ବିହାର: ବିଜେପି ନେତାଙ୍କୁ ଗୁଳିମାଡ । ସୋମବାର ଭୋରୁ ନେତାଙ୍କୁ ଗୁଳି କରି ହତ୍ୟା କରିଛନ୍ତି କିଛି ଦୁବୁର୍ତ୍ତ । ଫଳରେ ପୁଣି ଥରେ ଅଶାନ୍ତ ହୋଇ ପଡିଛି ବିହାର । ଗୁଳି ଶଦ୍ଦରେ ଥରି ଉଠିଛି ରାଜଧାନୀ ପାଟନା ସହର ।
ତେବେ ମୃତକ ହେଲେ ବିଜେପି ନେତା ଶ୍ୟାମ ସୁନ୍ଦର ଶର୍ମା ଓରଫ ମୁନା ଶର୍ମା । ସେ ବିଜେପିର ପାଟନା ସିଟି ଚୌକର ପୂର୍ବତନ ମ୍ୟୁନିସିପାଲିଟି ବୋର୍ଡ ସଭାପତି ଥିଲେ । ଏହି ଘଟଣା ଭୋର ପ୍ରାୟ ୪ଟା ବେଳେ ଘଟିଥାଇ ପାରେ ବୋଲି ଅନୁମାନ କରାଯାଉଛି ।
କୁହାଯାଉଛି, ମୁନା ଶର୍ମାଙ୍କୁ ଗୁଳି କରି ହତ୍ୟା କରିଥିବା ବ୍ୟକ୍ତିମାନେ ଚେନ୍ ଲୁଟେରା । ସେମାନେ ଚେନ୍ ଲୁଟ୍ କରିବାକୁ ତାଙ୍କୁ ବନ୍ଧୁକ ଦେଖାଇଥିଲେ । ସେ ପ୍ରତିବାଦ କରିବାକୁ ତାଙ୍କୁ ଲୁଟେରାମାନେ ମାରି ଦେଇଥିଲେ । ତେବେ ଗତକାଲି ତାଙ୍କ ପୁଅଙ୍କ ନିର୍ବନ୍ଧ ଥିଲା । ସେଥିପାଇଁ ଘରକୁ କିଛି ବନ୍ଧୁବାନ୍ଧବ ଆସିଥିଲେ । ସେହି ବନ୍ଧୁବାନ୍ଧବଙ୍କ ମଧ୍ୟରୁ କେତେ ଜଣଙ୍କୁ ସେ ଅଟୋରେ ବସାଇବା ପରେ କମଲିଆ ଫାଟକ ନିକଟରେ ବସିଥିଲେ ।
ଏହିସମୟରେ ତିନି ଜଣ ବ୍ୟକ୍ତି ବାଇକରେ ଆସି ତାଙ୍କ ନିକଟରେ ପହଞ୍ଚିଥିଲେ । ବାଇକ୍ରୁ ଓହ୍ଳାଇଥିବା ଜଣେ ଦୁର୍ବୃତ୍ତଙ୍କ ସହିତ ତାଙ୍କର ଟଣାଓଟରା ହୋଇଥିଲା । ସେହି ସମୟରେ ତାଙ୍କ ଉପରକୁ ଗୁଳି କରାଯାଇଥିଲା । ଗୁଳିମାଡ଼ ପରେ ସେ ସେଠାରେ ପଡ଼ି ଯାଇଥିବା ବେଳେ ଦୁର୍ବୃତ୍ତମାନେ ଫେରାର ହୋଇଯାଇଥିଲେ । ଏହି ଦୃଶ୍ୟ ସିସିଟିଭିରେ ରେକର୍ଡ ହୋଇଥିବା ବେଳେ ପୁଲିସ ଏହାକୁ ଭଲ ଭାବେ ଯାଞ୍ଚ କରୁଛି ।
ଦୁର୍ବୃତ୍ତମାନଙ୍କ ମଧ୍ୟରୁ ଜଣଙ୍କୁ ପୁଲିସ ଚିହ୍ନଟ କରିଥିବା କହିଛି । ସେପଟେ ମୁନା ଶର୍ମାଙ୍କୁ ମାରିବା ସତ୍ତ୍ୱେ ଲୁଟେରାମାନେ ଚେନ୍ ନେଇ ନଥିବା ଜଣାପଡିଛି । ତେଣୁ ଏହି ଘଟଣାର ପଛରେ ଆଉ କିଛି କାରଣ ଥାଇପାରେ ବୋଲି ଆଲୋଚନା ହେଉଛି।
