୪ ଦିନରେ ଓଡ଼ିଶାର ୪ ଜିଲ୍ଲା ଅତିକ୍ରମ କରିବ ‘ଭାରତ ଯୋଡ଼ ନ୍ୟାୟ ଯାତ୍ରା’, ଦେଖନ୍ତୁ
ଏଥର ଆଉ ୱାଦା ଭାଙ୍ଗିବନି। ନିଶ୍ଚୟ ଆସିବେ ରାହୁଲ ଗାନ୍ଧି। ଏଥିପାଇଁ ବେଶ୍ ଆନନ୍ଦିତ ଓଡ଼ିଶା କଂଗ୍ରେସ ଶିବିର। କାରର ଗତବର୍ଷ ସେପ୍ଟେମ୍ବରରୁ ରାହୁଲ-ପ୍ରିୟଙ୍କା ଆସିବେ ଆସିବେ ବୋଲି ବାଟ ଚାହିଁ ବସିଛନ୍ତି ଓଡ଼ିଶା କଂଗ୍ରେସ ନେତୃମଣ୍ଡଳୀ। ତେବେ ଆସନ୍ତା ୧୪ ତାରିଖରେ ମଣିପୁରରୁ ଆରମ୍ଭ ହେଉଥିବା ‘ଭାରତ ଯୋଡୋ ନ୍ୟାୟ ଯାତ୍ରା’ ଓଡ଼ିଶା ଦେଇ ଯିବାକୁ ଥିବାବେଳେ ଝାଡଖଣ୍ଡରୁ ଛତିଶଗଡ଼ ଯାତ୍ରା କାଳରେ ୪ ଦିନରେ ଓଡ଼ିଶାର ୪ ଜିଲ୍ଲା ଅତିକ୍ରମ କରିବ । ରାଜ୍ୟର ୩୪୧ କିଲୋମିଟରରେ ରାହୁଲଙ୍କ ନ୍ୟାୟ ଯାତ୍ରା ଯିବ ବୋଲି ଏଆଇସିସି ପକ୍ଷରୁ ସୂଚନା ଦିଆଯାଇଛି । ହେଲେ ଏହି ସୂଚୀରେ ପରିବର୍ତ୍ତନ ହେବ। ଦିନେ ଦୁଇ ଦିନ ମଧ୍ୟରେ ରାହୁଲଙ୍କ ଟିମ୍ ଓଡ଼ିଶା ଆସିବେ। ଓଡ଼ିଶା ବୁଲିବା ପରେ ଯାତ୍ରାସୂଚୀ ଚୂଡ଼ାନ୍ତ କରାଯିବ ବୋଲି ପିସିସି ସଭାପତି ଶରତ ପଟ୍ଟନାୟକ ସୂଚନା ଦେଇଛନ୍ତି ।
ଏଠାରେ କହିରଖୁଛୁ ଯେ ଗୁରୁବାର ଦିଲ୍ଲୀରେ ଏଆଇସିସି କାର୍ଯ୍ୟାଳୟରେ ସମସ୍ତ ପ୍ରଦେଶ କଂଗ୍ରେସ କମିଟି ସଭାପତି, ସବୁ ରାଜ୍ୟର ପ୍ରଭାରୀ, ଏଆଇସିସି ସାଧାରଣ ସମ୍ପାଦକ, ବିଧାୟକ ଦଳ ନେତା ଓ କଂଗ୍ରେସ ଶାସିତ ରାଜ୍ୟଗୁଡିକର ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ଗୁରୁତ୍ୱପୂର୍ଣ୍ଣ ବୈଠକ ହୋଇଥିଲା । ଭାରତ ଯୋଡୋ ନ୍ୟାୟ ଯାତ୍ରା ବେଳେ ରାହୁଲ ଓଡ଼ିଶା ଦେଇ ଯିବେ ବୋଲି ସ୍ଥିର ହୋଇଥିଲା । ତାଲିକାରେ ଓଡ଼ିଶା ଥିବାରୁ ପିସିସି ସଭାପତି ଶରତ ପଟ୍ଟନାୟକ, ରାହୁଲ ଓ ତାଙ୍କ ଟିମକୁ ଧନ୍ୟବାଦ ଦେଇଛନ୍ତି । ସେହିପରି ବୈଠକରେ ଆସନ୍ତା ସାଧାରଣ ନିର୍ବାଚନରେ କଂଗ୍ରେସ କିଭଳି ଭଲ କରିବ ସେ ନେଇ ଆଲୋଚନା ହୋଇଥିଲା । ତୁରନ୍ତ ସମସ୍ତ ଲୋକସଭା ସଂଯୋଜକଙ୍କ ନାମ ଘୋଷଣା କରିବାକୁ କୁହାଯାଇଥିଲା । ଏହା ସହିତ ୨ଦିନ ମଧ୍ୟରେ ପ୍ରତି ରାଜ୍ୟରେ ପ୍ରଦେଶ ନିର୍ବାଚନ କମିଟି ବା ପିଇସି ଗଢିବାକୁ ବୈଠକରେ ନିର୍ଦ୍ଦେଶ ଦିଆଯାଇଥିଲା । ଆସନ୍ତା ନିର୍ବାଚନରେ କେବଳ ଦେଶରେ ନୁହଁ ଓଡ଼ିଶାରେ ମଧ୍ୟ କଂଗ୍ରେସ ଭଲ କରିବ । ରାଜ୍ୟରେ ୧୦ରୁ ୧୫ଟି ଲୋକସଭା ସିଟ୍ କଂଗ୍ରେସ ଜିତିବ ବୋଲି ପିସିସି ସଭାପତି ଦୃଢ଼ତାର ସହ କହିଛନ୍ତି । ଲୋକଙ୍କ ପାଖକୁ ଯିବା ବେଳେ କଂଗ୍ରେସ ସମୟରେ କି କି ଉନ୍ନତିମୂଳକ କାମ ହୋଇଥିଲା, ତାହା ମନେ ପକାଇ ଦିଆଯିବ ।
ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ, ଜିତେନ୍ଦ୍ର ସିଂ ଏବଂ କେ ସି ବେଣୁଗୋପାଳଙ୍କ ସମେତ ସମସ୍ତ ବରିଷ୍ଠ ନେତା ଯୋଗ ଦେଇଥିଲେ । କହିରଖୁଛୁ ଯେ ଭାରତ ଯୋଡୋ ନ୍ୟାୟ ଯାତ୍ରା ମଣିପୁରର ରାଜଧାନୀ ଇମ୍ଫାଲରୁ ଆରମ୍ଭ ହେବ । ଏହି ଯାତ୍ରା ୧୧୦ଟି ଜିଲ୍ଲାର ୧୦୦ ଲୋକସଭା ନିର୍ବାଚନ ମଣ୍ଡଳୀ ଦେଇ ଅତିକ୍ରମ କରିବ । ବିଭିନ୍ନ ରାଜ୍ୟର ଯାତ୍ରା ପଥ ପାଇଁ ଚୂଡାନ୍ତ ରୂପରେଖ ଦିଆଯାଉଥିବାରୁ ଏବେଠୁ ଜିଲ୍ଲାଗୁଡିକର ନାମ ଘୋଷଣା କରାଯାଇନାହିଁ ବୋଲି ଦଳର ମିଡିଆ ବିଭାଗ ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି।
