ନୂଆଦିଲ୍ଲୀ() ଋଦ୍ଧିମାନ ଶାହଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବ ବିସିସିଆଇ । ଶ୍ରୀଲଙ୍କା ବିପକ୍ଷ ଟେଷ୍ଟରେ ଋଦ୍ଧିମାନଙ୍କ ସ୍ଥାନ ନମିଳିବା ପରେ ସେ କୋଚ୍ ରାହୁଲ ଦ୍ରାବିଡଙ୍କ ସହ ବୋର୍ଡକୁ କଟାକ୍ଷ କରିଥିଲେ । ଏପରିକି ଜଣେ ସାମ୍ବାଦିକ ତାଙ୍କୁ ଧମକାଉଥିବା ସେ ଅଭିଯୋଗ କରିଥିଲେ । ଏପରି କରି ସେଣ୍ଟ୍ରାଲ କଣ୍ଟ୍ରାକ୍ଟ ନିୟମ ଉଲ୍ଲଙ୍ଘନ କରିଥିବା ବିସିସିଆଇ କହିଛି ।
ରିପୋର୍ଟ ଅନୁସାରେ, ଖେଳାଳିମାନେ ବିସିସିଆଇ ସହ କଣ୍ଟ୍ରାକ୍ଟ କରିବା ବେଳେ ଅନେକ କିଛି ନିୟମ ମାନିଥାନ୍ତି । ଖେଳାଳିମାନେ ଗଣମାଧ୍ୟମରେ କୌଣସି ଗୋପନୀୟ କଥା କହିପାରିବେ ନାହିଁ । ତେବେ ଶାହ ଦ୍ରାବିଡ ଓ ବିସିସିଆଇ ବାବଦରେ ମନ୍ତବ୍ୟ ଦେଇ ଏହାର ଉଲ୍ଲଙ୍ଘନ କରିଛନ୍ତି । ଏପରି କରି ସେ ବିବାଦରେ ଫସି ଯାଇଛନ୍ତି । ବୋର୍ଡ ଏବେ ଶାହଙ୍କୁ ଏସବୁ ବିବାଦ ଉପରେ ଜବାବ ମାଗିବ ।
ବିସିସିଆଇ କୋଷାଧ୍ୟକ୍ଷ ଅରୁଣ ଧୁମଲ କହିଛନ୍ତି ଯେ, ବୋର୍ଡ ଶାହଙ୍କୁ ଜବାବ ମାଗିବ । ସେଣ୍ଟ୍ରାଲ କଣ୍ଟ୍ରାକ୍ଟରେ ଥାଇ ମଧ୍ୟ ସେ ଗଣମାଧ୍ୟମରେ ଅନେକ କଥା କହିଛନ୍ତି । ବିସିସିଆଇ ମୁଖ୍ୟ ସୌରଭ ଗାଙ୍ଗୁଲି ଶାହଙ୍କ ସହ କଥା ହୋଇଥିଲେ । କିନ୍ତୁ ଦଳ ମ୍ୟାନେଜମେଣ୍ଟ ସହ ହୋଇଥିବା କଥାବାର୍ତ୍ତାକୁ ଶାହ କିପରି ପବ୍ଲିକ ଫୋରମରେ ରଖିଲେ ତାଙ୍କୁ ପ୍ରଶ୍ନ କରାଯିବ । ଗଣମାଧ୍ୟମରେ ସବୁ କଥା କହିବା ପାଇଁ ଦରକାର କଣ ଥିଲା ବୋଲି ତାଙ୍କୁ ପଚରାଯିବ ।
ସୂଚନାଯୋଗ୍ୟ, ଶ୍ରୀଲଙ୍କା ବିପକ୍ଷ ଟେଷ୍ଟ୍ ସିରିଜରେ ଋଦ୍ଧିମାନଙ୍କୁ ସ୍ଥାନ ମିଳିନଥିଲା । ତାଙ୍କ ବଦଳରେ କେଏଲ ରାହୁଲଙ୍କୁ ଚୟନ କରାଯାଇଥିଲା ।ଏଥିରେ ଅସନ୍ତୁଷ୍ଟ ହୋଇ ଶାହ ସୌରଭ ଗାଙ୍ଗୁଲି ଓ ରାହୁଲ ଦ୍ରାବିଡଙ୍କ ସହ ହୋଇଥିବା କଥାବାର୍ତ୍ତାକୁ ସୋସିଆଲ ମିଡିଆରେ ପୋଷ୍ଟ କରିଥିଲେ । ରାହୁଲ ଦ୍ରାବିଡ ତାଙ୍କୁ ଅବସର ନେଇ ଚିନ୍ତା କରିବା ପାଇଁ କହିଥିବା ସେ ପ୍ରକାଶ କରିଥିଲେ ।
