ଭୁବନେଶ୍ୱର: ବଢୁଛି ଜନଅସନ୍ତୋଷ, ବଢୁଛି ନବୀନଙ୍କ ଲୋକପ୍ରିୟତା । ବିଜେପି ସରକାରକୁ ବିତି ସାରିଲାଣି ୭ ମାସ । କିନ୍ତୁ ଜନଆଦୃତ ଆଦରି ପାରୁନାହାନ୍ତି ମୋହନ ସରକାର । ସମୀକରଣ କହୁଛି ତୃଣମୂଳ ସ୍ତରରେ ପଞ୍ଚାୟତ ଇଲେକ୍ସନ ବାଜିମାତ କରିବ ବିଜେଡି । ଏହାର ବିଭିନ୍ନ କାରଣ ମଧ୍ୟ ରହିଛି ।
• ପ୍ରଥମ କାରଣ ହେଉଛି ସୁଭଦ୍ରା ଯୋଜନାରେ ମହିଳାଙ୍କୁ ସ୍ୱାବଲମ୍ବୀ କରିବା ପାଇଁ ୫୦ ହଜାର ଟଙ୍କା ଯୋଗାଇ ଦେବାର ପ୍ରତିଶୃତି ଦେଇଥିଲା ବିଜେପି, କିନ୍ତୁ ୫୦ ହଜାର ୫ ହଜାରକୁ ଖସି ଆସିଲା । ଏବଂ ସବୁଠାରୁ ବଡ଼ କଥା ହେଉଛି ଯେ ଏପର୍ଯ୍ୟନ୍ତ ଏହି କିସ୍ତି ସମସ୍ତ ଆବେଦନକାରୀଙ୍କ ଖାତାକୁ ଯାଇ ନାହିଁ ।
• ଦ୍ୱିତୀୟ କାରଣ ହେଉଛି ଧାନ ମଣ୍ଡିକୁ ନେଇ ମଧ୍ୟ ଚାଷୀଙ୍କ ଅସନ୍ତୋଷର ଶିକାର ହେବାକୁ ପଡୁଛି ମୋହନ ସରକାରଙ୍କୁ । ମଣ୍ଡିରୁ ଉଠିପାରୁନି ଧାନ । ଅଦିନିଆ ବର୍ଷା ଯୋଗୁଁ ଖରାପ ମାନ ପାଇଁ ସରକାର ଧାନ କିଣିବାକୁ ନାରାଜ ଏବଂ ଏହା ବଦଳରେ ଚାଷୀ କ୍ଷତିପୂରଣ ମଧ୍ୟ ଏଯାଏଁ ପାଇନି ।
• କାରଣ ନମ୍ବର ୩ । ମାଳ ମାଳ ପ୍ରତିଶୃତି ମଧ୍ୟରେ ମୋହନ ମାଗଣା ବିଜୁଳି ଯୋଗାଇବାର କଥା ଦେଇଥିବା ବେଳେ ଏଯାଏଁ ତାହା ପୂରା ହୋଇନଥିବା ମଧ୍ୟମ ବର୍ଗର ଲୋକଙ୍କ ପକେଟ ଉପରେ ପକାଉଛି ପ୍ରଭାବ ।
• ଆଳୁ, ପିଆଜ ପନିପରିବା ପରି ନିତ୍ୟ ବ୍ୟବହୃତ ସାମଗ୍ରୀର ମଧ୍ୟ ଦରବୃଦ୍ଧି ଚିନ୍ତାର ବିଷୟ ।
• ଓଡ଼ିଶାବାସୀଙ୍କ ମଧ୍ୟରେ ଜନଅସନ୍ତୋଷ ଦିନକୁ ଦିନ ବୃଦ୍ଧି ପାଇବାର ଅନେକ କାରଣ ମଧ୍ୟରୁ ଆଉ ଏକ କାରଣ ହେଉଛି ବିପର୍ଯ୍ୟସ୍ଥ ଆଇନ ଶୃଙ୍ଖଳା ପରିସ୍ଥିତି । ଦିବାଲୋକରେ କିଏ କାହାକୁ ହାଣିଲାଣି ତ ଆଉ କେଉଁଠି ଚୋରି ନାଁରେ ହେଉଛି ଲୁଟ ଓ ଦୁଷ୍କର୍ମ । ସାଧାରଣ ଲୋକ ହୁଅନ୍ତୁ ଅବା ନାମକରା ନେତା । କେହି ଏଠି ସୁରକ୍ଷିତ ନାହାନ୍ତି ।
• ମାତ୍ର ୭ ମାସ ଭିତରେ ଲୋକଙ୍କ ସରକାର କେତେ ପାରିବାର ତାହା ଏବେ ପ୍ରଶ୍ନ ଉଠାଉଛନ୍ତି ଓଡ଼ିଶାବାସୀ ।
ଅନ୍ୟପଟେ ଯଦି ଦେଖିବା ଗୋଟେ ପଟେ ଲୋକଙ୍କ ଏହି ଜନଅସନ୍ତୋଷ ନବୀନ ପଟ୍ଟନାୟକଙ୍କ ସକ୍ରିୟତାକୁ ବଢାଇଦେଇଛି । ଆଗରୁ ସଭା ସମିତିରେ ମୁଖ୍ୟମନ୍ତ୍ରୀ ଭାବେ ନବୀନଙ୍କ ଅନୁପସ୍ଥିତି ବାରି ହୋଇପଡୁଥିବା ବେଳେ ଏବେ ତାଙ୍କୁ ପ୍ରାୟ ସବୁଠି ଦେଖିବାକୁ ମିଳୁଛି । ଏସମସ୍ତ କାରଣ ନବୀନ ପଟ୍ଟନାୟକଙ୍କ ଲୋକପ୍ରିୟତାକୁ ଦ୍ୱିଗୁଣିତ କରିଦେଇଛି । ତେବେ ରାଜ୍ୟ ରାଜନୀତରେ କେଉଁ ପାଣି କେଉଁ ଦିଗକୁ ଯାଉଛି ତାହା ଦେଖିବା ବାକି ରହିଲା ।
