ମୋବାଇଲ୍ ନ୍ୟୁଜ୍ ବ୍ୟୁରୋ: ଦଳୀୟ ସ୍ୱାର୍ଥକୁ ପଛରେ ପକାଇ ନିଜ ସ୍ୱାର୍ଥ ପାଇଁ ଦଳ ଛାଡି ଦେଉଥିବା ବିଧାୟକଙ୍କୁ ଏବେ ସାବଧାନ ହେବାର ସମୟ ଆସି ଯାଇଛି । ଯେଉଁ ଦଳ ଆପଣଙ୍କୁ ବିଧାୟକ କରିଛି ତାକୁ ଧୋକା ଦେବା ଆପଣଙ୍କୁ ଢେର ମହଙ୍ଗା ପଡିପାରେ । ସାମିୟିକ ସ୍ୱାର୍ଥ ପାଇଁ ସିନା ଆପଣ ଧୋକା ଦେଇ ଦେଲେ କିନ୍ତୁ ଜନତା ଆପଣଙ୍କୁ କ୍ଷମା ଦେବେନି । ନିର୍ବାଚନରେ ଜନତା ହିଁ ଆପଣଙ୍କୁ ପ୍ରତ୍ୟାଖ୍ୟାନ କରି ଦେବେ । ଆଉ ଏହାର ସଦ୍ୟତମ ଉଦାହରଣ ହେଉଛି କର୍ଣ୍ଣାଟକ ସାଧାରଣ ନିର୍ବାଚନ । ଆସନ୍ତୁ ନଜର ପକାଇବା କର୍ଣାଟକରେ କେମିତି ଝଟକା ପାଇଥିଲେ ଏମିତି ଦଳକୁ ଧୋକା ଦେଇଥିବା ବାଗୀ ବିଧାୟକ।
୨୦୧୮ କର୍ଣ୍ଣାଟକ ନିର୍ବାଚନରେ ୨୨୪ ଆସନ ମଧ୍ୟରୁ ବିଜେପି ୧୧୬ ସିଟରେ ଜିତି ସଂଖ୍ୟା ଗରିଷ୍ଠ ଦଳ ସାଜିଥିଲା । କିନ୍ତୁ ସରକାର ଗଠନ ପାଇଁ ମ୍ୟାଜିକ ନମ୍ବର ୧୧୩ ଛୁଇଁ ପାରି ନଥିଲା । ସେପଟେ କଂଗ୍ରେସର ୭୬ ବିଧାୟକ, ଜେଡିଏସର ୩୭ ବିଦାୟକ ଓ ୩ଜଣ ସ୍ୱାଧିନ ବିଧାୟକଙ୍କ ମଧ୍ୟରେ ଗଠନ ହେଲା ମେଣ୍ଟ । ଆଉ ୧୧୬ ବିଧାୟକଙ୍କ ସମର୍ଥନରେ କଂଗ୍ରେସ ଓ ଜେଡିଏସ ମିଶି ଝୁଲା ସରକାର ଗଠନ କରିଥିଲେ କର୍ଣ୍ଣାଟକରେ । କିନ୍ତୁ ୨୦୧୯ରେ ହଠାତ ମେଣ୍ଟରୁ ୧୭ ଜଣ ବିଧାୟକ ସେମାନଙ୍କ ସମର୍ଥନ ଫେରାଇ ନେଇଥିଲେ । କଂଗ୍ରେସର ମେଣ୍ଟ ସରକାରକୁ ବର୍ଷେ ପୁରିନି ଭାଙ୍ଗିଗଲା। ସେପଟେ ବାଗୀ ବିଧାୟକଙ୍କ ସହେଯାଗରେ ସରକାର ଗଢିଲା ବିଜେପି । ଯାହା ଅପରେସନ ଲୋଟସ ନାଁରେ ବେଶ ଜଣାଶୁଣା । ତେବେ ୨୦୧୯ରେ ଦଳ ଛାଡିଥିବା ୧୭ ବିଧାୟକଙ୍କ ମଧ୍ୟରୁ ଚଳିତ ୨୦୨୩ ନିର୍ବାଚନରେ ୧୪ ଜଣ ଲଢିଥିଲେ ବିଜେପି ଟିକେଟରୁ । ତେବେ ବିଜେପି ଟିିକେଟରୁ ଲଢିଥିବା ୧୪ ଜଣଙ୍କ ମଧ୍ୟରୁ ୬ ଜଣ ଜିତିଥିବା ବେଳେ ୮ ଜଣକୁ ପ୍ରତ୍ୟାଖ୍ୟାନ କରିଥିଲେ ଜନତା । ଆଉ ବାକି ତିନି ଜଚ୍ଚଙ୍କ ମଧ୍ୟରୁ ଦୁଇ ଜଣଙ୍କୁ କୌଣସି ଦଳ ଟିକେଟ ନଦେବାରୁ ସେମାନେ ନିର୍ବାଚନ ଲଢି ନଥିବା ବେଳେ ଜଣେ ଜେଡିଏସ ଟିକେଟରୁ ଲଢି ହାରି ଯାଇଥିଲେ।
