ନୂଆଦିଲ୍ଲୀ: ଦିଲ୍ଲୀ ନିର୍ବାଚନ ପାଇଁ ଅଧାରେ ଅଟକିବ ନାମାଙ୍କନ ଦାଖଲ । ଶୁକ୍ରବାର ଠାରୁ ଆରମ୍ଭ ହୋଇଛି ଏହି ପ୍ରକି୍ରୟା । କିନ୍ତୁ ଛୁଟି ଦିନ ଥିବାରୁ ଏହି ପ୍ରକି୍ରୟାରେ ଲାଗିବ ରୋକ । ଦିଲ୍ଲୀର ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ୟ୍ୟାଳୟର ଜଣେ ଅଧିକାରୀଙ୍କ ଅନୁଯାୟୀ, ଶନିବାର ଏବଂ ରବିବାର ଛୁଟି ଥିବାରୁ ନାମାଙ୍କନ ପ୍ରକ୍ରିୟା ବନ୍ଦ ରହିବ। ଏହି ଦିନ ପ୍ରାର୍ଥୀମାନେ ନାମାଙ୍କନ ପତ୍ର କିଣିପାରିବେ ନାହିଁ କିମ୍ବା ଦାଖଲ କରିପାରିବେ ନାହିଁ। ଏହା ପରେ, ପ୍ରାର୍ଥୀମାନେ ସୋମବାରରୁ ଶୁକ୍ରବାର ପର୍ୟ୍ୟନ୍ତ ସେମାନଙ୍କର ନାମାଙ୍କନ ପୂରଣ ଏବଂ ଦାଖଲ କରିପାରିବେ।
ଦିଲ୍ଲୀର ସମସ୍ତ ୭୦ଟି ଆସନ ପାଇଁ ସକାଳ ୧୧ଟାରୁ ନାମାଙ୍କନ ପ୍ରକ୍ରିୟା ଆରମ୍ଭ ହୋଇଛି। ପ୍ରାର୍ଥୀମାନେ ଅପରାହ୍ନ ୩ଟା ପର୍ୟ୍ୟନ୍ତ ନାମାଙ୍କନ ଦାଖଲ କରିପାରିବେ। ପ୍ରାର୍ଥୀମାନେ ସେମାନଙ୍କ ନିଜ ନିଜ ବିଧାନସଭା ନିର୍ବାଚନମଣ୍ଡଳୀରେ ନାମାଙ୍କନ ଦାଖଲ କରିବେ। ଏଥିପାଇଁ, ସେମାନଙ୍କୁ ଆରଓ (ରିଟର୍ଣ୍ଣିଂ ଅଫିସର)ଙ୍କ କାର୍ୟ୍ୟାଳୟରେ ସେମାନଙ୍କର ପୂରଣ ହୋଇଥିବା ନାମାଙ୍କନ ଫର୍ମ ଦାଖଲ କରିବାକୁ ପଡିବ।
ନିର୍ବାଚନ କମିଶନ ଦିଲ୍ଲୀର ସମସ୍ତ ୭୦ ବିଧାନସଭା ଆସନ ପାଇଁ ୭୦ ଜଣ ଆରଓ ନିଯୁକ୍ତ କରିଛନ୍ତି। ଏହା ସହିତ, ପ୍ରାର୍ଥୀମାନେ ରାଜଧାନୀର ସମସ୍ତ ୧୧ଟି ଜିଲା ନିର୍ବାଚନ କାର୍ୟ୍ୟାଳୟରେ ଥିବା ସମ୍ପୃକ୍ତ ବିଧାନସଭା ନିର୍ବାଚନମଣ୍ଡଳୀର ଆରଓ କାର୍ୟ୍ୟାଳୟରେ ସେମାନଙ୍କର ନାମାଙ୍କନ ଦାଖଲ କରିପାରିବେ।
