ବ୍ରହ୍ମପୁର,୨୧/୦୭/୨୦୨୨- ସାରା ଦେଶରେ ଦିନକୁ ଦିନ ପୁଣି କାୟା ବିସ୍ତାର କଲାଣି କରୋନା । ଓଡ଼ିଶାରେ ବି କରୋନା ଗ୍ରାଫ ଦିନକୁ ଦିନ ବଢ଼ିବାରେ ଲାଗିଛି। ଏହାକୁ ଗୁରୁତର ସହ ନେଇ ଗଞ୍ଜାମ ଜିଲ୍ଲା ବ୍ରହ୍ମପୁର ସହରରେ ପୁଣି ବାଧ୍ୟତାମୂଳକ ହେଲା ମାସ୍କ ପରିଧାନ । ଏ ନେଇ ବ୍ରହ୍ମପୁର ମହାନଗର ନିଗମ ପକ୍ଷରୁ କଡାକଡି ଭାବରେ ସମସ୍ତେ ପାଳନ ପାଇଁ ଜାରି କରାଯାଇଛି ନିର୍ଦ୍ଦେଶନାମା । ଏବେ ରାଜ୍ୟ ଠାରୁ ଆରମ୍ଭ କରି ଦେଶର ବିଭିନ୍ନ ସ୍ଥାନରେ କୋଭିଡ ପଜିଟିଭଙ୍କ ସଂଖ୍ୟା ବୃଦ୍ଧି ପାଇବା ପରେ ବ୍ରହ୍ମପୁର ମହାନଗର ନିଗମ ପକ୍ଷରୁ ସହରରେ କୋଭିଡ କଟକଣା ଜାରି କରାଯାଇଛି । ବାହାରେ ଛେପ ନପକାଇବା ସହିତ ପ୍ରତ୍ୟେକ ବ୍ୟବସାୟିକ ଅନୁଷ୍ଠାନରେ No Mask No Entry ସୂଚନା ଗ୍ରାହକଙ୍କ ପାଇଁ ଲେଖିବାକୁ ନିର୍ଦ୍ଦେଶନାମାରେ ଉଲ୍ଲେଖ ରହିଛି । ଅନ୍ୟପଟେ ଏଭଳି ନିର୍ଦ୍ଦେଶନାମାକୁ ନେଇ ବ୍ୟାପକ ସଚେତନା କରାଯିବା ପରେ ଏହାକୁ କଡ଼ାକଡ଼ି ପାଳନ ପାଇଁ ନିର୍ଦ୍ଦେଶ ରହିଛି । ନିୟମ ନ ମାନିଲେ ଅମାନିଆଙ୍କ ଠାରୁ ଜୋରିମାନା ଆଦାୟ କରାଯିବ ବୋଲି କୁହାଯାଇଛି । ବ୍ରହ୍ମପୁର ମହାନଗର ନିଗମ ସମସ୍ତ ଧର୍ମାନୁଷ୍ଠାନ, ପାର୍କ ଭଳି ସର୍ବସାଧାରଣ ସ୍ଥାନରେ ମାସ୍କ ବାଧ୍ୟତାମୂଳକ କରାଯାଇଛି। ଏ ନେଇ ମହାନଗର ନିଗମର କମିଶନର ଜେ. ସୋନାଲ ସହରର ସମମସ୍ତ ବାସିନ୍ଦା ଏବଂ ବ୍ୟବସାୟୀ ମାନଙ୍କୁ ଗଣମାଧ୍ୟମ ଜରିଆରେ ନିୟମ ପାଳନ କରିବାକୁ ନିବେଦନ କରିଛନ୍ତି।
