ବ୍ରହ୍ମପୁର() ପଞ୍ଚାୟତ ନିର୍ବାଚନ ପରେ ଏବେ ପୌର ନିର୍ବାଚନ। ଗଞାମ ଜିଲ୍ଲା ରେ ୧୬ ଏନ୍.ଏ.ସି, ଗୋଟିଏ ପୌର ପରିଷଦ ଏବଂ ଗୋଟିଏ ମହାନଗର ନିଗମ ପାଇଁ ନିର୍ବାଚନ ପ୍ରକ୍ରିୟା ଆଜି ଠାରୁ ଆରମ୍ଭ ହୋଇଛି । ପୌର ନିର୍ବାଚନକୁ ନେଇ ଆରମ୍ଭ ହୋଇଯାଇଛି ଟକରା ଟକରି।
ପ୍ରଥମ ଥର ଏହି ମହାନଗର ନିଗମ ପାଇଁ ପ୍ରତ୍ଯକ୍ଷ ଭାବେ ମେୟର ନିର୍ବାଚନ ଅନୁଷ୍ଠିତ ହେବ । ଏଥିପାଇଁ ଆରମ୍ଭ ହୋଇଛି ନିର୍ବାଚନ ପ୍ରକ୍ରିୟା । ଚଳିତ ମାସ ୨ ତାରିଖ ଠାରୁ ୭ ତାରିଖ ପର୍ଯ୍ୟନ୍ତ ନାମାଙ୍କନ ପତ୍ର ଦାଖଲ କରିବା ସମୟ ଧାର୍ଯ୍ଯ ହୋଇଥିବା ବେଳେ ୧୪ ତାରିଖରେ ପ୍ରାର୍ଥୀପତ୍ର ପ୍ରତ୍ଯାହାର କରିବା ସମୟ ଧାର୍ଯ୍ଯ କରାଯାଇଛି । ସକାଳ ୧୧ ଟା ଠାରୁ ଅପରାହ୍ଣ ୩ ଟା ପର୍ଯ୍ୟନ୍ତ ନାମାଙ୍କନ ପତ୍ର ଦାଖଲ କରିବା ସମୟ ଧାର୍ଯ୍ଯ କରାଯାଇଛି ବୋଲି ବ୍ରହ୍ମପୁର ଉପଜିଲ୍ଲାପାଳ ଭି କୀର୍ତ୍ତିଭାସନ କହିଛନ୍ତି । ଉପଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ସମସ୍ତ ପ୍ରକାର ସୁବ୍ଯବସ୍ତା କରାଯାଇଥିବା ଉପଜିଲ୍ଲାପାଳ କହିଛନ୍ତି । ପ୍ରଥମ ଦିନରେ ନାମାଙ୍କନ ପତ୍ର ଦାଖଲ କରିବା ପାଇଁ ୬୦ ଜଣ ଫର୍ମ ନେଇଥିବା ବେଳେ ୫୮ ଜଣ କୋର୍ପୋରେଟର ଏବଂ ଦୁଇ ଜଣ ମେୟର୍ ପଦ ପାଇଁ ନେଇଥିବା ଜଣାପଡିଛି ।
୧୯୭୯ ଏବଂ ୧୯୯୨ ମସିହାରେ ଦୁଇଥର ବ୍ରହ୍ମପୁର ପୌର ପରିଷଦ ପାଇଁ ପ୍ରତ୍ଯକ୍ଷ ଭାବେ ଅଧ୍ଯକ୍ଷ ନିର୍ବାଚନ ଅନୁଷ୍ଠିତ ହୋଇଥିବା ନଜିର ରହିଛି । ୧୯୯୨ ମସିହା ପରେ ପ୍ରଥମ ଥର ପାଇଁ ମହାନଗର ନିଗମ ପାଇଁ ପ୍ରତ୍ଯକ୍ଷ ମେୟର ନିର୍ବାଚନ ଅନୁଷ୍ଠିତ ହେବ । ନିର୍ବାଚନ ପ୍ରକ୍ରିୟା ଆରମ୍ଭ ହେବା ମାତ୍ରେ ମେୟର ପଦବୀକୁ ନେଇ ଦୁଇ ଦଳ ମଧ୍ୟରେ ଆରମ୍ଭ ହୋଇଯାଇଛି ଅଙ୍କ କଷା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବଚ୍ଛ ନିର୍ମଳ ଶାସନ ଓ ଲୋକ ପ୍ରିୟତା ଯୋଗୁଁ ବିଜେଡି ନିଶ୍ଚିତ ଭାବେ ସଫଳତା ହାସଲ କରିବ ବୋଲି ବିଜେଡି କହିଛି । ମେୟର୍ ନିର୍ବାଚନରେ ବିଜେଡି ଆଶାତୀତ ସଫଳତା ପାଇବ ବୋଲି ବିଜେଡି କହିଛି । ସେପଟେ ସହରର ଶିକ୍ଷିତ ଭୋଟ ସାଙ୍ଗକୁ ଅନ୍ଯ ଭୋଟ ମଧ୍ୟ ବିଜେପି ହାତେଇ ସଫଳତା ଲାଭ କରିବ ବୋଲି ବିଜେପି କହିଛି
