କଲମ୍ବୋ() ଶ୍ରୀଲଙ୍କାର ରାଷ୍ଟ୍ରପତି ଗୋଟାବାୟା ରାଜପକ୍ଷେ ମଙ୍ଗଳବାର ବିଳମ୍ବିତ ରାତିରେ ଦେଶରୁ ଜରୁରୀ ପରିସ୍ଥିତିକୁ ହଟାଇ ଦେଇଛନ୍ତି। ଦେଶରେ ବଢ଼ୁଥିବା ସଙ୍କଟ ମଧ୍ୟରେ ଏପ୍ରିଲ ୧ରେ ଜରୁରୀକାଳୀନ ପରିସ୍ଥିତି ଲାଗୁ କରାଯାଇଥିଲା। ମଙ୍ଗଳବାର ବିଳମ୍ବିତ ରାତିରେ ଜାରି ହୋଇଥିବା ଗେଜେଟ୍ ନୋଟିଫିକେସନ୍ ନମ୍ବର ୨୨୭୪/୧୦ ରେ ରାଷ୍ଟ୍ରପତି କହିଛନ୍ତି ଯେ ଦେଶରେ କୌଣସି ବିଶୃଙ୍ଖଳାକୁ ରୋକିବା ପାଇଁ ସୁରକ୍ଷା ବାହିନୀକୁ ବ୍ୟାପକ କ୍ଷମତା ଦେଇଥିବା ଜରୁରୀକାଳୀନ ନିୟମାବଳୀକୁ ସେ ପ୍ରତ୍ୟାହାର କରି ନେଇଛନ୍ତି।
ଏହାପୂର୍ବରୁ ରାଷ୍ଟ୍ରପତି ଗୋଟାବାୟା ରାଜପକ୍ଷେ ନେତୃତ୍ୱରେ ଶ୍ରୀଲଙ୍କାର ଶାସକ ଦଳ ମଙ୍ଗଳବାର ଦିନ ନୂତନ ଭାବେ ନିଯୁକ୍ତ ଅର୍ଥମନ୍ତ୍ରୀ ଅଲି ସାବ୍ରି ଇସ୍ତଫା ଦେଇଥିବା ବେଳେ ରାଜପକ୍ଷେ ସରକାରଙ୍କ ସଙ୍କଟ ଆହୁରି ଘନେଇଥିଲା। ତାଙ୍କ ବ୍ୟତୀତ ୪୦ ସାଂସଦ ମଧ୍ୟ ଶାସକ ଦଳ ଛାଡିଛନ୍ତି। ଅନ୍ୟପକ୍ଷରେ, ଦେଶର ସବୁଠାରୁ ଖରାପ ଅର୍ଥନୈତିକ ସଙ୍କଟ ସମୟରେ ଦେଶବ୍ୟାପୀ ଗୋଟାବାୟା ସରକାର ବିରୋଧରେ ବିକ୍ଷୋଭ ପ୍ରଦର୍ଶନ ଜାରି ରହିଛି।
୨୦୨୦ ସାଧାରଣ ନିର୍ବାଚନରେ ଶାସକ ମିଳିତ ମଞ୍ଚ ୧୫୦ଟି ସିଟ୍ ଜିତିଥିଲା ଏବଂ ବିରୋଧୀଦଳର ସଦସ୍ୟମାନେ ଦଳ ବଦଳାଇବାରୁ ଶାସକ ଦଳର ଶକ୍ତି ଆହୁରି ବୃଦ୍ଧି ପାଇଥିଲା। ତେବେ ଏହି ସାଂସଦମାନଙ୍କ ମଧ୍ୟରୁ ୪୧ ଜଣ ସମର୍ଥନ ପ୍ରତ୍ୟାହାର କରିନେଇଛନ୍ତି। ଫଳରେ ରାଜପକ୍ଷେ ସରକାର ବହୁମତ ହରାଇଛନ୍ତି । ରାଜପକ୍ଷେ କ୍ୟାମ୍ପରେ ସାଂସଦଙ୍କ ସଂଖ୍ୟା ମ୍ୟାଜିକ ନମ୍ବର ୧୧୩ ରୁ ବି କମ୍ ହୋଇଯାଇଛି, ଯାହାକି ୨୨୫ ସଦସ୍ୟ ବିଶିଷ୍ଟ ଗୃହରେ ସଂଖ୍ୟାଗରିଷ୍ଠତା ପାଇଁ ଆବଶ୍ୟକ। ତେବେ ତାଙ୍କ ପାଖରେ ସାଧାରଣ ବହୁମତ ଥିବା ସରକାର ଦାବି କରିଛନ୍ତି।
ଶ୍ରୀଲଙ୍କା ନିଜ ଇତିହାସର ସବୁଠାରୁ ଗମ୍ଭୀର ଅର୍ଥନୈତିକ ସଙ୍କଟ ଦେଇ ଗତି କରୁଛି। ଇନ୍ଧନ ପାଇଁ ଲମ୍ବା ଲାଇନ, ରନ୍ଧନ ଗ୍ୟାସ, ଅତ୍ୟାବଶ୍ୟକ ଦ୍ରବ୍ୟର ଅଭାବ ଏବଂ ଘଣ୍ଟା ଘଣ୍ଟା ବିଦ୍ୟୁତ କାଟ ଯୋଗୁଁ ଲୋକମାନେ ମାସ ମାସ ଧରି ଅସୁବିଧାର ସମ୍ମୁଖୀନ ହେଉଛନ୍ତି |
