ବାଧ୍ୟତାମୂଳକ ହେବନି ସ୍ନାତକୋତ୍ତର, ସ୍ନାତକ ପରେ ସିଧାସଳଖ ପିଏଚ୍‌ଡି

ସେହିପରି ୭.୫ ସିଜିପିଏରୁ କମ୍‍ ରଖିଥିବା ଛାତ୍ରଛାତ୍ରୀ ପିଏଚଡି ଅଧ୍ୟୟନ ପାଇଁ ବର୍ଷିକିଆ ପିଜି କୋର୍ସରେ ନାମ ଲେଖାଇବେ। ବର୍ଷିକିଆ ପିଜି କୋର୍ସ ଶେଷ ହେବା ପରେ ସେମାନେ ମଧ୍ୟ ପିଏଚଡି ଅଧ୍ୟୟନ କରିବେ। ପୂର୍ବରୁ ପିଏଚଡି ପାଇଁ ଏମଫିଲର ବାଧ୍ୟତାମୂଳକ ନିୟମ ପରିବର୍ତ୍ତନ କରାଯାଇଥିବାବେଳେ ଏବେ ଆଉ ଏକ ନୂଆ ନିୟମ ଲାଗୁ ହେବାକୁ ଯାଉଛି। ଇଣ୍ଟିଗ୍ରେଟେଡ୍‍ ଛାତ୍ରଛାତ୍ରୀଙ୍କ ପିଏଚଡି ଅଧ୍ୟୟନ ନିୟମ ଆସନ୍ତା ଶିକ୍ଷା ବର୍ଷରୁ ଲାଗୁ ହେବ। ତେବେ ଏ ସମ୍ପର୍କିତ ସବିଶେଷ ତଥ୍ୟ ଖୁବଶିଘ୍ର ୟୁଜିସି ପକ୍ଷରୁ ପ୍ରକାଶ ପାଇବ ବୋଲି ଅଧ୍ୟକ୍ଷ ପ୍ରଫେସର କୁମାର କହିଛନ୍ତି। ଏହି ବ୍ୟବସ୍ଥା ଲାଗୁ ହେବା ଦ୍ୱାରା ଛାତ୍ରଛାତ୍ରୀଙ୍କ ଦୁଇ ବର୍ଷ ବଞ୍ଚିବ। ଛାତ୍ରଛାତ୍ରୀ ଏହି ସମୟକୁ ସଠିକ ଭାବେ ଉପେଯାଗ କରିପାରିବେ ବୋଲି ସେ କହିଛନ୍ତି।

ସେହିପରି ବିଶ୍ୱବିଦ୍ୟାଳୟଗୁଡ଼ିକର ୪୦ପ୍ରତିଶତ ସିଟ୍‍ରେ ପିଏଚଡି ଅଧ୍ୟୟନ ପାଇଁ ପିଲାଙ୍କୁ ବିଶ୍ୱବିଦ୍ୟାଳୟ ଦ୍ୱାରା ଚୟନ କରାଯିବାକୁ ଥିବାବେଳେ ୬୦ ପ୍ରତିଶତ ସିଟ୍‍ ବିଭିନ୍ନ ଜାତୀୟ ସ୍ତରର ପ୍ରବେଶିକା ଦ୍ୱାରା ଚୟନ କରାଯିବ। ମାତ୍ର ଇଣ୍ଟିଗ୍ରେଟେଡ୍‍ ୟୁଜି ଛାତ୍ରଛାତ୍ରୀଙ୍କ ପିଏଚଡି ନାମଲେଖା କ୍ଷେତ୍ରରେ ନେଟ୍‍(ଜାତୀୟ ଯୋଗ୍ୟତା ପରୀକ୍ଷା) ସମ୍ପର୍କରେ କୌଣସି ସୂଚନା ଦିଆଯାଇ ନାହିଁ। ନାମଲେଖା ସମ୍ପର୍କରେ ସବିଶେଷ ମାର୍ଗଦର୍ଶିକା ଖୁବଶିଘ୍ର ୟୁଜିସି ପକ୍ଷରୁ ପ୍ରକାଶ ପାଇବ ବୋଲି ଅଧ୍ୟକ୍ଷ କହିଛନ୍ତି। ଅପରପକ୍ଷେ ୟୁଜିସିର ଏହି ନିୟମକୁ ଶିକ୍ଷାବିତ୍‍ମାନେ ନାପସନ୍ଦ କରିଛନ୍ତି। ସେମାନଙ୍କ କହିବା ଅନୁଯାୟୀ ଗବେଷଣା ପାଇଁ ଛାତ୍ରଛାତ୍ରୀ ପରିପକ୍ୱ ହେବା ଜରୁରୀ। ସ୍ନାତକ ପରେ ସେମାନେ ମାନସିକ ସ୍ତରରେ ପ୍ରସ୍ତୁତ ହୋଇ ନଥା’ନ୍ତି। ତେବେ ଏ ଦିଗରେ ୟୁଜିସି ବିଚାରବିମର୍ଶ କରିବାର ଆବଶ୍ୟକତା ରହିଛି ବୋଲି ମତ ପ୍ରକାଶ ପାଇଛି।