ନୂଆଦିଲ୍ଲୀ: ପ୍ରଥମେ କହିଥିଲେ ନା । ପରେ ହଁ କରି ସମର୍ଥନ କଲେ । ଆଗରୁ କରୁଥିଲେ ବିରୋଧ । କିନ୍ତୁ ଠିକ ସମୟରେ ସପକ୍ଷରେ ଦେଲେ ମତ । ଆମେ କହୁଛୁ ବିଜେଡି ସାଂସଦ ଡକ୍ଟର ସସ୍ମିତ ପାତ୍ରଙ୍କ କଥା । ପ୍ରଥମେ ୱାକଫ୍ ବିଲକୁ ତାଙ୍କ ଦଳ ବିରୋଧ କରିବ ବୋଲି କହିଥିଲେ ଏହି ବିଜେଡି ନେତା । ଏହାପରେ ନିଜେ ଟ୍ୱିଟ କରି କହିଥିଲେ ଯେ ସାଂସଦ ମାନଙ୍କ ଉପରେ କୌଣସି ହ୍ୱିପ ଜାରି କରାଯାଇନି । ଯେଉଁଥିପାଇଁ ସାଂସଦ ମାନେ ନିଜ ବିବେକ ଅନୁସାରେ ଭୋଟ୍ ଦେବେ । ଆଉ ଏବେ ସତକୁ ସତ ଏହି ବିଲ ସମର୍ଥନରେ ଭୋଟ ଦେଇଛନ୍ତି ସସ୍ମିତ ପାତ୍ର ।
ତେବେ ଗତକାଲି ରାଜ୍ୟସଭାରେ ଆଗତ ହୋଇଥିଲା ୱାକଫ୍ ବିଲ । ଆଲୋଚନା ବେଳେ ସଂସଦ ମୁନା ଖାଁ ” ବିଲ୍କୁ ଆମେ ବିରୋଧ କରିବୁ । ଏନେଇ ଦଳରେ କୌଣସି ଦ୍ବନ୍ଦ୍ବ ନାହିଁ । ଆମେ ସବୁ ଏକଜୁଟ୍ ଅଛୁ ଏଣୁ ହ୍ୱିପ୍ର ଆବଶ୍ୟକତା ନାହିଁ । ଶତ ପ୍ରତିଶତ ବିଲ୍ ବିରୋଧରେ ଭୋଟ୍ ଦେବୁ । କିନ୍ତୁ ତାଙ୍କରି ଦଳର ଆଉ ଜଣେ ସାଂସଦ ଏହି ବିଲ୍ ସପକ୍ଷରେ ଭୋଟ୍ ଦେବା, ଓଡ଼ିଶା ରାଜନୀତିକୁ ସରଗରମ କରିଛି । କାହିଁକି ନା, ଗୋଟିଏ ପଟେ ବିଜେଡିର ଜଣେ ସାଂସଦ ବିଲକୁ ବିରୋଧ କରୁଥିବାବେଳେ, ଆଉ ଜଣେ ସାଂସଦ କିନ୍ତୁ ଏହାକୁ ସମର୍ଥନ କରିଛନ୍ତି । ତେଣୁ ସସ୍ମିତଙ୍କ ଭୋଟ ପରେ ୱାକଫ ସଂଶୋଧନ ବିଲକୁ ନେଇ ବିଜେଡିରେ ଭିନ୍ନ ମତ ଦେଖିବାକୁ ମିଳିଛି ।
ତେବେ ବିଜେଡିର ଅନ୍ୟ ୬ ସାଂସଦ ବିଲ୍ ସପକ୍ଷରେ ନା ବିପକ୍ଷରେ ଭୋଟ୍ ଦେଲେ ତାହା ଅସ୍ପଷ୍ଟ ରହିଛି । ଏନେଇ ଦଳର ଆଭିମୁଖ୍ୟ ମଧ୍ୟ ସ୍ପଷ୍ଟ ହୋଇପାରିନି । ସେପଟେ ଗତକାଲି ରାତିରେ ରାଜ୍ୟସଭାରେ ପାସ୍ ହୋଇଯାଇଛି ଏହି ୱାକଫ୍ ବିଲ । ୧୨ ଘଣ୍ଟାର ଆଲୋଚନା ପରେ ସରକାର ଏହାକୁ ପାରିତ କରିବାରେ ସଫଳ ହୋଇଛନ୍ତି ।
