ବାଲେଶ୍ୱର ୨୧/ଜୁଲାଇ : ବାଲେଶ୍ୱରର ଫକୀରମୋହନ କଲେଜର ଛାତ୍ରୀ ସୌମ୍ୟଶ୍ରୀ ବିଶିଙ୍କ ଆତ୍ମହତ୍ୟା ଘଟଣାର ତଦନ୍ତ ଚାଲିଛି ଏବଂ ଏହାର ନୂତନ ତଥ୍ୟ ଲୋକଙ୍କ ମଧ୍ୟରେ ଚିନ୍ତା ଏବଂ ଅସନ୍ତୋଷ ସୃଷ୍ଟି କରୁଛି। ଆଜି କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ର ଏବଂ ଡିଆଜି ଡକ୍ଟର ସତ୍ୟଜିତ ନାୟକ ଘଟଣାସ୍ଥଳ ଏବଂ କଲେଜ କ୍ୟାମ୍ପସ ପରିଦର୍ଶନ କରି ଘଟଣାର ତଦନ୍ତର ସ୍ଥିତି ଆକଳନ କରିଛନ୍ତି। ଏହି ସମୟରେ, ଆଇସିସି କମିଟି ଦ୍ୱାରା ପ୍ରସ୍ତୁତ ରିପୋର୍ଟ ଆଶ୍ଚର୍ଯ୍ୟଜନକ ଭାବରେ ପୀଡିତାଙ୍କ ଅଭିଯୋଗକୁ ଖଣ୍ଡନ କରିଛି ଏବଂ ଅଭିଯୁକ୍ତ ସମୀର ସାହୁଙ୍କୁ କ୍ଲିନ୍ ଚିଟ୍ ଦେଇଛି। ଏହି ପ୍ରକାଶ ପାଇଥିବା ତଥ୍ୟ ଅନେକ ପ୍ରଶ୍ନ ଉଠାଇଛି, ଯଦି ମୃତକ ଅଭିଯୋଗ କରିଥାନ୍ତେ, ତେବେ ରିପୋର୍ଟ ତାଙ୍କ ସପକ୍ଷରେ ଏତେ ଏକପାଖିଆ କିପରି ହୋଇପାରିବ? ଆଇସିସି ରିପୋର୍ଟ ଅନୁଯାୟୀ, ପୀଡ଼ିତାଙ୍କୁ ଫେଭର ମାଗିବା କଥା, କୌଣସି ବୟାନ ବା ଦୃଷ୍ଟିକୋଣରୁ ସାବ୍ୟସ୍ତ ହୋଇନାହିଁ। ଏହି ଘଟଣା ପରେ ମଧ୍ୟ ପୀଡ଼ିତା ସମୀର ସାରଙ୍କ ପାଖକୁ ନୋଟ ଆଣିବାକୁ ଯାଇଛନ୍ତି ଓ ଆଦୌ ଅସୁରକ୍ଷିତ ମନେ କରିନାହାଁନ୍ତି । ମେସରେ ଥିବା ବେଳେ ରାତି ୧୦ରେ କାହା ସହ କଥା ହୋଇ ଜୋରରେ କାନ୍ଦନ୍ତି ଓ ଅନ୍ୟ ଅନ୍ତେବାସୀଙ୍କୁ ଅସୁବିଧାରେ ପକାନ୍ତି । ସେ ଦିନ ୨ଟା ବେଳେ ବିଛଣାରୁ ଉଠନ୍ତି, ତେଣୁ କ୍ଲାସ କରିପାରନ୍ତି ନାହିଁ । ବିଭାଗୀୟ ମୁଖ୍ୟଙ୍କୁ ଦରଖାସ୍ତ ନଦେଇ କ୍ଲାସରୁ ଅନୁପସ୍ଥିତ ରୁହନ୍ତି, ତେଣୁ ଉପସ୍ଥାନ କମ ରୁହେ। ଏହି ରିପୋର୍ଟ ସମାଜରେ ସନ୍ଦେହ ସୃଷ୍ଟି କରିଛି, ମୃତ ଛାତ୍ରୀଙ୍କୁ ଭୁଲ ଭାବରେ ଦୋଷ ଦେବାକୁ ଚେଷ୍ଟା କରାଯାଉଛି। ସାଧାରଣ ଲୋକ ଏହି ଘଟଣାର ନିରପେକ୍ଷ ତଦନ୍ତ ଦାବି କରୁଛନ୍ତି।
