ଭୋପାଳ() ମଧ୍ୟପ୍ରଦେଶର ଚର୍ଚ୍ଚିତ ବ୍ୟାପମ (ବ୍ୟବସାୟିକ ପରୀକ୍ଷା ବୋର୍ଡ) ବର୍ତ୍ତମାନ ଷ୍ଟାଫ୍ ସିଲେକସନ ବୋର୍ଡ ଭାବେ ପରିଚିତ ହେବ | ରାଜ୍ୟର ଶିବରାଜ ସିଂ ଚୌହାନ ସରକାର ବ୍ୟାପମର ନାମ ବଦଳାଇବା ପାଇଁ ପ୍ରସ୍ତୁତି ଚଳାଇଛନ୍ତି। ମଧ୍ୟପ୍ରଦେଶ କ୍ୟାବିନେଟରେ ବ୍ୟାପମ ନାମ ପରିବର୍ତ୍ତନ କରିବାକୁ ଆଲୋଚନା ହୋଇଥିଲା। ଯେଉଁଥିରେ ନାମ ପରିବର୍ତ୍ତନ କରିବାର ପ୍ରସ୍ତାବ ଉପରେ ସହମତ ହୋଇଥିଲା | ସୂଚନା ଥାଉ କି ଯେ ପୂର୍ବରୁ ମଧ୍ୟ ବ୍ୟାପମର ନାମ ପରିବର୍ତ୍ତନ କରାଯାଇଥିଲା | ଏହାପୂର୍ବରୁ ବ୍ୟାପମକୁ ବୃତ୍ତିଗତ ପରୀକ୍ଷା ବୋର୍ଡ ନାମରେ ନାମିତ କରାଯାଇଥିଲା |
ବ୍ୟାପମ ସେତେବେଳେ ଚର୍ଚ୍ଚାର ପରିସରକୁ ଆସିଥିଲା ଯେବେ ୨୦୧୩ ମସିହାରେ ବଡ ଧରଣର ଦୁର୍ନୀତି ହୋଇଥିବାର ଅଭିଯୋଗ ହୋଇଥିଲା | ଅଭିଯୋଗ ମୁତାବକ ଅନେକ ପରୀକ୍ଷାର୍ଥୀ ଅଧିକାରୀଙ୍କୁ ଲାଞ୍ଚ ଦେଇଥିଲେ ଏବଂ ଅନ୍ୟ କାହାକୁ ସେମାନଙ୍କ ସ୍ଥାନରେ ବସାଇ ପ୍ରଶ୍ନର ଉତ୍ତର ଦେଇଥିଲେ। ଏହି ଖବର ଗଣମାଧ୍ୟମରେ ସାମ୍ନାକୁ ଆସିବା ପରେ ଅନେକ ଛାତ୍ର, ଅଭିଯୁକ୍ତ ତଥା ପ୍ରତ୍ୟକ୍ଷଦର୍ଶୀଙ୍କର ମଧ୍ୟ ଏହି ମାମଲାରେ ମୃତ୍ୟୁ ହୋଇସାରିଛି । କେବଳ ଏତିକି ନୁହେଁ, ସେହି ସମୟରେ ମଧ୍ୟପ୍ରଦେଶର ରାଜ୍ୟପାଳ ଥିବା ରାମ ନରେଶ ଯାଦବଙ୍କ ପୁଅ ଶୈଳେଶ ମଧ୍ୟ ଏହି ସ୍କାମରେ ସମ୍ପୃକ୍ତ ଥିବା ଅଭିଯୋଗ ହୋଇଥିଲା।
ପରେ ତାଙ୍କ ଘରେ ଶୈଳେଶଙ୍କ ମୃତଦେହ ମିଳିଥିଲା। ଏହି ବହୁ ଚର୍ଚ୍ଚିତ ସ୍କାମରେ ଏପର୍ଯ୍ୟନ୍ତ ୧୦୦ରୁ ଅଧିକ ଲୋକ ଦୋଷୀ ସାବ୍ୟସ୍ତ ହୋଇଛନ୍ତି ଓ ଅନେକ ମାମଲା ଏବେ ବି କୋର୍ଟରେ ବିଚାରାଧୀନ ଅଛି। ନିକଟରେ ସେଣ୍ଟ୍ରାଲ୍ ଇନଭେଷ୍ଟିଗେସନ୍ ବ୍ୟୁରୋ (ସିବିଆଇ) ଏହି ମାମଲାରେ ମୋଟ ୬୫୦ ଅଭିଯୁକ୍ତଙ୍କ ବିରୋଧରେ ଚାର୍ଜସିଟ ଦାଖଲ କରାଯାଇଛି। ୨୦୧୫ ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ସିବିଆଇ ତଦନ୍ତ କରିଥିଲା।
