ଭୁବନେଶ୍ୱର : ସାଇବର ଆକ୍ରମଣର ଉପାୟ ଆପଣାଇଛି ପାକିସ୍ତାନ । ଗୁଇନ୍ଦା ବିଭାଗର ସୂଚନା ଆଧାରରେ ଲୋକମାନଙ୍କୁ ଏ ନେଇ ସାବଧାନ ରହିବାକୁ କୁହାଯାଇଛି । କୌଣସି ଅଜଣା ଲିଙ୍କ୍ କିମ୍ବା ଫାଇଲ ଏବଂ ଅଜଣା ଫଟୋରେ କ୍ଲିକ୍ ନକରିବାକୁ ଭାରତରେ ଇଣ୍ଟରନେଟ ୟୁଜର୍ସଙ୍କୁ ପରାମର୍ଶ ଦିଆଯାଇଛି । ହ୍ୱାଟ୍ସଆପ୍, ଫେସବୁକ୍, ଟେଲିଗ୍ରାମ୍ ଏବଂ ଇ-ମେଲ ଭଳି ସୋସିଆଲ ପ୍ଲାଟଫର୍ମ ଗୁଡିକରେ ସାଇବର ଆଟାକ ହେବାର ସମ୍ଭାବନା ଅଧିକ।
କ୍ଷେପଣାସ୍ତ୍ର ଯୁଦ୍ଧରେ କଡା ଜବାବ ଦେଇଥିବାରୁ ପାକିସ୍ତାନର ଅବସ୍ଥା ଦୟନୀୟ ହୋଇପଡିଛି । ସବୁ କ୍ଷେତ୍ରରୁ ଭାରତ ଉପରେ ଆକ୍ରମଣ କରିବାରେ ବିଫଳ ହେଉଥିବାରୁ ଏବେ ସାଇବର ଆକ୍ରମଣର ଉପାୟ ବାଛିଛି ପାକିସ୍ତାନ । ପୂର୍ବରୁ ମିଳିଥିବା ସୂଚନା ଆଧାରରେ ପହଲଗାମ ଆକ୍ରମଣ ପରଠାରୁ ୧୦ ହଜାରରୁ ଅଧିକ ଥର ବିଭିନ୍ନ ୱେବସାଇଟ୍ ଉପରେ ଆକ୍ରମଣ କରିସାରିଛି ପାକିସ୍ତାନ ।
