ନୂଆଦିଲ୍ଲୀ/ଭୁବନେଶ୍ୱର, ୦୭ ମାର୍ଚ୍ଚ ୨୦୨୬: ଦେଶରେ ପୁଣି ଥରେ ବୃଦ୍ଧି ପାଇଛି ରନ୍ଧନ ଗ୍ୟାସ ଦର। ମଧ୍ୟପ୍ରାଚ୍ୟରେ ଲାଗିରହିଥିବା ଯୁଦ୍ଧ ପରିସ୍ଥିତି ଯୋଗୁଁ ଆନ୍ତର୍ଜାତୀୟ ବଜାରରେ ଅଶୋଧିତ ତୈଳ ଓ ଗ୍ୟାସ ମୂଲ୍ୟରେ ବ୍ୟାପକ ବୃଦ୍ଧି ଘଟିଛି। ଏହାର ସିଧାସଳଖ ପ୍ରଭାବ ସାଧାରଣ ଜନତାଙ୍କ ପକେଟ୍ ଉପରେ ପଡ଼ିଛି। ଆଜିଠାରୁ ଘରୋଇ LPG ସିଲିଣ୍ଡର ପିଛା ଦରରେ ୬୦ ଟଙ୍କା ବୃଦ୍ଧି କରାଯାଇଛି।
କେବଳ ଘରୋଇ ଗ୍ୟାସ ନୁହେଁ, ବାଣିଜ୍ୟିକ (Commercial) ଗ୍ୟାସ ସିଲିଣ୍ଡର ବ୍ୟବହାରକାରୀଙ୍କ ପାଇଁ ମଧ୍ୟ ଖରାପ ଖବର ଆସିଛି। ବାଣିଜ୍ୟିକ LPG ସିଲିଣ୍ଡର ଦରରେ ଏକାଥରକେ ୧୧୫ ଟଙ୍କା ବୃଦ୍ଧି କରାଯାଇଛି। ସରକାରୀ ତୈଳ କମ୍ପାନୀଗୁଡ଼ିକ ପକ୍ଷରୁ ଜାରି କରାଯାଇଥିବା ଏହି ନୂଆ ଦର ଆଜିଠାରୁ ହିଁ ସାରା ଦେଶରେ ଲାଗୁ ହେବ। ଏହାଫଳରେ ହୋଟେଲ, ରେଷ୍ଟୁରାଣ୍ଟ ଓ ମଧ୍ୟବିତ୍ତ ପରିବାରର ମାସିକ ବଜେଟ୍ ବିଗିଡ଼ିବା ଆଶଙ୍କା କରାଯାଉଛି।
ଆମେରିକାରେ ଦେଖାଦେଇଥିବା ତୈଳ ସଙ୍କଟ ଏବଂ ବିଶ୍ୱ ବଜାରରେ ଗ୍ୟାସ ଯୋଗାଣ ବାଧାପ୍ରାପ୍ତ ହେବା ଯୋଗୁଁ ଏହି ଦର ବୃଦ୍ଧି ଅନିବାର୍ଯ୍ୟ ହୋଇପଡ଼ିଥିଲା। ହଠାତ୍ ଏହି ଦର ବୃଦ୍ଧିକୁ ନେଇ ସାଧାରଣ ଖାଉଟିଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି।
