ଭୁବନେଶ୍ୱର,ଇନଷ୍ଟାଗ୍ରାମ ଏକ ଟିଭି ଆପ୍ ବିଷୟରେ ବିଚାର କରୁଛି, ଯାହା ବ୍ୟବହାରକାରୀମାନଙ୍କୁ ବଡ଼ ସ୍କ୍ରିନରେ ରିଲ୍ସ ଏବଂ ଅନ୍ୟାନ୍ୟ ଭିଡିଓ ଦେଖିବାକୁ ଅନୁମତି ଦେବ। ଏହା YouTube ପାଇଁ ଏକ ଗୁରୁତ୍ୱପୂର୍ଣ୍ଣ ଚ୍ୟାଲେଞ୍ଜ ସୃଷ୍ଟି କରିପାରେ। ଇନଷ୍ଟାଗ୍ରାମ ମୁଖ୍ୟ ଆଡାମ ମୋସେରି କହିଛନ୍ତି ଯେ କମ୍ପାନୀ ବର୍ତ୍ତମାନ ଏହା ଉପରେ ବିଚାର କରୁଛି। ଏ ଦିଗରେ ଏପର୍ଯ୍ୟନ୍ତ କୌଣସି ବିଜ୍ଞପ୍ତି ପ୍ରକାଶ ହୋଇନାହିଁ।
ମୋସେରି କହିଛନ୍ତି ଯେ ଯଦି ଲୋକମାନେ ଟିଭିରେ କଣ୍ଟେଣ୍ଟ ଦେଖୁଛନ୍ତି, ତେବେ ଆମକୁ ମଧ୍ୟ ଟିଭିକୁ ଯିବାକୁ ପଡିବ। ଇନଷ୍ଟାଗ୍ରାମ ଚାହୁଁଛି ଯେ ଏହାର କଣ୍ଟେଣ୍ଟ ପ୍ରତ୍ୟେକ ଡିଭାଇସରେ ଭଲ ଦେଖାଯାଉ। ସେ ଆହୁରି ମଧ୍ୟ କହିଛନ୍ତି ଯେ ଲାଇଭ୍ ସ୍ପୋର୍ଟସ୍ ଏବଂ ଏକ୍ସକ୍ଲୁସିଭ୍ ଶୋ ଆପ୍ରେ ଉପଲବ୍ଧ ହେବ ନାହିଁ। ମୋସେରି ଏହା ମଧ୍ୟ ସ୍ୱୀକାର କରିଛନ୍ତି ଯେ ଇନଷ୍ଟାଗ୍ରାମ ବର୍ଷ ବର୍ଷ ପୂର୍ବରୁ ଏକ ଟିଭି ଆପ୍ ଲଞ୍ଚ କରିବା ଉଚିତ ଥିଲା। କିଛି ବର୍ଷ ମଧ୍ୟରେ Instagram ରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆସିଛି, ଏବଂ ଏହା ଆଉ କେବଳ ଫଟୋ ପର୍ଯ୍ୟନ୍ତ ସୀମିତ ନାହିଁ। ବ୍ୟକ୍ତିଗତ ମେସେଜିଂ, ଷ୍ଟୋରି ଏବଂ ରିଲ୍ସ ଲୋକପ୍ରିୟତା ହାସଲ କରୁଛି। ମେଟା ମାଲିକାନାରେ ଥିବା Instagram ମାସିକ ଉପଭୋକ୍ତା ସଂଖ୍ୟା ୩ ବିଲିୟନ ଅତିକ୍ରମ କରିଛି ଏବଂ ବିଶ୍ୱ ବଜାରରେ TikTok ସହିତ ପ୍ରତିଯୋଗିତା କରିବା ପାଇଁ ଏବେ ଛୋଟ ଭିଡିଓ ଉପରେ ଅଧିକ ଧ୍ୟାନ ଦେଉଛି।
ମୋସେରି ଭାରତ ବିଷୟରେ ମଧ୍ୟ କହିଥିଲେ। ସେ କହିଥିଲେ ଯେ ଭାରତ ଇନଷ୍ଟାଗ୍ରାମର ଅଭିବୃଦ୍ଧି ପାଇଁ ଏହା ଗୁରୁତ୍ୱପୂର୍ଣ୍ଣ , ବିଶେଷକରି ଟିକଟକ୍ ବନ୍ଦ ହେବା ପରଠାରୁ ଭାରତରେ ଖୁବ ପ୍ରସିଦ୍ଧ ହେଇଛି ରିଲ୍ସ । ୨୦୨୦ମସିହାରେ ଚୀନ୍ ସହିତ ସୀମା ବିବାଦ ପରେ, ଭାରତ ସରକାର ଟିକଟକ୍ ସମେତ ଅନେକ ଚୀନ୍ ଆପ୍ ଉପରେ ପ୍ରତିବନ୍ଧକ ଲଗାଇଥିଲେ।