ଆସନ୍ତୁ ନଜର ପକାଇବା ଏଇ ବାଗୀ ୧୭ ଜଣ ବିଧାୟକଙ୍କ ଆସନରୁ କିଏ କିଏ ବାଜିମାତ କଲେ
ବିିଦ୍ରୋହୀ ଏନ ନାଗାର୍ଜୁନଙ୍କ ଆସନ ହୋସାକୋଟ, ପି.ପାଟିଲଙ୍କ ଆସନ ମସ୍କି, ମହେଶ କେଙ୍କ ଆସନ ଅଠାନୀ, ବି.ସି ପାଟିଲଙ୍କ ଆସନ ହିରେକପୁର, ଶ୍ରୀମନ୍ତ ପାଟିଲଙ୍କ ଆସନ କଗୱାଡ, କେ.ସୁଧାକରଙ୍କ ଆସନ ଚିକାବଲ୍ଲାପୁର ଓ ସିଦ୍ଧାର୍ଥଙ୍କ ଆସନ ବିଜୟନଗରରୁ କଂଗ୍ରେସ ବାଜିମାତ କରିଥିବା ବେଳେ ରମେଶ ଝାରକିଡିଙ୍କ ଆସନ ଗୋକାକ୍, ଏନ ମୁନିରତ୍ନଙ୍କ ଆସନ ଆର ଆର ନଗର, କେ ଗୋପାଲିଆଙ୍କ ଆସନ ମହାଲକ୍ଷ୍ମୀ ଲେ ଆଉଟ, ବ୍ୟାର୍ଥୀ ବସଭରାଜଙ୍କ ଆସନକେ. ଆର.ପୁରା, ଶିବରାମ ହେବାରଙ୍କ ଆସନ ୟେଲାପୁର ଓ ସୋମଶେଖରଙ୍କ ଆସନ ୟସବନ୍ତପୁରରୁ ବିଜେପି ବାଜିମାତ କରିଚି। ସେହିଭଳି ନାରାୟଣ ଗୌଡାଙ୍କ ଆସନ କ୍ରିଷ୍ଣାରାଜପତରୁ ଜେଡିଏସ ବିଜୟ ଲାଭ କରିଛି । ସେହିଭଳି ନିରୋଶନ ବାଗଙ୍କ ଆସନ ଶିବାଜୀ ନଗର,ଏଚ ବିଶ୍ୱନାଥଙ୍କ ଆସନ ହେବଲ ଓ ଆର ଶଙ୍କରଙ୍କ ଆସନରାନେବେନୁରରୁ ମଧ୍ୟ କଂଗ୍ରେସ ବିଜୟ ଲାଭ କରିଛି । ଅର୍ଥାତ ବିଦ୍ରୋହୀ ବିଧାୟକଙ୍କ ୧୭ ଆସନରୁ କଂଗ୍ରେସ ୧୦ଟିରେ ବାଜି ମାତ କରିଥିବା ବେଳେ ବିଜେପି ୬ଟି ଓ ଜେଡିଏସ ଗୋଟିଏ ଆସନରେ ବିିଜୟଲାଭ କରିଛି ।
ଏଥିରୁ ଆପଣ ଅନୁମାନ କରିପାରୁଥିବେ ଯେ ଦଳ ଛାଡୁଥିବା ବିଧାୟକଙ୍କୁ ଜନତା କେମିତି ପ୍ରତ୍ୟାଖ୍ୟାନ କରୁଛନ୍ତି । ଏ କାହାଣୀ କେବଳ କର୍ଣ୍ଣାଟକର ନୁହେଁ ବରଂ ବିଭିନ୍ନ ରାଜ୍ୟରେ ଏମିତି ଦଳ ଛାଡୁଥିବା ବିଧାୟକଙ୍କ ପାଇଁ ସତର୍କବାଣୀ । କର୍ଣ୍ଣାଟକ ଭଳି ମଧ୍ୟପ୍ରଦେଶରେ କଂଗ୍ରେସ ଓ ମହାରାଷ୍ଟ୍ରରେ ଶିବସେନା ବିଧାୟକମାନେ ସମର୍ଥନ ଫେରାଇ ସରକାର ଭାଙ୍ଗି ଦେଇଛନ୍ତି । ୨୦୨୦ରେ ୨୮ ଜଣ କଂଗ୍ରେସ ବିଧାୟକ ବିଦ୍ରୋହ କରି ଭାଙ୍ଗି ଦେଇଥିଲେ କମଲନାଥ ସରକାର । ସେହିଭଳି ୨୦୨୨ରେ ୪୦ ଜଣ ଶିବସେନା ବିଧାୟକ ଏମିତି ବିଦ୍ରୋହ କରି ଭାଙ୍ଗି ଦେଇଥିଲେ ଉଦ୍ଧବ ସରକାର । ତେଣୁ ଆଗାମୀ ନିର୍ବାଚନରେ ଜନତା ଏ ବିଦ୍ରୋହୀ ବିଧାୟକଙ୍କୁ କେମିତି ରେସପନ୍ସ ଦେଉଛନ୍ତି ତା ଦେଖିବାକୁ ବାକି ରହିଲା
