ମୋବାଇଲ୍ ନ୍ୟୁଜ୍ ବ୍ୟୁରୋ: ପୁଲିସକୁ ବୋକା ବନେଇ ଫେରାର ହୋଇଗଲା ବିଚାରାଧୀନ କଏଦୀ । ପୁଲିସ ସବୁ ଦେଖୁଥିଲା କିନ୍ତୁ ବୁଝି ପାରିଲାନି ଚତୁର ଚୋରର ଚାଲ । ଆଉ ଶେଷରେ ପୁଲିସ ଆଖିରେ ଧୁଳି ଦେଇ ଚମ୍ପଟ ମାରିଛି ଜଗତସିଂପୁର ଅଞ୍ଚଳର କୁଖ୍ୟାତ ଡକାୟତ ସାଜନ ଦାସ ।
ଖବର ମୁତାବକ ଜଗତସିଂପୁର ନାଉଁଗା ଅଞ୍ଚଳର ସାଜନ ଦାସ ଏକ ଡକାୟତି ମାମଲାରେ ଗିରଫ ହୋଇ ଆଳି ପିଙ୍ଗଳ ଜେଲରେ ଥିଲା । ଲଗାତାର ଦେହ ଖରାପ ହେବାରୁ ତାଙ୍କୁ ଚୌଦ୍ୱାର ଜେଲକୁ ପଠା ଯାଇଥିଲା । ଗତ ୨୯ ତାରିଖରେ ଦେହ ଅଧିକ ଖରାପ ହେବାରୁ କଡା ସୁରକ୍ଷା ବଳୟ ଭିତରେ ନିଆ ଯାଇଥିଲା କଟକ ଏସସିବି ମେଡିକାଲ କଲେଜକୁ । ତିନି ଦିନ ହେଲା ସେ ଏସସିବିରେ ଚିକିତ୍ସିତ ହେଉଥିବା ବେଳେ ତାଙ୍କ ସୁରକ୍ଷା ଦାୟିତ୍ୱରେ ଥିଲେ ତିନିଜଣ ପୁଲିସ କର୍ମଚାରୀ । ଦାୟିତ୍ୱରେ ଥିବା ପୁଲିସକୁ ଶୌଚ ହେବାକୁ ଯାଉଛି କହି ବାଥରୁମ ଭିତରେ ପଶିଥିଲା ସାଜନ । ବାହାରେ ଠେଙ୍ଗା ଧରି ଜଗିଥିଲା ପୁଲିସ । କିନ୍ତୁ ଅନେକ ସମୟ ଅପେକ୍ଷା ପରେ ବି ଫେରିଲାନି ସାଜନ । କିଛି ଅଘଟଣର ଆଶଙ୍କା କରି ବାଥରୁମ ଭିତରକୁ ଯାଇଥିଲା ପୁଲିସ, ହେଲେ ସେଠାରେ ପାଇ ନଥିଲେ । ଏଇ ଖବର ପ୍ରବଳ ବେଗରେ ବ୍ୟାପି ଯାଇଥିଲା । ମେଡିକାଲ ପରିସରରେ ଅନେକ ଖୋଜାଖୋଜି ପରେ ବି ପତ୍ତା ମିଳିନଥିଲା ସାଜନର । କିନ୍ତୁ ଯେତେବେଳେ ସିସିଟିଭି ଯାଞ୍ଚ କରାଗଲା ସେତେବଳେ ସମସ୍ତଙ୍କର ହୋସ ଉଡିଗଲା । ବାଥରୁମ ଭିତରୁ ଶାଢ଼ି ପିନ୍ଧି ବାହାରିଥିଲା ସାଜନ । ପୁଲିସ ସାମନା ଦେଇଗଲା କିନ୍ତୁ ଠଉରାଇ ପାରିଲାନି ପୁଲିସ । ଆଉ ସିସିଟିଭି ଫୁଟେଜ ଦେଖିବା ପରେ ଜଣେ କେବଳ ଆଉ ଜଣଙ୍କୁ ଦୋଷ ଦେବା ଛଡା ଅନ୍ୟ ଉପାୟ ନଥିଲା । ତେବେ ଅଭିଯୁକ୍ତ ସାଜନ ଫେରାର ହେବା ପରେ ଏବେ ବିଭିନ୍ନ ଜାଗାରେ ରେଡ କରୁଚି ପୁଲିସ କିନ୍ତୁ ଏପର୍ଯ୍ୟନ୍ତ କୋଣସି ସୁରାକ ମିଳିପାରିନି । ତେବେ ବଡ କଥା କେବେ ଧରାପଡୁଛି ଫେରାର କଏଦୀ ଆଉ କର୍ତ୍ତବ୍ୟରେ ଢିଲା କରିଥିବା ପୁଲିସଙ୍କ ଉପରେ କଣ ଆକ୍ସନ ନିଆଯାଉଛି ତାହା ଦେଖିବାକୁ ବାକି ରହିଲା।
