ଭୁଆଷୁଣି ଡମ୍ପିଂୟାର୍ଡ ବିବାଦ ୨ ରୁ ୩ ଦିନ ମଧ୍ୟରେ ସମାଧାନ ହେବ

ଭୁବନେଶ୍ୱର, ୨୯/୦୮/୨୦୨୨-   ଭୁବନେଶ୍ୱର ଦାରୁଠେଙ୍ଗସ୍ଥିତ ଭୁଆସୁଣି ଡମ୍ପିୟାର୍ଡ ବିବାଦ ଆସନ୍ତା ୨ ରୁ ୩ ଦିନ ମଧ୍ୟରେ ସମାଧାନ ହେବ । ଏଭଳି ଏକ ଆଶ୍ୱାସନା ଦେଇଛନ୍ତି ନଗର ଉନ୍ନୟନ ମନ୍ତ୍ରୀ ଉଷା ଦେବୀ । ମେୟର ଓ କମିଶନରଙ୍କ ମଧ୍ୟରେ ଆଲୋଚନା ଜାରି ରହିଛି । ଗାଁର ସମସ୍ତ ଲୋକଙ୍କୁ ଏନେଇ ବୁଝାଯାଉଛି । ଆଶା ରହିଛି ଏହି ବିବାଦ ଆଗକୁ ବଢିବନି ।

ଏହି ସବୁର ବାୟୋ ମାଇନିଂ ପ୍ଲାଣ୍ଟ ଉପରେ ବିଚାର କରାଯାଉଛି । ସେପଟେ ବିଏମସିର ଏକ ଚିଠି ଦାରୁଠେଙ୍ଗ ସରପଞ୍ଚଙ୍କ ପାଖରେ ପହଞ୍ଚିଛି । ଯାହାକୁ ନେଇ ରବିବାର ଦାରୁଠେଙ୍ଗରେ ଗ୍ରାମସଭା ହୋଇଥିଲା । ଚିଠିରେ କୁହାଯାଇଛି କି ୨୦୦ ଟନ୍ କ୍ଷମତାର ଆବର୍ଜନା ପରିଚାଳନା କରିବା ଭଳି ମାଇକ୍ରୋ କମ୍ପୋଷ୍ଟିଂ ସେଣ୍ଟର ପ୍ରତିଷ୍ଠା ହେବ । ୨୦୨୩ ରୁ ୨୦୨୪ ଜୁଲାଇ ସୁଦ୍ଧା ତିନୋଟି ମାଇକ୍ରୋ କମ୍ପୋଷ୍ଟିଂ ସେଣ୍ଟର ପ୍ରତିଷ୍ଠା କରାଯିବ ।

ସେହିଭଳି ଦୈନିକ ୫୦ ଟନ୍ ଆବର୍ଜନାରୁ ବାୟୋଗ୍ୟାସ୍ ପ୍ରସ୍ତୁସ୍ତ କଲା ଭଳି ପ୍ଲାଣ୍ଟ ପ୍ରତ୍ୟେକ ଜୋନରେ ପ୍ରତିଷ୍ଠା କରିବାକୁ ଯୋଜନା କରାଯାଇଛି । ତେଣୁ ଦାରୁଠେଙ୍ଗବାସୀ ଅତିକମରେ ଆଉ ବର୍ଷେ ଆବର୍ଜନା ପକାଇବା ପାଇଁ ବିଏମସିକୁ ଅନୁମତି ଦିଅନ୍ତୁ । ଏହି ପ୍ରସ୍ତାବକୁ ଶୁଣିବା ମାତ୍ରେ ଗ୍ରାମବାସୀ ରୋକଠୋକ ମନାକରି ଦେଇଛନ୍ତି । କୌଣସି ପରିସ୍ଥିତିରେ ଆବର୍ଜନା ପକାଇବା ପାଇଁ ସ୍ୱୀକୃତି ଦିଆନଯାଉ ବୋଲି କହିଥିଲେ । ସର୍ବସାଧାରଣଙ୍କ ମତକୁ ସମ୍ମାନ ଜଣାଇ ବିଏମସିକୁ ଉତ୍ତର ଲେଖାଯିବ ବୋଲି ଦାରୁଠେଙ୍ଗ ସରପଞ୍ଚ କହିଛନ୍ତି।