ଓଡ଼ିଶା
ମାତିଛନ୍ତି ଚାଇନିଜ୍ ଠକ, ଲୋନ୍ ଆପ୍ରେ ଲୁଟ; ମାଷ୍ଟରମାଇଣ୍ଡଙ୍କ ସମେତ ୩ ଜଣଙ୍କ ବିରୋଧରେ ଲୁକ୍ ଆଉଟ୍ ସର୍କୁଲାର ଜାରି
ଭୁବନେଶ୍ୱର: ଆପଣ ଲୋନ୍ ଆପ୍ ଜରିଆରେ ଋଣ ଆବେଦନ କରୁଛନ୍ତି କି? ହୁସିଆର୍ ହୋଇଯାଆନ୍ତୁ। କାରଣ ମାତିଛନ୍ତି ଚାଇନିଜ୍ ଠକ୍। ଚୀନ୍ରେ ବସି ଓଡ଼ିଶାରେ ଚଳାଉଛନ୍ତି ଲୋନ୍ ଆପ୍। ଆଉ ସେହି ଆପ୍ ମାଧ୍ୟମରେ ନୀରିହ ଓଡ଼ିଆଙ୍କୁ ଜାଲରେ ଫସାଇ ଅର୍ଥ ଲୁଟ୍ କରିବା ସହିତ ନାନା ନିର୍ଯାତନା ଦେଉଛନ୍ତି। ଏହି ମାମଲାରେ କ୍ରାଇମବ୍ରାଞ୍ଚ ୫ ଜଣଙ୍କୁ ଗିରଫ କରିଥିବା ବେଳେ ମୁଖ୍ୟ ଅଭିଯୁକ୍ତ ଲିଉ ୟୁ ଜିଏ ଓ ତାଙ୍କ ସହଯୋଗୀଙ୍କୁ ଖୋଜୁଛି। ସେଥିପାଇଁ ସେମାନଙ୍କ ବିରୋଧରେ ଲୁକ୍ ଆଉଟ୍ ସର୍କୁଲାର ଜାରି ହୋଇଛି। ଏ ସମ୍ପର୍କରେ ସୂଚନା ଦେଇଛନ୍ତି କ୍ରାଇମବ୍ରାଞ୍ଚ ଡିଆଇଜି ଜୟନାରାୟଣ ପଙ୍କଜ।
ସେ କହିଛନ୍ତି, ଲୋନ୍ ଆପ୍ ଗୁଡ଼ିକ ଚିନ୍ରେ ପରିଚାଳିତ ହେଉଥିଲା। ଟାର୍ଗେଟରେ ଥିଲେ ମଧ୍ୟବିତ୍ତ ପରିବାର। ବିଭିନ୍ନ ସୋଶାଲ୍ ମିଡିଆ ମାଧ୍ୟମରେ ଋଣ ନେବା ପାଇଁ ଅଫର ଦିଆଯାଉଥିଲା। ଲୋକମାନେ କିଛି ବୁଝି ନପାରି ସଙ୍ଗେ ସଙ୍ଗେ ଋଣ ପାଇବା ପାଇଁ ଆବେଦନ କରୁଥିଲେ। ଋଣ ଆବେଦନର କିଛି ସମୟ ମଧ୍ୟରେ ୨୦୦୦ରୁ ୧୦,୦୦୦ ପର୍ଯ୍ୟନ୍ତ ଟଙ୍କା ମିଳୁଥିଲା। ଏହାର ସୁଯୋଗ ନେଇ ଚୀନ୍ ଠକମାନ ଋଣ ନେଉଥିବା ବ୍ୟକ୍ତିଙ୍କ ମୋବାଇଲ୍ରୁ ସମସ୍ତ ତଥ୍ୟ ନେଇଯାଉଥିଲେ ବୋଲି ଶ୍ରୀ ପଙ୍କଜ କହିଥିଲେ।
ଲିଉ ୟୁ ଜିଏ ଓ ତାଙ୍କ ଦୁଇ ସହଯୋଗୀଙ୍କ ନାଁରେ ଲୁକ୍ ଆଉଟ୍ ସର୍କୁଲାର ଜାରି ହୋଇଛି। କ୍ରାଇମବ୍ରାଞ୍ଚର ଆବେଦନ କ୍ରମେ ବ୍ୟୁରୋ ଅଫ୍ ଇମିଗ୍ରେସନ୍ ବିଭାଗ ଏହି ଲୁକ୍ ଆଉଟ୍ ସର୍କୁଲାର ଜାରି କରିଛି। ଏହି ବେଆଇନ୍ ଲୋନ୍ ଆପ୍ ଦେଢ ଲକ୍ଷରୁ ଅଧିକ ଲୋକ ଡାଉନ୍ଲୋଡ୍ କରିବା ସହିତ ଠକେଇରେ ଶିକାର ହୋଇଛନ୍ତି।
