ଭୁବନେଶ୍ବର: ସ୍ବତନ୍ତ୍ର କୃଷି ନୀତି ଯୋଗୁଁ ଓଡ଼ିଶାର କୃଷି ଅଭିବୃଦ୍ଧି ଜାତୀୟ ହାର ତୁଳନାରେ ଆଗରେ ରହିଛି । ଦେଶର କୃଷି ଅଭିବୃଦ୍ଧି ହାର ୫.୯୮% ଥିବା ବେଳେ ଓଡ଼ିଶାରେ ଏହା ୨୨.୫୨% ହୋଇଛି ।
ଗତ ଆର୍ଥିକ ବର୍ଷରେ ଓଡ଼ିଶାର ପ୍ରଦର୍ଶନ ଜାତୀୟ ହାରଠାରୁ ଯଥେଷ୍ଟ ଊର୍ଦ୍ଧ୍ବରେ ରହିଛି । ୨୦୨୧-୨୨ ବର୍ଷରେ ଓଡ଼ିଶାର କୃଷି କ୍ଷେତ୍ର ଜିଡିପିର ୨୨ ଦଶମିକ ୯୧ ପ୍ରତିଶତ ରହିଥିବା ବେଳେ, ଜାତୀୟ ସ୍ତରରେ ଏହା ଥିଲା ମାତ୍ର ୨ ଦଶମିକ ୩୮ ପ୍ରତିଶତ । ୨୦୧୬-୧୭ ବର୍ଷଠାରୁ ଆରମ୍ଭ କରି ୨୦୨୨-୨୩ ବର୍ଷ ପର୍ଯ୍ୟନ୍ତ ପ୍ରତ୍ୟେକ ବର୍ଷ କୃଷି କ୍ଷେତ୍ରରେ ଦେଶଠାରୁ ଭଲ ପ୍ରଦର୍ଶନ କରି ଆସୁଛି ରାଜ୍ୟ ।
ଉପଯୁକ୍ତ ପ୍ରୋତ୍ସାହନ ମିଳିବା ହେତୁ ଅଣଧାନ ଫସଲ ପ୍ରତି ଚାଷୀମାନେ ଆଗ୍ରହ ଦେଖାଉଛନ୍ତି ।୨୦୨୩ ଜାନୁଆରୀ ଶେଷ ପର୍ଯ୍ୟନ୍ତ ଓଡ଼ିଶା ମିଲେଟ୍ ମିଶନରେ ୨ ଲକ୍ଷ ୬୬ ହଜାର ହେକ୍ଟର ଜମିରେ ମିଲେଟ୍ ଉତ୍ପାଦନ ନେଇ ଲକ୍ଷ୍ୟ ରଖାଯାଇଥିବା ବେଳେ, ୨ ଲକ୍ଷ ୧୦ ହଜାର ହେକ୍ଟର ଜମିରେ ଯୋଜନା କାର୍ଯ୍ୟକ୍ଷମ ହୋଇଛି । ସେହିଭଳି ସଘନ କୃଷି କାର୍ଯ୍ୟକ୍ରମ ପାଇଁ ଲକ୍ଷ୍ୟ ରଖାଯାଇଥିବା ସମସ୍ତ ୧୯ ହଜାର ୫୪୯ ହେକ୍ଟର ଜମି କାର୍ଯ୍ୟକ୍ଷମ ହୋଇସାରିଛି ।
