ଭୁବନେଶ୍ୱର,୦୯/୦୨/୨୦୨୬: ରାଜ୍ୟର ଚାଷୀମାନେ ସମ୍ମୁଖୀନ ହେଉଥିବା ସମସ୍ୟାକୁ ନେଇ ବିରୋଧୀ ଦଳ ନେତା ନବୀନ ପଟ୍ଟନାୟକ ମୁଖ୍ୟମନ୍ତ୍ରୀ ମୋହନ ଚରଣ ମାଝିଙ୍କୁ ଏକ ଚିଠି ଲେଖିଛନ୍ତି। ଏହି ପତ୍ର ମାଧ୍ୟମରେ ନବୀନ ଅଭିଯୋଗ କରିଛନ୍ତି ଯେ, ବର୍ତ୍ତମାନ ରାଜ୍ୟରେ ଥିବା ଧାନ ମଣ୍ଡିଗୁଡ଼ିକ ଚାଷୀଙ୍କ ପାଇଁ ନିର୍ଯାତନାର କେନ୍ଦ୍ର ପାଲଟିଛି। ବିଶେଷ କରି ବିଭିନ୍ନ ଆଳରେ କ୍ୱିଣ୍ଟାଲ ପିଛା ୫ରୁ ୭ କେଜି ‘କଟନୀ-ଛଟନୀ’ କରାଯାଉଥିବାରୁ ଏହା ଚାଷୀଙ୍କ ପାଇଁ ଅତ୍ୟନ୍ତ ପରିତାପର ବିଷୟ ହୋଇଛି।
ନବୀନ ତାଙ୍କ ଚିଠିରେ ଦର୍ଶାଇଛନ୍ତି ଯେ, ମିଲର ଏବଂ ବିଭାଗୀୟ ଅଧିକାରୀଙ୍କ ମଧ୍ୟରେ ଥିବା ମଧୁଚନ୍ଦ୍ରିକା ଯୋଗୁଁ ସାଧାରଣ ଚାଷୀ ନିଜ ଶ୍ରମର ଉଚିତ୍ ମୂଲ୍ୟ ପାଇବାରୁ ବଞ୍ଚିତ ହେଉଛନ୍ତି। ଏଥିସହିତ ଇନପୁଟ୍ ସବ୍ସିଡି ପ୍ରଦାନ ପାଇଁ ଧାର୍ଯ୍ୟ ହୋଇଥିବା ୧୫୦ କ୍ୱିଣ୍ଟାଲ ସିଲିଙ୍ଗ୍ ବ୍ୟବସ୍ଥା ସଂକଳ୍ପ ପତ୍ରର ଉଲ୍ଲଙ୍ଘନ କରୁଛି ବୋଲି ସେ ଅଭିଯୋଗ କରିଛନ୍ତି।
ଅଧିକ ଫସଲ ଉତ୍ପାଦନ କରୁଥିବା ପରିଶ୍ରମୀ ଚାଷୀଙ୍କ ପାଇଁ ଏହି ସିଲିଙ୍ଗ୍ ବ୍ୟବସ୍ଥା ଏକ ପ୍ରକାର ଦଣ୍ଡ ସଦୃଶ ବୋଲି ନବୀନ ଉଲ୍ଲେଖ କରିଛନ୍ତି। ଏହା ସହିତ ବରିଷ୍ଠ ନେତା ସୁରେଶ ରାଉତରାୟ (ସୁର) ମଧ୍ୟ ଏହି ପ୍ରସଙ୍ଗରେ କିଛି ଗୁରୁତ୍ୱପୂର୍ଣ୍ଣ ସଙ୍କେତ ଦେଇଥିବା ଚିଠିରୁ ସୂଚନା ମିଳିଛି। ସାମଗ୍ରିକ ଭାବେ ଚାଷୀଙ୍କ ସ୍ୱାର୍ଥ ରକ୍ଷା ପାଇଁ ସରକାର ତୁରନ୍ତ ପଦକ୍ଷେପ ନେବାକୁ ସେ ଦାବି କରିଛନ୍ତି।
