ବାଙ୍ଗାଲୋର ୨୧/ଜୁଲାଇ : ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଏବେ ବେଆଇନ ଅନଲାଇନ୍ ବେଟିଂ ପ୍ଲାଟଫର୍ମ ବିଜ୍ଞାପନ ସଂପୃକ୍ତ ମାମଲାରେ ଗଭୀର ତଦନ୍ତ ଚାଲାଇ ରହିଛି, ଯାହାରେ ଅନେକ ଖ୍ୟାତିନାମା ଫିଲ୍ମ ଏବଂ ଟେଲିଭିଜନ ବ୍ୟକ୍ତିତ୍ୱଙ୍କୁ ସମନ କରାଯାଇଛି। ଏହି ତାଲିକାରେ ଅଭିନେତା ରାଣା ଦଗ୍ଗୁବତୀ, ପ୍ରକାଶ ରାଜ, ବିଜୟ ଦେବରକୋଣ୍ଡା, ମାଞ୍ଚୁ ଲକ୍ଷ୍ମୀ ସମେତ ୨୯ ଜଣ ବ୍ୟକ୍ତିତ୍ୱଙ୍କ ନାମ ଅଛି। ଏହି ତଦନ୍ତ ପୁଞ୍ଜାଗୁଟ୍ଟା, ସାଇବରାବାଦ, ବିଶାଖାପାଟନମ ଓ ଅନ୍ୟାନ୍ୟ ସ୍ଥାନରେ ଦାଖଲ ହୋଇଥିବା ଏଫଆଇଆର ଉପରେ ଆଧାରିତ ଅଟେ। ଇଡି ବିଶ୍ୱାସ କରୁଛି ଯେ ଏହି ବ୍ୟକ୍ତିମାନେ ବେଟିଂ ଆଧାରିତ ବେବସାଇଟ୍ ଯଥା ଜଙ୍ଗଲୀ ରମି, ଏ୨୩, ଜିତୱିନ୍, ପାରିମ୍ୟାଚ୍ ଓ ଲୋଟସ୍ ୩୬୫ର ବିଜ୍ଞାପନ କରି ବେଆଇନ କାରବାରକୁ ପ୍ରୋତ୍ସାହନ ଦେଇଥିଲେ। ଏହି ମାମଲାରେ ଅନେକ ଅଭିଯୁକ୍ତ ସେମାନଙ୍କର ଅନ୍ୟାୟ ସମ୍ପୃକ୍ତିକୁ ଅସ୍ୱୀକାର କରିଛନ୍ତି, ଓ ଆଇନ ଅସ୍ପଷ୍ଟତା ବିଷୟରେ ଜାଣି ପରେ ସେମାନେ ବିଜ୍ଞାପନ ଚୁକ୍ତି ରଦ୍ଦ କରିଛନ୍ତି ବୋଲି କହିଛନ୍ତି। ତଥାପି,ଇଡି ର ତଦନ୍ତ ଏହି ଦିଗକୁ ଲକ୍ଷ୍ୟ କରୁଛି ଯେ ସେଲିବ୍ରିଟିମାନେ ଜଣସାଧାରଣଙ୍କୁ ବେଟିଂ ପ୍ଲାଟଫର୍ମ ପାଇଁ ପ୍ରଲୋଭିତ କରି ଅପରାଧିକ ରାସ୍ତାକୁ ଆକୃଷ୍ଟ କରିଥିଲେ କି ନାହିଁ। ଏହି ମାମଲାରେ ଆଉ ଅନେକ ନୂଆ ନାମ ଆସିପାରେ ବୋଲି ଅନୁମାନ କରାଯାଉଛି। ତଦନ୍ତ ଜାରି ରହିଛି ଓ ଆଗାମୀ ଦିନରେ ଆହୁରି ବ୍ୟକ୍ତିତ୍ୱଙ୍କୁ ସମନ ଜାରି କରାଯିବ।
