ଭୁବନେଶ୍ୱର ୦୧/ଜୁଲାଇ :ଭାରତୀୟ ରେଳ ମନ୍ତ୍ରଣାଳୟ ପକ୍ଷରୁ ଯାତ୍ରୀସେବାର ଆର୍ଥିକ ସ୍ଥିରତା ବୃଦ୍ଧି କରିବା ଲକ୍ଷ୍ୟରେ ଦ୍ୱିତୀୟ ଶ୍ରେଣୀ ଓ ଅଣ-ଏସି ଶ୍ରେଣୀରେ ଯାତ୍ରୀ ଭଡ଼ା ବୃଦ୍ଧି କରାଯାଇଛି । ୫୦୦ କିଲୋମିଟର ଦୂରତା ପର୍ଯ୍ୟନ୍ତ ରେ କୌଣସି ଭଡ଼ା ବୃଦ୍ଧି ନହେଲେ ମଧ୍ୟ, ୫୦୧ କିମି ରୁ ଆରମ୍ଭ କରି ୩୦୦୦ କିମି ପର୍ଯ୍ୟନ୍ତ ଭିନ୍ନ ସ୍ଲାବ୍ରେ ୫, ୧୦ ଓ ୧୫ ଟଙ୍କା ପର୍ଯ୍ୟନ୍ତ ବୃଦ୍ଧି ହୋଇଛି । ଏହି ବୃଦ୍ଧି ମେଲ/ଏକ୍ସପ୍ରେସ ଟ୍ରେନର ଅଣ-ଏସି ଦ୍ୱିତୀୟ ଶ୍ରେଣୀ, ସ୍ଲିପର କ୍ଲାସ୍ ଓ ପ୍ରଥମ ଶ୍ରେଣୀ ପାଇଁ ବ୍ୟବହୃତ ହେବ । ଏସି ଶ୍ରେଣୀ ଯାତ୍ରୀମାନେ ମଧ୍ୟ ଏହି ଭଡ଼ା ବୃଦ୍ଧିର ପ୍ରଭାବରେ ପଡ଼ିବେ । ଏସି ଚେୟାର କାର୍, ଏସି-୩ ଟାୟାର, ଏସି-୨ ଟାୟାର, ଏବଂ ଏକ୍ସିକ୍ୟୁଟିଭ୍ ଶ୍ରେଣୀ ପାଇଁ ପ୍ରତି କି.ମି. ୨ ପଇସା ବୃଦ୍ଧି ହୋଇଛି । ଏହି ସଂଶୋଧିତ ଭଡ଼ା ରାଜଧାନୀ, ଶତାବ୍ଦୀ, ବନ୍ଦେ ଭାରତ, ଦୂରନ୍ତୋ, ମହାମାନ ଓ ଅନ୍ୟାନ୍ୟ ପ୍ରିମିୟମ ଟ୍ରେନ ସେବାକୁ ମଧ୍ୟ ପ୍ରଭାବିତ କରିବ । ଏସି ଭିଷ୍ଟାଡୋମ୍, ଅନୁଭୂତି କୋଚ୍, ଯୁବା ଏକ୍ସପ୍ରେସ୍ ଓ ଜନଶତାବ୍ଦୀ ଭଳି ଟ୍ରେନ ମାଧ୍ୟମରେ ଯାତ୍ରା କରୁଥିବା ଯାତ୍ରୀମାନେ ମଧ୍ୟ ଏହି ବୃଦ୍ଧିର ସମ୍ମୁଖୀନ ହେବେ ।ଏହି ନୂଆ ଭଡ଼ା ଦର ଜୁଲାଇ ୧ରୁ ବୁକ୍ ହୋଇଥିବା ଟିକେଟ ପାଇଁ ପ୍ରଯୁଜ୍ୟ ହେବ । ଏହା ପୂର୍ବରୁ ବୁକ୍ ହୋଇଥିବା ଟିକେଟ ମାନ୍ୟ ତାଙ୍କ ପୂର୍ବତନ ଭଡ଼ା ଦରରେ ବୈଧ ରହିବେ, ଓ ତେଥିପାଇଁ କୌଣସି ଅତିରିକ୍ତ ଭଡ଼ା ଦେବାକୁ ପଡ଼ିବ ନାହିଁ । ରିଜର୍ଭେଶନ୍ ଫି, ସୁପରଫାଷ୍ଟ ସରଚାର୍ଜ୍ ଓ ଅନ୍ୟାନ୍ୟ ଶୁଳ୍କ ଅପରିବର୍ତ୍ତିତ ରହିଛି । ପ୍ରଯୁଜ୍ୟ ନିୟମ ଅନୁଯାୟୀ ଜିଏସ୍ଟି ମଧ୍ୟ ଲାଗୁ ହେବ । ଏହି ସଂଶୋଧନ ବିନା ବିଲମ୍ବରେ ପିଆର୍ଏସ୍, ୟୁଟିଏସ୍ ଓ ମାନୁଆଲ୍ ଟିକେଟିଂ ସିଷ୍ଟମ୍ରେ ଅପଡେଟ୍ କରାଯାଇଛି ବୋଲି ରେଳ ଦଳ ଜଣାଇଛି ।
