ।
