ଭୁବନେଶ୍ୱର: ଆଜି ଗୃହରେ ବିରୋଧୀଙ୍କ କମ୍ପନ। ପ୍ରଥମ ଦିନ ଭଳି ଦ୍ୱିତୀୟ ମୌସୁମୀ ଅଧିବେଶନର ଦ୍ୱିତୀୟ ଦିନରେ ମଧ୍ୟ ବିରୋଧୀ ଜିଦ୍ରେ ଅଟଳ। ଗୃହ ମଝିରେ ଉଭୟ ବିଜେଡି ଓ କଂଗ୍ରେସ ସଭ୍ୟ ଭିନ୍ନ ଦାବିରେ ହଟ୍ଟଗୋଳ କରିବାରୁ ଗୃହକାର୍ଯ୍ୟ ଚାଲିବା ଆଉ ସମ୍ଭବ ହେଲା ନାହିଁ। ଫଳରେ ବାଚସ୍ପତି ସୁରମା ପାଢ଼ୀ ବାଧ୍ୟହୋଇ ଗୃହକୁ ବାରମ୍ବାର ମୁଲତବୀ କରିଥିଲେ।
ବୁଧବାର ଧାର୍ଯ୍ୟ ସମୟରେ ଗୃହ ଆରମ୍ଭ ହୋଇଥିଲା। ପ୍ରଶ୍ନକାଳ ଆରମ୍ଭ ହେବା ମାତ୍ରେ କଂଗ୍ରେସ ଓ ବିଜେଡି ସଦସ୍ୟମାନେ ଗୃହମଝିକୁ ଆସି ହଟ୍ଟଗୋଳ କରିବା ସହ ନାରାବାଜି କରିଥିଲେ। ଚିକିଟି ମଦମୃତ୍ୟୁ ଘଟଣାରେ ଆର୍ଡିସି ସ୍ତରୀୟ ତଦନ୍ତ ଦାବି କରି ବିରୋଧୀ ବିଜେଡି ସଭ୍ୟମାନେ ଗୃହରେ ହୋହଲ୍ଲା କରିଥିଲେ। ଏହି ଘଟଣା ଏକ ସ୍ପର୍ଶକାତର ପ୍ରସଙ୍ଗ। ସରକାର ହାଲୁକା ଭାବରେ ନେଇଛନ୍ତି।
ତେଣୁ ଆର୍ଡିସି ତଦନ୍ତ ହେଲେ ପ୍ରକୃତ ଘଟଣା ଜଣାପଡ଼ିବ ବୋଲି ବିଜେଡି ସଭ୍ୟମାନେ କହୁଥିବା ଦେଖା ଦେଇଥିଲା। ଅନ୍ୟପକ୍ଷରେ ଜନଜାତିଙ୍କ ସୁରକ୍ଷା ଓ ଛାତ୍ର ଇଲେକ୍ସନ ଦାବି କରି କଂଗ୍ରେସ ବିଧାୟକମାନେ ମଧ୍ୟ ନିଜ ସିଟ୍ରୁ ଉଠି ଗୃହର ମଧ୍ୟ ଭାଗକୁ ଆସି ହଟ୍ଟଗୋଳ ଆରମ୍ଭ କରିଥିଲେ। ଶ୍ଲୋଗାନବାଜି ବି ଦେଇଥିଲେ। ସ୍ଥିତି ଏଭଳି ହେଲା ଗୃହ ଚାଲିବା ସମ୍ଭବ ହେଲାନାହିଁ। ଫଳରେ ଗୃହକୁ ୧୦ଟା ୩୨ରୁ ସାଢ଼େ ୧୧ ଯାଏ ମୁଲତବି କରିଥିଲେ ବାଚସ୍ପତି।
ପୁଣି ଗୃହ ଆରମ୍ଭ ହେବାପରେ ହଟ୍ଟଗୋଳ ହୋଇଥିଲା। ଏଥିଯୋଗୁଁ ବାଚସ୍ପତି ପୁଣି ବାଧ୍ୟ ହୋଇ ଗୃହକୁ ଅପରାହ୍ନ ୪ଟା ପର୍ଯ୍ୟନ୍ତ ମୁଲତବି ଘୋଷଣା କରିଥିଲେ। ଫଳରେ ପ୍ରଶ୍ନକାଳ, ଶୂନ୍ୟକାଳ ଓ ମୁଲତବି ପ୍ରସ୍ତାବ ଆଲୋଚନା ଚାଲିପାରି ନଥିଲା। ତେବେ ମଙ୍ଗଳବାର ବିଭିନ୍ନ ପ୍ରସଙ୍ଗରେ ଘେରିବା ପାଇଁ ବିରୋଧୀ ଦଳ ମଧ୍ୟରେ ଫାଟ ଯୋଗୁଁ ଶାସକ ଦଳକୁ ସୁବିଧା ହୋଇଥିଲା।
ହେଲେ ବୁଧବାର ସ୍ଥିତି ଓଲଟା ଥିଲା। ବିଧାନସଭାର ପ୍ରଥମାର୍ଦ୍ଧ ଅଧିବେଶନରେ ବିରୋଧୀ ଏକତା ହୋଇ ଲଢ଼ିବା ସ୍ଥିତି ଦେଖିବାକୁ ମିଳିଥିଲା। ଅପରପକ୍ଷରେ ଗୃହ ବାହାରେ ଅବକାରୀ ମନ୍ତ୍ରୀ କହିଥିଲେ, ଚିକିଟି ବେଆଇନ ମଦ କାରବାର ଘଟଣାରେ ୮ ଜଣଙ୍କୁ ଗିରଫ କରାଯାଇଛି।
ଗତକାଲି ସନ୍ଧ୍ୟା ସୁଦ୍ଧା ରାଜ୍ୟର ବିଭିନ୍ନ ସ୍ଥାନରେ ଚଢ଼ଉ କରାଯାଇ ୭,୨୭୪ ଲିଟର ବେଆଇନ ମଦ ଜବତ କରାଯିବା ସହ ୭୨ ଜଣଙ୍କୁ ଗିରଫ କରାଯାଇଛି। ଏଥିମଧ୍ୟରୁ କେବଳ ଗଞ୍ଜାମ ଜିଲ୍ଲାରେ ୩୮୫ ଲିଟର ମଦ ଜବତ ହୋଇଛି। ତେବେ ଗୃହରେ ବିରୋଧୀ କରୁଥିବା ହଟ୍ଟଗୋଳ ରାଜ୍ୟ ସରକାରଙ୍କ ଉପରେ ପ୍ରଭାବ ପକାଇବ , ତାହା ତଦନ୍ତ ପରେ ହିଁ ଜଣା ପଡ଼ିବ l
