ବାଲେଶ୍ବର ୪/ଅଗଷ୍ଟ : ବାଲେଶ୍ବର ଫକୀର ମୋହନ ସ୍ବୟଂଶାସିତ ମହାବିଦ୍ୟାଳୟର ଏକ ଦୁଃଖଦ ଘଟଣା ଦେଶର ଶିକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି। ଶିକ୍ଷା ବିଭାଗର ମୁଖ୍ୟ ସମୀର କୁମାର ସାହୁଙ୍କ ଉପରେ ଯୌନ ନିର୍ଯାତନା ଅଭିଯୋଗ ଆଣିଥିବା ଜଣେ ଛାତ୍ରୀ ନିଜ ଦେହରେ ପେଟ୍ରୋଲ ଢାଳି ଆତ୍ମାହୁତି ଉଦ୍ୟମ କରିଥିଲେ। ଏହି ସମୟରେ ଜ୍ୟୋତି ପ୍ରକାଶ ବିଶ୍ୱାଳ ତାଙ୍କୁ ଉଦ୍ଧାର କରିଥିଲେ, ଯାହାରେ ସେ ମଧ୍ୟ ଜଳିଯାଇ ଚିକିତ୍ସାଧୀନ ଥିଲେ। ଏହି ଘଟଣା ପରେ ଶିକ୍ଷକ ସମୀର ସାହୁ ଓ ଛାତ୍ରୀଙ୍କ ପିତାଙ୍କୁ ଆଗରୁ ଗିରଫ କରାଯାଇଥିଲା। ସମ୍ପ୍ରତି କ୍ରାଇମ ବ୍ରାଞ୍ଚ ଦ୍ୱାରା ଜ୍ୟୋତି ପ୍ରକାଶ ବିଶ୍ୱାଳ ଓ ଶୁଭ୍ର ସମ୍ବିତ ନାୟକଙ୍କୁ ଗିରଫ କରାଯାଇଛି, ଯେଉଁଥିରେ ଜଣେ ଛାତ୍ର ଓ ଜଣେ ଅଣଛାତ୍ର ଅଛନ୍ତି। ଦୁଇଜଣଙ୍କୁ କୋର୍ଟ ଚାଲାଣ କରି ୧୫ ଦିନିଆ ବିଚାର ବିଭାଗୀୟ ହାଜତକୁ ପଠାଯାଇଛି। ଏହି ନୂଆ ଗିରଫ ସହିତ ମୋଟ ଗିରଫଦାରୀ ସଂଖ୍ୟା ୪ ଜଣକୁ ଛୁଇଁଛି। ଏହି ଘଟଣା ନୈତିକ ମୂଲ୍ୟ ବିହୀନ ଶିକ୍ଷା ବ୍ୟବସ୍ଥା ଓ ଛାତ୍ରଛାତ୍ରୀଙ୍କ ସୁରକ୍ଷା ନେଇ ଗଭୀର ଚିନ୍ତା ଜନ୍ମ ଦେଇଛି।
