କଟକ,୩୦।୬:କନ୍ଧମାଳ ଜିଲାର ବାଲିଗୁଡା ଥାନା ଅଧୀନ ପୁରାଣଜିଆବ ସଂରକ୍ଷିତ ଜଙ୍ଗଲ ଅଞ୍ଚଳରେ ଲୁଚିଥିବା ମାଓବାଦୀମାନେ ଥିବା ଖବର ପାଇ ପୋଲିସ ଡିଭିଏଫ ଯବାନଙ୍କ ଏକ ଦଳ ସେଠାରେ କୋମ୍ବିଂ ଅପରେଶନ ଆରମ୍ଭ କରିଥିଲା। ଏହି ଅପରେଶନ ସମୟରେ ମାଓବାଦୀମାନେ ପୋଲିସ ଉପରେ ଗୁଳି ଚାଲାଇବା ଫଳରେ ଦୁଇପକ୍ଷରେ ଗୁଳି ବିନିମୟ ଘଟିଥିଲା। ଏହି ଗୁଳି ବିନିମୟରେ ଦୁଇ ଦୁର୍ଦ୍ଦାନ୍ତ ମାଓବାଦୀ – ମଙ୍କୁ ଏବଂ ଚନ୍ଦନ – ନିହତ ହୋଇଥିଲେ। ଘଟଣାସ୍ଥଳରୁ ଗୋଟିଏ ରାଇଫଲ, ରିଭଲଭର, ଜୀବନ୍ତ ଗୁଳି, ୱାକିଟକି, ବ୍ୟାଟେରୀ ଓ ଅନ୍ୟାନ୍ୟ ସାମଗ୍ରୀ ଜବତ କରାଯାଇଛି।
ଏହି ସଫଳତା ପରେ ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ଯୋଗେଶ ବାହାଦୁର ଖୁରାନିଆ କନ୍ଧମାଳ ଏସ୍ପି ହରିଶ ବି.ସି. ଏବଂ ଡିଭିଏଫ ଯବାନଙ୍କୁ ଶୁଭେଚ୍ଛା ଜଣାଇଛନ୍ତି। ପୋଲିସ ପକ୍ଷରୁ ଏହି ଅଞ୍ଚଳରେ ତଲାସୀ ଅଭିଯାନ ଜାରି ରଖାଯାଇଛି। ମୃତ ମାଓବାଦୀମାନେ ଏସିଏମ ଏବଂ ପାର୍ଟି ସଦସ୍ୟ ଥିବା ବୋଲି ପ୍ରାଥମିକ ତଦନ୍ତରୁ ଜଣାପଡିଛି। ଏହା ମାଓବାଦୀବାଦକୁ ଦମନ କରିବା ଦିଗରେ ଓଡ଼ିଶା ପୋଲିସ ପାଇଁ ଏକ ଗୁରୁତ୍ୱପୂର୍ଣ୍ଣ ବଡ଼ ପଦକ୍ଷେପ ବୋଲି ବିଶେଷଜ୍ଞମାନେ କହୁଛନ୍ତି।
