ଶିମଲା: ଯଦି ଜଗୁଆଳି ହିଁ ଚୋରି କରିବ ତେବେ ଘରର ସୁରକ୍ଷା ଉପରେ ପ୍ରଶ୍ନ ଉଠିବା ସ୍ୱାଭାବିକ । ଦୁର୍ନୀତି ତଥା ହେରଫେର କଥା ଆସିଲେ ଲୋକେ ପ୍ରବର୍ତ୍ତନ ନିଦେ୍ର୍ଦଶାଳୟ ଉପରେ ଭରସା କରିଥାନ୍ତି । କାରଣ କଡ଼ା ପ୍ରଶ୍ନର ତାଲିକା ଧରି ଯେତେବେଳେ ଇଡି ଜେରା କରେ, ଅନେକ ଗୁଡିଏ ତଥ୍ୟ ସାମ୍ନାକୁ ଆସେ । କିନ୍ତୁ ଏଠି କାହାଣୀ ହିଁ ଭିନ୍ନ । କାରଣ ଏଠି ନିଜେ ଜଜ୍ ହିଁ କାଠଗଡ଼ାରେ । ଟଙ୍କା ଖାଉଛି ଇଡି । ନେଉଛି ଲାଂଚ । ଏକଥା ଶୁଣି ଆପଣ ମଧ୍ୟ ଆଶ୍ଚର୍ଯ୍ୟ ହେବା ସ୍ୱାଭାବିକ । କିନ୍ତୁ କଥା ଟି ସତ । ଇଡି କାର୍ଯ୍ୟାଳୟରେ ହୋଇଛି ଚଢାଉ । ଆଉ ଚଢାଉ କରିଛି ସିବିଆଇ । ଏ ଘଟଣା ଘଟିଛି ଶିମଲାରେ । ଯେଉଁଠି ପ୍ରବର୍ତ୍ତନ ନିର୍ଦ୍ଦେଶାଳୟର ଆସିଷ୍ଟାଣ୍ଟ ଡାଇରେକ୍ଟରଙ୍କ ଘରେ ସିବିଆଇ ଚଢାଉ କରିଛି ।
ଏହି ଚଢାଉରେ ଜବତ ହୋଇଛି ପୁଳା ପୁଳା ଟଙ୍କା । ଯାହାକି ପାଖାପାଖି ୫୬ ଲକ୍ଷ ହେବ ବୋଲି ଅନୁମାନ କରାଯାଉଛି । ଏହି ରେଡ ପରେ ଇଡି ଅଫିସର ଫେରାର ହୋଇଯାଇଥିବା ସୂଚନା ରହିଛି । ସିବିଆଇର ସୂଚନା ମୁତାବକ ଇଡି ଅଫିସରଙ୍କ ଉପରେ ତିନି ବର୍ଷ ପୁରୁଣା ମନି ଲଣ୍ଡରିଙ୍ଗ ଆକ୍ଟ ମାମଲାରେ ଲାଞ୍ଚ ନେବା ଅଭିଯୋଗ ଲାଗିଛି । ଏଥିସହିତ ଅଭିଯୁକ୍ତ ଅଫିସରଙ୍କ ଭାଇଙ୍କୁ ମଧ୍ୟ ସିବିଆଇ ଏହି ମାମଲାରେ ଜେଲ୍ ପଠାଇଥିଲା । ମୋଟାମୋଟି ଭାବେ କହିବାକୁ ଗଲେ ଇଡି ଅଫିସରଙ୍କ ଘରୁ ଏପର୍ଯ୍ୟନ୍ତ ୧୧ କୋଟି ଟଙ୍କା ଜବତ ହୋଇସାରିଲାଣି । ତେବେ ଏଠି ପ୍ରଶ୍ନ ଉଠୁଛି ଯଦି ଦାୟିତ୍ୱରେ ରହି ଅଫିସର ହିଁ ଏପରି କରିବେ ସେଠି ସାଧାରଣ ଲୋକ ନ୍ୟାୟ ପାଇଁ କାହା ଉପରେ ଭରସା କରିବେ ।
