ନୂଆଦିଲ୍ଲୀ() ଜାହାଙ୍ଗୀରପୁରୀରେ ଚାଲିଥିବା ଜବରଦଖଲ ଉଚ୍ଛେଦ ଅଭିଯାନକୁ ବନ୍ଦ କରାଇବା ସହ ଆଗାମୀକାଲି ମାମଲାର ଶୁଣାଣି ହେବ ବୋଲି ଆଜି ସୁପ୍ରିମ୍ କୋର୍ଟ ଆଦେଶ ଦେଇଛନ୍ତି। ଦିଲ୍ଲୀ ହାଇକୋର୍ଟ ମଧ୍ୟ ଆଜି ଅପରାହ୍ଣ ୨ଟା ବେଳେ ଉକ୍ତ ମାମଲା ଶୁଣାଣି କରିବେ ବୋଲି ରାଜି ହୋଇଛନ୍ତି।
ସମ୍ପୂର୍ଣ୍ଣ ଅସାମ୍ବିଧାନିକ ବୋଲି ଦର୍ଶାଇ ଉଚ୍ଛେଦ ଅଭିଯାନ ଉପରେ ରହିତାଦେଶ ଜାରି କରିବା ଲାଗି ଆଗତ ପିଟିସନ୍ର ଶୁଣାଣି କରି ସୁପ୍ରିମ୍ କୋର୍ଟ ଉପରୋକ୍ତ ଆଦେଶ ଦେଇଛନ୍ତି। ବରିଷ୍ଠ ଆଡ୍ଭୋକେଟ୍ ଦୁଷ୍ୟନ୍ତ ଦାୱେ କହିଛନ୍ତି, ଜାହାଙ୍ଗୀରପୁରୀ ଅଞ୍ଚଳରେ ସମ୍ପୂର୍ଣ୍ଣ ଅଣସ୍ବୀକୃତ ଅସାମ୍ବିଧାନିକ ଉଚ୍ଛେଦ ଆଦେଶ ଦିଆଯାଇଛି।
ସଦ୍ୟତମ ସୂଚନା ଅନୁସାରେ, ସୁପ୍ରିମ୍ କୋର୍ଟ ଆଦେଶ ପାଇ ନ ଥିବା କହି ଜାହାଙ୍ଗୀରପୁରୀ ଅଞ୍ଚଳରେ ଉଚ୍ଛେଦ ଅଭିଯାନ ଜାରି ରହିଛି। ଉତ୍ତର ‘ଏମ୍ସିଡି’ କମିସନର୍ କହିଛନ୍ତି, ଆମେ ଏପର୍ଯ୍ୟନ୍ତ ସୁପ୍ରିମ୍ କୋର୍ଟଙ୍କ ଆଦେଶନାମାର କପି ପାଇ ନାହୁଁ। ସେଥିପାଇଁ ଉଚ୍ଛେଦ ଚାଲିଛି।
ଏକଥା ଶୁଣିବା ପରେ, ଆବେଦନକାରୀଙ୍କ ଓକିଲ ମହାନଗର ନିଗମ, ପୁଲିସ ଏବଂ ଦିଲ୍ଲୀ ମୁଖ୍ୟ ସଚିବଙ୍କୁ ଲିଗାଲ୍ ନୋଟିସ୍ ପଠାଇଛନ୍ତି। ସୁପ୍ରିମ୍ କୋର୍ଟଙ୍କ ଆଦେଶ ଅନୁସାରେ, ଜାହାଙ୍ଗୀରପୁରୀରେ ଉଚ୍ଛେଦ ଅଭିଯାନ ବନ୍ଦ କରାଯାଉ ବୋଲି ସେଥିରେ ଅନୁରୋଧ କରାଯାଇଛି।
ଏହି ଉଚ୍ଛେଦ ସଂକ୍ରାନ୍ତରେ ସେମାନଙ୍କୁ କୌଣସି ‘ନୋଟିସ୍’ ଦିଆଯାଇ ନାହିଁ ବୋଲି ଜାହାଙ୍ଗୀରପୁରୀର ବାସିନ୍ଦାମାନେ କହୁଛନ୍ତି। କିନ୍ତୁ, ଉତ୍ତର ଦିଲ୍ଲୀ ମହାନଗର ନିଗମର ମେୟର୍ ରାଜା ଇକ୍ବାଲ୍ ସିଂହ ଆଜି ସକାଳ କହିଥିଲେ ଯେ, ସମଗ୍ର ଦିଲ୍ଲୀରେ ଜବରଦଖଲ ବିରୋଧୀ ଅଭିଯାନ ଚାଲିବ। ଏହି ଅଭିଯାନ ଲାଗି ଆମେ ଆଗରୁ ନିରାପତ୍ତା ପାଇଁ ଅନୁରୋଧ କରିଥିଲୁ। କିନ୍ତୁ, କୌଣସି କାରଣରୁ ସେ ବିଷୟରେ କିଛି ପଦକ୍ଷେପ ନିଆଯାଇ ନ ଥିଲା।
