କଟକ ୧୮/ଜୁଲାଇ : ବାଲେଶ୍ୱରର ଫକୀର ମୋହନ ସ୍ୱୟଂଶାସିତ କଲେଜରେ ଛାତ୍ରୀ ସୌମ୍ୟଶ୍ରୀଙ୍କ ଆତ୍ମହତ୍ୟା ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଛି। ଏହି ଭୟଙ୍କର ଘଟଣାରେ ଦୁଃଖ ପ୍ରକାଶ କରି ଅନେକ ଶିକ୍ଷାନୁଷ୍ଠାନ ଏବଂ ସରକାରୀ କାର୍ଯ୍ୟାଳୟ ତୁରନ୍ତ ପଦକ୍ଷେପ ନେଉଛନ୍ତି। ଏହି ପରିପ୍ରେକ୍ଷୀରେ, ରେଭେନ୍ସା ବିଶ୍ୱବିଦ୍ୟାଳୟ ଏକ ବଡ଼ ନିଷ୍ପତ୍ତି ନେଇଛି ଯେ ସନ୍ଧ୍ୟା ୫:୩୦ ପରେ ମହିଳା ଅଧ୍ୟାପକ, ମହିଳା କର୍ମଚାରୀ ଏବଂ ଛାତ୍ରୀମାନଙ୍କୁ କ୍ୟାମ୍ପସରେ ରହିବାକୁ ଦିଆଯିବ ନାହିଁ। ମହିଳାଙ୍କ ସୁରକ୍ଷା ପାଇଁ ଏହି ନିଷ୍ପତ୍ତି ନିଆଯାଇଛି। SOP ଜାରି ନହେବା ପର୍ଯ୍ୟନ୍ତ ଏଥିରେ ଲାଗୁ ହୋଇଥିବା କଟକଣା ବଳବତ୍ତର ରହିବ। ଏଫଏମ୍ କଲେଜ ଘଟଣା ପରେ ଶିକ୍ଷା ବିଭାଗ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଗଣଶିକ୍ଷା ବିଭାଗ ଏବଂ ଉଚ୍ଚଶିକ୍ଷା ବିଭାଗ ଦ୍ୱାରା ଦିଆଯାଇଥିବା ନିର୍ଦ୍ଦେଶ ଅନୁଯାୟୀ, ଶିକ୍ଷାନୁଷ୍ଠାନ ଏବଂ ସମସ୍ତ ସରକାରୀ କାର୍ଯ୍ୟାଳୟକୁ ୨୪ ଘଣ୍ଟା ମଧ୍ୟରେ ଏକ ଆଭ୍ୟନ୍ତରୀଣ କମିଟି (ICC) ଗଠନ କରିବାକୁ କୁହାଯାଇଛି। ମହିଳା ନିର୍ଯାତନା ବିରୋଧରେ ସୁରକ୍ଷା ବ୍ୟବସ୍ଥା ବୃଦ୍ଧି କରିବା ପାଇଁ ଏହି ପଦକ୍ଷେପ ନିଆଯାଇଛି।
