ଭୁବନେଶ୍ୱର: ଉତ୍ତରପ୍ରଦେଶ ମେରଟରେ, ଜଣେ ଯୁବକଙ୍କର ସାହସର କାହାଣୀ ଏବେ ସୋସିଆଲ ମିଡିଆରେ ଭାଇରଲ ହେବାରେ ଲାଗିଛି । ବାଇକ୍ ଯୋଗେ ଘରକୁ ଯାଉଥିବା ବେଳେ ଯୁବକକୁ ଗୁଳି କରିଥିଲେ ଦୁର୍ବୃତ୍ତ। କିନ୍ତୁ ଏଥିରେ ଯୁବକ ଜଣକ ଭୟଭୀତ ନ ହୋଇ ସାହସ ଦେଖାଇ ନିଜେ ବାଇକ ଚଳାଇ ଡାକ୍ତରଖାନାରେ ପହଞ୍ଚିଯାଇଥିଲେ ଏବଂ ଡାକ୍ତରଙ୍କୁ ନିଜର ଚିକିତ୍ସା କରିବାକୁ କହିଥିଲେ ।
ଜାତୀୟ ଗଣମାଧ୍ୟମରେ ପ୍ରକାଶ ପାଇଥିବା ଖବର ଅନୁଯାୟୀ, ଶେରଗଡ଼ ନିବାସୀ ରାଜକୁମାରଙ୍କ ପୁଅ ରାମ ପ୍ରସାଦ ପରତାପୁରର ଏକ କାରଖାନାରେ ପ୍ୟାକିଂ କାମ କରନ୍ତି। ରାମ ପ୍ରସାଦ ଅଫିସରୁ ଡ୍ୟୁଟି ସରିବା ପରେ ବାଇକ୍ ଯୋଗେ ଘରକୁ ଫେରୁଥିଲେ । ଯେତେବେଳେ ସେ ଜୁରାନପୁର ରେଳ ଫାଟକ ନିକଟରେ ପହଞ୍ଚିଲେ, ସେତେବେଳେ ସେ କିଛି ଅସ୍ଥିରତା ଅନୁଭବ କରିଥିଲେ। ଯେତେବେଳେ ସେ ତାଙ୍କ ପିଠିରେ ହାତ ବୁଲାଇଲେ, ତାଙ୍କ ହାତ ରକ୍ତରେ ଲାଲ ହୋଇଯାଇଥିଲା। ରାମ ପ୍ରସାଦ ନିଶ୍ଚିତ ହୋଇଥିଲେ ଯେ କେହି ତାଙ୍କୁ ଗୁଳି କରିଛି । ଭୟଭୀତ ନ ହୋଇ ରାମ ପ୍ରସାଦ ରେଳ ଫାଟକରେ ଉପସ୍ଥିତ ଥିବା କର୍ମଚାରୀଙ୍କୁ କହିଥିଲେ ଯେ କେହି ତାଙ୍କୁ ଗୁଳି କରିଛି ଏବଂ ତାଙ୍କୁ ଡାକ୍ତରଖାନା ଯିବାକୁ ପଡିବ। ଏହା ପରେ ରେଳ କର୍ମଚାରୀ ଜଣକ ଫାଟକକୁ ଖୋଲିଦେଇଥିଲେ। ରାମ ପ୍ରସାଦ ବାଇକ୍ ଚଳାଇ ନିକଟସ୍ଥ ଏକ ହସ୍ପିଟାଲରେ ବାଇକ୍ ପାର୍କିଂ କରି ସିଧା ଜରୁରୀକାଳୀନ ୱାର୍ଡକୁ ଯାଇଥିଲେ। ସେଠାରେ ପହଞ୍ଚି ଡାକ୍ତରଙ୍କୁ କହିଥିଲେ ଯେ କେହି ତାଙ୍କୁ ଗୁଳି କରିଛନ୍ତି। ରାମ ପ୍ରସାଦ ତୁରନ୍ତ ଭର୍ତ୍ତି କରାଯାଇଥିଲା ଏବଂ ତାଙ୍କର ଅପରେସନ୍ କରାଯାଇଥିଲା।
ଏହି ସମୟରେ ରାମ ପ୍ରସାଦ ତାଙ୍କ ପରିବାରକୁ ଫୋନ୍ କରି ଜଣାଇଥିଲେ। ଗୁଳିକାଣ୍ଡ ଘଟଣା ଖବର ଆସିବା ପରେ ପରତାପୁର ଏବଂ ମେଡିକାଲ ଷ୍ଟେସନ ପୋଲିସ ଘଟଣାସ୍ଥଳରେ ପହଞ୍ଚିଥିଲେ। ଆହତ ରାମ ପ୍ରସାଦ ପିତା ଅଜ୍ଞାତ ଲୋକଙ୍କ ବିରୋଧରେ ଅଭିଯୋଗ କରିଛନ୍ତି। ଯାହାକୁ ଭିତ୍ତି କରି ବର୍ତ୍ତମାନ ପୋଲିସ ଏହି ଘଟଣାର ଅନୁସନ୍ଧାନ କରୁଛି।
