ଭୁବନେଶ୍ୱର ୧୨/ଅଗଷ୍ଟ : ଭୁବନେଶ୍ୱରର ମହାତ୍ମା ଗାନ୍ଧୀ ମାର୍ଗରେ ଚାଲିଛି ରାଜ୍ୟସ୍ତରୀୟ ସ୍ୱାଧୀନତା ଦିବସ ପାଇଁ ପରେଡ୍ ଅଭ୍ୟାସ। ଏହି ପରେଡ୍ ମଙ୍ଗଳବାର ଅପରାହ୍ନ ୨ଟାରୁ ୬ଟା ଓ ବୁଧବାର ସକାଳ ୭ରୁ ୧୧:୩୦ ପର୍ଯ୍ୟନ୍ତ ହେବ। ପ୍ରଧାନ ଦିନ ଅର୍ଥାତ୍ ୧୫ ଅଗଷ୍ଟ ସକାଳ ୬ଟାରୁ ପରେଡ୍ ଆରମ୍ଭ ହେବ। ଏହି ଅଭ୍ୟାସ ଓ ପରେଡ୍ ଦିନ ସମୟରେ ଯାନଚଳାଚଳ ରେ ବିପୁଳ ପରିବର୍ତ୍ତନ ଆଣାଯାଇଛି। ଯାତାୟାତ ସୁବିଧାକୁ ଦୃଷ୍ଟିରେ ରଖି, ଭୁବନେଶ୍ୱର କମିଶନରେଟ୍ ପୋଲିସ ଟ୍ରାଫିକ୍ କଟକଣା ଜାରି କରିଛି। ଏହି ଟ୍ରାଫିକ୍ ନିୟମାବଳୀଅନୁଯାୟୀ, ଭାରି ଯାନବାହନ ରାମମନ୍ଦିର ଓ ରାଜମହଲ ଛକ ଭିତରୁ ମାଷ୍ଟରକ୍ୟାଣ୍ଟିନ୍ ଯିବାକୁ ଅନୁମତି ମିଳିବ ନାହିଁ। ଦୁଇଚକିଆ ଓ ହାଲୁକା ଯାନ କେବଳ ରାଜମହଲ ଛକରୁ ମାଷ୍ଟରକ୍ୟାଣ୍ଟିନ୍ ପର୍ଯ୍ୟନ୍ତ ଆସିପାରିବେ, କିନ୍ତୁ ପିଏମ୍ଜି ଛକ ଯିବାକୁ ଦିଆଯିବ ନାହିଁ। ଏହା ବ୍ୟତୀତ ନିର୍ଦ୍ଦିଷ୍ଟ ରାସ୍ତା ମାର୍ଗଗୁଡ଼ିକ ଯାନବାହନ ପାଇଁ ବନ୍ଦ ରହିବେ ଓ କେବଳ ପଦଚାରୀମାନେ ଚାଲିଚାଲି ଗାନ୍ଧୀ ମାର୍ଗ ଯାଇପାରିବେ। ସୁରକ୍ଷା ନଜରରେ, ପରେଡ୍ ସମୟରେ ଗ୍ୟାସ୍ ବେଲୁନ୍ ବିକ୍ରିକୁ ମଧ୍ୟ ପ୍ରତିବନ୍ଧ ଲାଗୁ କରାଯାଇଛି। ପାର୍କିଂ ସୁବିଧା ପାଇଁ ମୋଟ ୭ଟି ସ୍ଥାନ ନିର୍ଦ୍ଧାରିତ ହୋଇଛି, ବିଡିଏ ବସ୍ଷ୍ଟାଣ୍ଡ, କଂଗ୍ରେସ ଭବନ, ଇଡ୍କଲ୍ ଅଡିଟୋରିୟମ୍, ଜୟଦେବ ଭବନ, ୟୁନିଟ-୩ ବ୍ୟାଙ୍କ ଭିତର, ରବିନ୍ଦ୍ର ମଣ୍ଡପ ଭିତର ଓ ୟୁନିଟ-୨ ବାଳିକା ବିଦ୍ୟାଳୟ ପଡ଼ିଆ। ଯେ କୌଣସି ବ୍ୟକ୍ତି ଏହି ନିୟମ ଉଲ୍ଲଂଘନ କରିବେ, ସେମାନଙ୍କଠାରୁ ଓଡିଶା ଅର୍ବାନ୍ ପୋଲିସ ଆଇନ ଅନୁଯାୟୀ ₹୫୦୦ କିମ୍ବା ₹୧୦୦୦ ଜରିମାନା ନିଆଯିବ। ସ୍ୱାଧୀନତା ଦିବସର ସୁନିଖୁତ ପରିଚାଳନା ପାଇଁ ଏହି ସମସ୍ତ ବ୍ୟବସ୍ଥା ଗ୍ରହଣ କରାଯାଇଛି।
