ନୂଆଦିଲ୍ଲୀ() ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)- ୨୦୨୨ ପାଇଁ ରବିବାର ନିଲାମ ଶେଷ ହୋଇଯାଇଛି। ଚଳିତ ମାସ ୧୨ ତାରିଖ ଠାରୁ ବେଙ୍ଗାଲୁରୁ ଠାରେ ଆରମ୍ଭ ହୋଇଥିବା ଦୁଇ ଦିନିଆ ଏହି ନିଲାମରେ ୨୦୪ ଖେଳାଳିଙ୍କୁ କିଣା ଯାଇଛି। ଏମାନଙ୍କ ମଧ୍ୟରୁ ୧୩୭ ଜଣ ଭାରତୀୟ ଓ ୬୭ ବିଦେଶୀ ଖେଳାଳି ଅଛନ୍ତି। ଏହି ୨୦୪ ଖେଳାଳିଙ୍କୁ କିଣିବା ପାଇଁ ଆଇପିଏଲ ଦଳମାନେ ୫୫୧ କୋଟି ୭୦ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି। ତେବେ ଏଥର ଅନେକ ଦଳ ଯୁବକମାନଙ୍କ ଉପରେ ବିଶ୍ୱାସ ବ୍ୟକ୍ତ କରି କିଣିଛନ୍ତି | ଆଜି ଆମେ ଆପଣଙ୍କୁ ଏମିତି କିଛି ଖେଳାଳିଙ୍କ ବାବଦରେ କହିବୁ ଯେଉଁମାନଙ୍କ ବୟସ କମ ହେଲେ ବି ନିଜ ବ୍ୟାଟିଂ ଓ ବୋଲିଂ କୌଶଳରେ ସମସ୍ତଙ୍କୁ ପ୍ରଭାବିତ କରିଛନ୍ତି | ଆଫଗାନିସ୍ତାନର ନୁର ଅହମ୍ମଦ ଜଣେ ଯୁବ ବାମହାତୀ ସ୍ପିନର |
ତାଙ୍କୁ ଏହି ନିଲାମରେ ଗୁଜୁରାଟ ଟାଇଟାନ୍ସ ୩୦ ଲକ୍ଷ ଟଙ୍କା ମୂଲ୍ୟରେ କିଣିଥିଲା। ନୁର ଅହମ୍ମଦଙ୍କ ବୟସ ୧୭ ବର୍ଷ ହୋଇଥିବାବେଳେ ଚଳିତ ବର୍ଷର ନିଲାମରେ ବିକ୍ରି ହୋଇଥିବା ସର୍ବକନିଷ୍ଠ କ୍ରିକେଟର ସେ ହୋଇପାରିଛନ୍ତି | ଦକ୍ଷିଣ ଆଫ୍ରିକାର ଯୁବ କ୍ରିକେଟର ତଥା ବେବି ଏବି ନାମରେ ଜଣାଶୁଣା ଡିୱାଲ୍ଡ ବ୍ରେଭିସ୍ ଏଥର ଦ୍ୱିତୀୟ କନିଷ୍ଠ କ୍ରିକେଟର ହୋଇପାରିଛନ୍ତି | ୧୮ ବର୍ଷ ବୟସ୍କ ବ୍ରେଭିସଙ୍କୁ ଏଥର ମୁମ୍ବାଇ ଇଣ୍ଡିଆନ୍ସଙ୍କ ମୂଳ ମୂଲ୍ୟଠାରୁ ୧୫ଗୁଣ ଅଧିକ ଦାମ ଦେଇ କିଣିଥିଲା | ବ୍ରେଭିସ୍ ଚଳିତ ବର୍ଷ ଅଣ୍ଡର -୧୯ ବିଶ୍ୱକପରେ ୫୦୦ ରୁ ଅଧିକ ରନ୍ ସଂଗ୍ରହ କରି ପ୍ଲେୟାର ଅଫ୍ ଦି ଟୁର୍ନାମେଣ୍ଟ ଭାବରେ ସମ୍ମାନିତ ହୋଇଥିଲେ।
ଅଣ୍ଡର-୧୯ ବିଶ୍ୱକପ ଜିତିଥିବା ଭାରତୀୟ ଦଳର ଅନିଶ୍ୱର ଗୌତମଙ୍କ ବୟସ ୧୯ ବର୍ଷ ହୋଇଥିବାବେଳେ କର୍ଣ୍ଣାଟକର ଏହି ଅଲରାଉଣ୍ଡରଙ୍କୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୨୦ ଲକ୍ଷ ଟଙ୍କାରେ କିଣିଛି | ସେହିପରି ଯୁବ କ୍ରିକେଟର ରାଜ ଅଙ୍ଗଦ ବାୱାଙ୍କୁ ପଞ୍ଜାବ କିଙ୍ଗ୍ସ ୨ କୋଟି ଟଙ୍କାରେ କିଣିଛି। ବାୱାଙ୍କ ପ୍ରଦର୍ଶନ ବାବଦରେ କହିବାକୁ ଗଲେ ସେ ୧୬୨ ରନର ଅପରାଜିତ ଇନିଂସ ଖେଳି ଫାଇନାଲରେ ପାଞ୍ଚଟି ୱିକେଟ୍ ନେଇଥିଲେ। ଅଣ୍ଡର -୧୯ ବିଶ୍ୱକପ ଜିତିଥିବା ଭାରତୀୟ ଦଳର ଅଧିନାୟକ ୟଶ ଧୁଲଙ୍କୁ ଦିଲ୍ଲୀ କିଣିଛି । ନିକଟରେ ବିଶ୍ୱକପ୍ରେ ଚମତ୍କାର ବ୍ୟାଟିଂ କରୁଥିବା ଧୁଲ ଅଷ୍ଟ୍ରେଲିଆ ବିପକ୍ଷରେ ଏକ ଶତକ ହାସଲ କରିଥିଲେ। ତାଙ୍କର ମୂଳ ମୂଲ୍ୟ ୨୦ ଲକ୍ଷ ବଦଳରେ ତାଙ୍କୁ ୫୦ ଲକ୍ଷ ଟଙ୍କା ମିଳିଛି |
