ବିଶ୍ୱକପ କ୍ରିକେଟରେ ଭାରତ ତାର ଦ୍ୱିତୀୟ ମ୍ୟାଚରେ ବୁଧବାର ଆଫଗାନିସ୍ତାନକୁ ଭେଟିବ । ଆଜି ଦିଲ୍ଲୀର ଅରୁଣ ଜେଟଲି ଷ୍ଟାଡିୟମରେ ଦୁଇ ଦେଶ ମୁହାଁମୁହିଁ ହେବେ । ପ୍ରଥମ ମ୍ୟାଚରେ ଶକ୍ତିଶାଳୀ ଅଷ୍ଟ୍ରେଲିଆକୁ ପରାସ୍ତ କରିଥିବା ଭାରତୀୟ ଦଳର ମନୋବଳ ଦୃଢ ରହିଛି । ତେଣୁ ଆଜିର ମ୍ୟାଚ ଜିତି ବିଶ୍ବକପ ଅଭିଯାନରେ ବିଜୟ ଧାରା ଜାରି ରଖିବାକୁ ଚାହିଁବ ଭାରତ । ସେପେଟ ପ୍ରଥମ ମ୍ୟାଚରେ ବାଂଲାଦେଶଠାରୁ ହାରି ଆଫଗାନିସ୍ତାନ ଟିମ୍ ଚାପରେ ରହିଛି । ତେଣୁ ଭାରତ ବିପକ୍ଷରେ ନିଶ୍ଚୟ ବିଜୟୀ ହେବାକୁ ବିଶେଷ ରଣନୀତି ସହିତ ପଡିଆକୁ ଓହ୍ଲାଇବ ଆଫଗାନିସ୍ତାନ ।
ଯଦିଓ ଆଫଗାନିସ୍ତାନ ସେତେ ଶକ୍ତିଶାଳୀ ନୁହେଁ ତଥାପି ହାଲୁକା ଭାବରେ ନେବନାହିଁ ଭାରତ । କାରଣ ଶୁବମନ ଗିଲ ଡେଙ୍ଗୁରେ ଆକ୍ରାନ୍ତ ହେବାପରେ ତାଙ୍କ ସ୍ଥାନରେ ଈଶାନ କିସାନ ରୋହିତ ଶର୍ମାଙ୍କ ସହିତ ବ୍ୟାଟିଂ ପାଇଁ ଆସିଥିଲେ ମଧ୍ୟ ଦୁହେଁ ସଫଳ ହୋଇନଥିଲେ । ସେହିପରି ଶ୍ରେୟସ ଆୟର ମଧ୍ୟ ବିଫଳ ହୋଇଥିଲେ । ତେବେ ଘରୋଇ ପରିବେଶରେ ଖେଳୁଥିବାରୁ ଭାରତ ହୁଏତ ବେଶୀ ଚାପରେ ନରହିପାରେ । କାରଣ ଅଷ୍ଟ୍ରେଲିଆ ବିପକ୍ଷେ ବୋଲରମାନେ ଯେଉଁଭଳି ଚମତ୍କାର ପ୍ରଦର୍ଶନ କରିଥିଲେ ସେହିଭଳି ସଫଳତା ଆଫଗାନିସ୍ତାନ ବିପକ୍ଷରେ ମଧ୍ୟ ଦୋହରାଇବାକୁ ଚାହିଁବ ଭାରତ । ତେବେ ଗତ ଦକ୍ଷିଣ ଆଫ୍ରିକା-ଶ୍ରୀଲଙ୍କା ମ୍ୟାଚ୍ରେ ଏହି ପିଚରେ ୭୦୦ରୁ ଊର୍ଦ୍ଧ୍ବ ରନ୍ ଦେଖିବାକୁ ମିଳିଥିଲା । ତେଣୁ ଆଜି ମଧ୍ୟ ବଡ଼ ସ୍କୋର୍ ହେବାର ଆଶା ରହିଛି ।
ସେହିଭଳି ରେକର୍ଡ ଦୃଷ୍ଟିରୁ ଦେଖିଲେ ବିଶ୍ବକପରେ ଭାରତ ଓ ଆଫଗାନିସ୍ତାନ ମଧ୍ୟରେ ଏପର୍ଯ୍ୟନ୍ତ ମୋଟ ୩ଟି ମ୍ୟାଚ ଖେଳାଯାଇଛି । ସେଥରୁ୨ଟି ମ୍ୟାଚରେ ଭାରତ ବିଜୟୀ ହୋଇଥିବା ବେଳେ ଗୋଟିଏ ମ୍ୟାଚ ଟାଇ ରହିଛି । ଅନ୍ୟପଟେ ଦିଲ୍ଲୀ ଷ୍ଟାଡିୟମରେ ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିବା ଲକ୍ଷ୍ୟରେ ରହିବେ ବିରାଟ କୋହଲି । ସଚିନ ଏଠାରେ ୮ଟି ମ୍ୟାଚରୁ ୩୦୦ ରନ ସଂଗ୍ରହ କରିଥିବା ବେଳେ କୋହଲି ୭ଟି ମୁକାବିଲାରେ ୨୨୨ ରନ କରିଛନ୍ତି । ସେ ଯଦି ଆଉ ୭୯ ରନ କରିବେ ତା’ହେଲେ ସଚିନଙ୍କୁ ଅତିକ୍ରମ କରିବେ । ଆଜିର ମ୍ୟାଚ ପାଇଁ ଗତ ମ୍ୟାଚ୍ ଭଳି ବ୍ୟାଟିଂ ବିଭାଗରେ କୌଣସି ଅଦଳ ବଦଳ ହୋଇନପାରେ। କିନ୍ତୁ ବୋଲିଂ ବିଭାଗରେ ହୁଏତ ଆର୍ ଅଶ୍ବିନଙ୍କ ସ୍ଥାନରେ ଦ୍ରୁତ ବୋଲର ମହମ୍ମଦ ସାମି ଖେଳିପାରନ୍ତି।
