କଟକ: ବିଜେଡି ଛାଡିଲେ ପ୍ରକାଶ ବେହେରା । ଦଳର ସଭାପତି ନବୀନ ପଟ୍ଟନାୟକଙ୍କ ପାଖକୁ ସେ ତାଙ୍କର ଇସ୍ତଫା ପଠାଇଛନ୍ତି । ସେ ଲେଖିଛନ୍ତି – ବହୁ ଚିନ୍ତନ ପରେ ମୁଁ ବିଜୁ ଜନତା ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଉଛି । ମତେ ବାରବାଟୀ-କଟକ ଭଳି ସମ୍ମାନଜନକ ଆସନରୁ ପ୍ରାର୍ଥୀ କରିଥିବାରୁ ମୁଁ ଆପଣଙ୍କୁ ଏବଂ ଆପଣଙ୍କ ନେତୃତ୍ୱକୁ କୃତଜ୍ଞତା ଜଣାଉଛି ।
ଯେହେତୁ ମୁଁ ଜଣେ ରାଷ୍ଟ୍ରୀୟ ଚିନ୍ତାଧାରାରେ ବିଶ୍ୱାସ ରଖୁଥିବା ଓ ଜନ ସାଧାରଣଙ୍କ ସମସ୍ୟା ,ବିକାଶ ଓ ସଙ୍ଗଠନ ସହ ଯୋଡି ହୋଇ ରହୁଥିବା ବ୍ୟକ୍ତିତ୍ୱ ତେଣୁ ଏଭଳି ନିଷ୍ପତ୍ତି ନେବାକୁ ଉଚିତ ମନେକଲି । ଏହାସହିତ ବାରବାଟୀ-କଟକ ଏବଂ ଟାଙ୍ଗୀ-ସାଲେପୁରର ଜନ ସାଧାରଣଙ୍କୁ କୃତଜ୍ଞତା ଜଣାଇଛନ୍ତି ପ୍ରକାଶ । ୨୦୧୪ରେ ସେ କଂଗ୍ରେସ ଟିକେଟରୁ ସାଲେପୁର ବିଧାୟକ ହୋଇଥିଲେ ।
ପରବର୍ତ୍ତୀ ସମୟରେ ୨୦୧୯ରେ ବିଜେପିରେ ଯୋଗଦେଇ ପ୍ରାର୍ଥୀ ହୋଇଥିଲେ ମଧ୍ୟ ପରାସ୍ତ ହୋଇଥିଲେ ପ୍ରକାଶ । କିନ୍ତୁ ବିଜେପିରେ ୫ ବର୍ଷ ରହିବା ପରେ ସେ ଛାଡିଥିଲେ ଦଳ । ୨୦୨୪ ନିର୍ବାଚନ ସମୟରେ ବିଜେଡିରେ ମିଶି ବାରବାଟୀରୁ ପ୍ରାର୍ଥୀ ହୋଇଥିଲେ ବି ତୃତୀୟ ସ୍ଥାନରେ ରହିଥିଲେ ।
