ଜଗତସିଂହପୁର ୨୬/ଜୁଲାଇ : ଜଗତସିଂହପୁର ଜିଲ୍ଲାରେ ଆଇନ ଶୃଙ୍ଖଳାର ଅବନତି ଓ ମହିଳାଙ୍କ ବିରୋଧରେ ଅପରାଧ ବୃଦ୍ଧି ପାଇଁ ବିଜେଡି ତୀବ୍ର ଚିନ୍ତା ବ୍ୟକ୍ତ କରିଛି। ପୂର୍ବତନ ସାଂସଦ ରାଜଶ୍ରୀ ମଲ୍ଲିକଙ୍କ ନେତୃତ୍ୱରେ ଏକ ବିଜେଡି ପ୍ରତିନିଧି ଦଳ ଜଗତସିଂହପୁର ଏସ୍ପିଙ୍କୁ ଭେଟି ଏହି ମାମଲା ଉପରେ ଗମ୍ଭୀର ଚିନ୍ତା ବ୍ୟକ୍ତ କରିଛନ୍ତି। ସେ ଉଲ୍ଲେଖ କରିଛନ୍ତି ଯେ, ଏହି ଜିଲ୍ଲାରେ ଏକ ଦୁଃଖଦ ଘଟଣା ଘଟିଛି ଯେଉଁଠି ଜଣେ ନାବାଳିକା ଝିଅକୁ ବଳାତ୍କାର କରାଯାଇଛି ଓ ଏବେ ସେ ଛଅ ମାସରୁ ଅଧିକ ଗର୍ଭବତୀ ଅଛି। ଏହି ଘଟଣା ସମାଜ ଓ ପ୍ରଶାସନ ପାଇଁ ଏକ ଚେତାବନୀ ସୂଚକ। ବଳାତ୍କାର ଘଟଣାର ପୀଡିତା ବର୍ତ୍ତମାନ ହସ୍ପିଟାଲରେ ଚିକିତ୍ସାଧୀନ ଅଛନ୍ତି ଓ ତାଙ୍କର ଅବସ୍ଥା ଅତ୍ୟନ୍ତ ସଙ୍କଟପୂର୍ଣ୍ଣ ଅଟେ। ରାଜଶ୍ରୀ ମଲ୍ଲିକ କହିଛନ୍ତି ଯେ, “ଆମେ ୨୪ ବର୍ଷ ଧରି ଶାସନରେ ଥିଲୁ, କିନ୍ତୁ ଏପରି ଦୁଃଖଦ ଘଟଣା ପୂର୍ବରୁ କେବେ ଦେଖିନାଥିଲୁ।” ସେ ପ୍ରଶାସନକୁ ଦୋଷୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ଓ ନାବାଳିକାଙ୍କୁ ନ୍ୟାୟ ଦେବା ପାଇଁ ଆବଶ୍ୟକ ପଦକ୍ଷେପ ନେବା ଆହ୍ୱାନ ଜଣାଇଛନ୍ତି।
