ଜଳ ଘେରରେ ବନ୍ଦୀ ହୋଇଛି ଦିଲ୍ଲୀ, ସାଂଘାତିକ ହେଲାଣି ସ୍ଥିତି

ମୋବାଇଲ୍‌ ନ୍ୟୁଜ୍‌ ବ୍ୟୁରୋ: ହିମାଚଳପ୍ରଦେଶ ପରେ ପରେ ବନ୍ୟା ଘେରରେ ଉବୁଟୁବୁ ହେଉଛି ନୂଆଦିଲ୍ଲୀ। ହେଇଯାଇଛି ଦିଲ୍ଲୀ ଜଳମୟ । ପ୍ରବଳ ବର୍ଷାରେ ଜଳମଗ୍ନ ହୋଇପଡ଼ିଛି ଦେଶର ରାଜଧାନୀ ଦିଲ୍ଲୀ । ଦିଲ୍ଲୀର ଯମୁନା ନଦୀର ଜଳସ୍ତର ୪୫ ବର୍ଷର ରେକର୍ଡ ଭାଙ୍ଗିଛି । ଦିଲ୍ଲୀରେ ଯମୁନା ନଦୀ ବିପଦ ସଙ୍କେତ ଉପରେ ପ୍ରବାହିତ ହେଉଛି । ଏହାର ବିପଦ ସଙ୍କେତ ୨୦୫ ଦଶମିକ ୩୩ ମିଟର ରହିଥିବା ବେଳେ ଜଳସ୍ତର ୨୦୮ ଦଶମିକ ୪୧ ମିଟରରେ ପହଞ୍ଚି ଯାଇଛି । ପୁଣି ଜଳସ୍ତର ବୃଦ୍ଧି ଘଟିଲେ ଦିଲ୍ଲୀରେ ସାଂଘାତିକ ସ୍ଥିତି ସୃଷ୍ଟି ହେବ । ଯମୁନା ନଦୀରେ ଜଳସ୍ତର ବୃଦ୍ଧି କାରଣରୁ ଦିଲ୍ଲୀର ବିଭିନ୍ନ ରାସ୍ତାରେ ବନ୍ୟା ଜଳ ଲହରୀ ଭାଙ୍ଗୁଥିବା ବେଳେ ରାଜଘାଟ, ଆଇଟିଓ, କଶ୍ମୀର ଗେଟ ଅଞ୍ଚଳରେ ମଧ୍ୟ ବନ୍ୟା ଜଳ କଲବଲ କରୁଛି । ଏହାଭିତରେ ଲାଲକିଲ୍ଲାର ପଛ ପାଶ୍ୱର୍ରେ ମଧ୍ୟ ବନ୍ୟା ଜଳ ପଶିବା ଆରମ୍ଭ କରୀଛି । ପୁରୁଣା ଦିଲ୍ଲୀକୁ ଯାଉଥିବା ରାସ୍ତା ଜଳମଗ୍ନ ହୋଇଯିବା କାରଣରୁ ଯାତାୟତ ବାଧାପ୍ରାପ୍ତ ହୋଇଛି। ଖାଲି ସେତିକି ନୁହେଁ, ମୁଖ୍ୟମନ୍ତ୍ରୀଙ୍କ ବାସ ଭବନ ପାଖାପାଖି ଜଳ ମାଡ଼ିଗଲାଣି।

ଦିଲ୍ଲୀରେ ଏଭଳି ପରିସ୍ଥିତି ସୃଷ୍ଟି ହେବା ଫଳରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍‌ ସେନାବଳର ସହାୟତା ଲୋଡ଼ିଛନ୍ତି। ସେହିଭଳି ବଜିରାବାଦ ପାନୀୟ ଜଳ ଟ୍ରିଟମେଣ୍ଟ ପ୍ଲାଣ୍ଟରେ ବନ୍ୟା ଜଳ ପଶିବା କାରଣରୁ ପ୍ଲାଣ୍ଟକୁ ବନ୍ଦ କରାଯାଇଛି । ତେଣୁ ଆଗକୁ ପାନୀୟ ଜଳ ସମସ୍ୟା ଦେଖାଦେଇପାରେ । ବିପଦକୁ ଦୃଷ୍ଟିରେ ରଖି ଉଦ୍ଧାର କାର୍ଯ୍ୟ ପାଇଁ ଏନଡିଆରଏଫକୁ ନିୟୋଜିତ କରାଯାଇଛି । ଜଳମଗ୍ନ ହୋଇଥିବା ଅଞ୍ଚଳରୁ ଏନଡିଆରଏଫ ଟିମ୍ ଲୋକଙ୍କୁ ଉଦ୍ଧାର କରୁଛନ୍ତି । ବନ୍ୟା ସ୍ଥିତି ଏତେ ସାଂଘାତିକ ହୋଇଛି ଯେ, ରାସ୍ତାଘାଟ ବୁଡିବା କାରଣରୁ ଟ୍ରାଫିକ ସମସ୍ୟା ଭୟଙ୍କର ହୋଇଛି । ବିଭିନ୍ନ ରାସ୍ତାରେ ହଜାର ହଜାର ଗାଡି ଅଟକି ରହିଛି । ଯେଉଁଥିପାଇଁ ଲୋକଙ୍କୁ ଘରୁ ବାହାରିବା ପୂର୍ବରୁ ଟ୍ରାଫିକ ସ୍ଥିତି ବାବଦରେ ଜାଣିବାକୁ କୁହାଯାଉଛି । କିଛି ସ୍ଥାନରେ ଟ୍ରାଫିକ ରୁଟକୁ ଡାଇର୍ଭଟ କରାଯାଇଥିବା ବେଳେ କିଛି ରାସ୍ତାକୁ ସମ୍ପୂର୍ଣ୍ଣ ବନ୍ଦ କରି ଦିଆଯାଇଛି । ଶିକ୍ଷାନୁଷ୍ଠାନଗୁଡ଼ିକୁ ମଧ୍ୟ ବନ୍ଦ କରାଯାଇଛି।