ଭୁବନେଶ୍ୱର: ଜଳ ଜଳ ଦିଶିଲାଣି ବିଜେଡିରେ ଫାଟ । ୨ଫାଳ ହେଇଛି ଦଳର ବିବେକ । ନେତା ନେତା ଭିତରେ ଆଉ ମିଶୁନି ମନ । ପୁରାପୁରି ହୁଗୁଳି ଗଲାଣି ଅନୁଶାସନ । ଶେଷରେ ଏମିତି ହୋଇ ଧୀରେ ଧୀରେ ଭାଙ୍ଗିଯିବ ବିଜେଡି । ଏବେ ଏମିତି କିଛି ଚର୍ଚା ରାଜନୈତିକ ମହଲରେ ଜୋର ଧରିଛି । ୱାକଫ୍ ବିଲକୁ ନେଇ ସାଂସଦ ସସ୍ମିତ ପାତ୍ରଙ୍କ ଭୋଟ ପରେ ଦଳୀୟ କନ୍ଦଳ ସ୍ପଷ୍ଟ ବାରି ହୋଇ ପଡୁଛି । ଯାହାକୁ ନେଇ ଉଠୁଛି ପଡୁଛି ରାଜନୀତି । ଅନ୍ୟ ସାଂସଦଙ୍କ ବିରୋଧ ସତ୍ୱେ କେମିତି ବିଜେପି ସପକ୍ଷରେ ମତ ଦେଲେ ସସ୍ମିତ, ତାକୁ ନେଇ ବିଜେଡି ନେତାଙ୍କ ଭିତରେ ସୃଷ୍ଟି ହୋଇଛି ଚାପା ଗୁଞ୍ଜରଣ । ଏନେଇ ଗତକାଲି ନବୀନ ନିବାସରେ ଏକାଠି ହୋଇଥିଲେ ଅନେକ ପୁରୁଖା ନେତା । ଦୀର୍ଘସମୟ ଧରି ଚାଲି ଥିଲା ଗୁରୁତ୍ୱପୂର୍ଣ୍ଣ ବୈଠକ । କେଉଁ ପରିସ୍ଥିତିରେ ସସ୍ମିତ ସମର୍ଥନ କଲେ ତାକୁ ନେଇ ଚିନ୍ତା ପ୍ରକଟ କରିଛନ୍ତି ନେତାଏ । ଫଳରେ ୱାକଫ ବିଲକୁ ନେଇ ବିଜେଡି ୨ ଫାଳ ବୋଲି ଚର୍ଚ୍ଚା । କାରଣ ନବୀନଙ୍କ ନିଦେ୍ର୍ଦଶକୁ ଫୁ କରି ଦେଇଛନ୍ତି ଦଳର ସାଂସଦ ।
ଦିନ ଥିଲା ଦଳର ସୁପ୍ରିମୋ ନବୀନ ପଟ୍ଟନାୟକ କିମ୍ବା ସେତେବେଳେ ଦଳର ସେକେଣ୍ଡ ପାୱାରଫୁଲ୍ ନେତା ପାଣ୍ଡିଆନ୍ ଯାହା କହୁଥିଲେ, ସେଇ ପଦକ କଥାକୁ ଦଳର ସୈନିକମାନେ ଅକ୍ଷରେ ଅକ୍ଷରେ ମାନୁଥିଲେ । କାହା ଜିଭରେ ହାଡ଼ ନଥିଲା ସେମାନଙ୍କ ନିଷ୍ପତ୍ତିକୁ ଅବମାନନା କରି ନୂଆ ଧାଡ଼ିଏ କଥା କହିବା । କିନ୍ତୁ ଏବେ ଆଉ ଦଳର ସ୍ଥିତି ସେମିତି ନାହିଁ। ଯେତେ ଚେଷ୍ଟା କଲେ ମଧ୍ୟ ବିଜେଡି ଭିତରେ ଯେ ଅନୁଶାସନ ହୁଗୁଳି ଗଲାଣି ତାହା ଜଳ ଜଳ ଧରାପଡ଼ି ଯାଉଛି। କାରଣ ୨ଦିନ ପୂର୍ବରୁ ସସ୍ମିତ ପାତ୍ର ଟ୍ୱିଟ କରି କହିଥିଲେ ଯେ ବିଜେଡି ସାଂସଦମାନେ ବିବେକାନୁମୋଦିତ ଭୋଟ ଦେବେ। ଅର୍ଥାତ ତାଙ୍କ ବିବେକ ଯାହା କହିବ ସିଏ ସେଇଆ କରିବେ। କିନ୍ତୁ ସେଇ ସସ୍ମିତ ପାତ୍ର ପୂର୍ବରୁ କହିଥିଲେ ଯେ, ଦଳ ନିଷ୍ପତ୍ତି ନେଇଛି ଆମ ସାଂସଦମାନେ ୱାକଫ୍ ସଂଶୋଧନ ବିଲକୁ ବିରୋଧ କରିବୁ। ତେବେ ହୋଇଥିବା ନିଷ୍ପତ୍ତି ହଠାତ୍ କେମିତି ବଦଳିଗଲା ? ନିଷ୍ପତ୍ତି ପରିବର୍ତ୍ତନ ପଛରେ କିଏ ? ତାହାକୁ ନେଇ ଉଠିଛି ପ୍ରଶ୍ନ । ଯାହାକୁ ନେଇ ଚିନ୍ତାରେ ବିଜେଡି ସୁପ୍ରିମୋ ।
