ଭୁବନେଶ୍ଵର: ପ୍ରଦୂଷଣ ରୋକିବା ପାଇଁ ମୋହନ ସରକାର ଆରମ୍ଭ କରିଛନ୍ତି ପ୍ରସ୍ତୁତି l ଏନେଇ ରାଜସ୍ବ ମନ୍ତ୍ରୀ ସୁରେଶ ପୂଜାରୀଙ୍କ ଅଧ୍ୟକ୍ଷତାରେ ଉତ୍ତରାଞ୍ଚଳ ଆରଡିସିଙ୍କ କାର୍ଯ୍ୟାଳୟରେ ବୈଠକ ଅନୁଷ୍ଠିତ ହୋଇଛି । ମାସେ ମଧ୍ୟରେ ବ୍ଲୁପ୍ରିଣ୍ଟ ପ୍ରସ୍ତୁତ କରିବା ନେଇ ଆଲୋଚନା ହୋଇଥିବାବେଳେ ଏହାକୁ ନେଇ ଜୋର ଧରିଛି ରାଜନୀତି । କମ୍ପାନିଗୁଡିକ ମନ ଇଚ୍ଛା ପାଉଁଶ ଡମ୍ପିଂ କରିବାକୁ ନେଇ ମୋହନ ସରକାର ଆଣୁଛନ୍ତି ପ୍ରଦୂଷଣ ନିରୋଧ ନିୟମ ।
ଏଥିରେ ସମ୍ବଲପୁର, ସୁନ୍ଦରଗଡ, ଝାରସୁଗୁଡା ଓ ଅନୁଗୁଳ ଜିଲ୍ଲାର ଜିଲ୍ଲାପାଳ ଓ ଏସପି ତଥା ତହସିଲଦାର ମଧ୍ୟ ଉପସ୍ଥିତ ଥିଲେ । ଏହା ସହ ୪ଟି ଜିଲ୍ଲାର ନିର୍ବାଚିତ ପ୍ରତିନିଧି ଭାବେ ପଞ୍ଚାୟତିରାଜ ମନ୍ତ୍ରୀ ଓ ବିଧାୟକମାନେ ଉପସ୍ଥିତ ଥିଲେ । ଏହି ବୈଠକରେ ରାଜ୍ୟ ପ୍ରଦୂଷଣ ବିଭାଗର ଅଧିକାରୀ, ଜିଲ୍ଲାସ୍ତରର ରିଜିଓନାଲ ଅଫିସରମାନେ ଭର୍ଚୁଆଲ ମାଧ୍ୟମରେ ଯୋଡ଼ି ହୋଇଥିଲେ । ଏଥିପାଇଁ ସମସ୍ତ ତଥ୍ୟ ପରେ ଆଇଆଇଏମ, ଭିସୁଟ ତଥା ଅନ୍ୟ ବିଶେଷଜ୍ଞମାନଙ୍କ ପରାମର୍ଶ ନିଆଯିବ । ଫ୍ଲାଏ ଆସ୍ ପରିଚାଳନା ନେଇ ପରିତ୍ୟକ୍ତ ଖଣି ବ୍ୟବହାର ହେବ । ଏହି କାର୍ଯ୍ୟକ୍ରମ ଆରମ୍ଭ ହେବା ଗୋଟେ ମାସ ପରେ ପୁଣି ଭୁବନେଶ୍ବରରେ ବୈଠକ ହେବ ।
ଆସ୍ ଡମ୍ପିଂରେ ପ୍ରଦୂଷଣ ବିଭାଗ ଅଧିକାରୀଙ୍କର ଜିଲ୍ଲାପାଳ ଓ ଏସପିଙ୍କ ସହ ସମନ୍ବୟ ରହୁନଥିବାରୁ ଏହାକୁ ସିସିଟିଭି ଯାଞ୍ଚ କରାଯିବ ବୋଲି ରାଜସ୍ବ ମନ୍ତ୍ରୀ କହିଛନ୍ତି । ଅନ୍ୟପଟେ ସୂଚନା ଅନୁଯାୟୀ ଆସ୍ ଡମ୍ପିଂକୁ ନେଇ ବିଜେପିକୁ ଟାର୍ଗେଟ କରିଛି ବିଜେଡି । ଆରଡିସି ଚିଠି ଓ ମନ୍ତ୍ରୀଙ୍କ ବିଭାଗୀୟ ଚିଠିରେ ମନ୍ତ୍ରୀ ଜିଲ୍ଲା ସ୍ତରରେ ବୈଠକ କରୁଛନ୍ତି । ହେଲେ ଏହା କେଉଁ ବିଭାଗର କାମ ବୋଲି ବିଜେଡି ପ୍ରଶ୍ନ କରିଛି। ସମ୍ବଲପୁର, ଝାରସୁଗୁଡ଼ା ଓ ସୁନ୍ଦରଗଡ ଜିଲ୍ଲାର ଅଧିକାରୀଙ୍କ ସହିତ ବୈଠକ କରିବା ଏହା ପରିଧି ଭିତରେ ନୁଁହେଁ ବୋଲି ବିଜେଡି କହିଛି । ସେପଟେ ରାଜସ୍ବ ମନ୍ତ୍ରୀ ସୁରେଶ ପୂଜାରୀ ଏହାକୁ ଐତିହାସିକ ବୈଠକ ବୋଲି କହିଛନ୍ତି ।
